راجی ءُ سیاسی جیڑہ-ابرم بلوچ

راجی ءُ سیاسی جیڑہ

نبشتہ کار: ابرم بلوچ

دی بلوچستان پوسٹ

میتگ ءِ وانندگیں گِس ءِ پنچیں براساں راجی جیڑہ ءُ راجی اُگبال ءِ جیڑہ چہ بنداتی روچ ءَ دردوار کرتگ اَت۔ کسے ھم دلجم نندگ ءَ پہ وھد نگوازین اِیت سُھب داں شام میتگ ءِ مردمانی مچی اَت ءُ بان ءِ دیم ءَ باوست اَت اسل راجی جیڑہ بیان کنگ ءِ مکابلہ ءَ اسپ تاچینگ اَت، پنچیں براس چہ یکے دومی ءَ باج بر اِت اَنت۔ ھر روچ مجلس اَت مھلوک ءِ دیم ءَ یک ناں یکے ملامت بوت ءُ پاد اتک۔پاری رپیک ءَ مّن اِتگ اَت کہ اگاں اے سال ءِ گڈی ءَ پیسر آ کمشنر ءِ چکاس ءَ سوبین بیت، کول اِنت کہ آ گوں ھکومت ءُ سرمایہ داراں راھے روت۔آئی ءَ چہ پیش پیز ملامت بیتگ اَت مھلوک ءَ گوشتگ اَت کہ آ مئے گریبی ءَ نہ گِند اِیت گپ جنت، بلکیں آئی ءِ زور ھمیش اِنت کہ ھر مردم اوٹ ءُ پارلیمانی سیاست ءَ بھر بزور اِیت، گڑا ما وتی اُگبالاں گپت کنیں۔

پیز ءَ مھلوک ءِ دیم ءَ وتی ملامتی ءَ ھمے پسو داتگ اَت چوشکہ آ وت ءُ ھمے گژن ءُ لنگڑی ءِ شکار اِنت کہ ایندگہ مردم اَنت۔ چوناھا ءَ آ کول کنت اگاں اے بر ءَ الیکشن ءَ آئی ءِ پارٹی کٹ اِیت گڑا آئی ءِ یکیں مکسد اِنت کہ آ وتی راجی اُگبالانی واستا پارلیمنٹ ءَ ھر وڑ ءَ وتی مردمانی بھت ءَ بدل کنگ ءِ جھد ءَ کنت۔ پیراری ھمید ءَ سیاسی ءُ راجی میدان ءَ بے سوبی ءِ سوَب ءَ وتی زمینداری ءِ بوتگیں چہ تاوان ءَ جنجالانی گیشی گوشتگ اَت۔ اگاں آئی ءِ پیماز ءِ کشار تاوان مہ کُرتیں داں اے وھد ءَ الم ءَ راجی جھد دیم ءَ برتگ اَت۔ امبراں اشرپ ءَ راجی کاراں ھمے سوب پد منتگ اَت کہ آئی ءِ سر ءَ (غبن) corruption ءِ جرمے ءَ کیسے ھکومت ءَ جوڑ کرتگ اَت۔ ھر روچ ھدالت ءِ چکر ءَ آئی ءَ موہ نیست اَت کہ راجی کاراں سرجم بُہ کرتیں بس شپ ءُ سھب بیگاہ آ اے بے ڈولیں نزام ءِ بگیر ءَ مھلوک ءَ گوں تران کرت۔

انوں کستریں شھباز اَت کہ تنیگا نودربرے اَت بلے انچوش زانگ بوت کہ آ درستاں چہ گیش سیاسی ءُ راجی جیڑھاں ھمگرنچ اَت۔ مھلوک ءِ شکایت ءُ راجی کارانی دیمروی نہ کنگ ءِ پسو ءَ آئی ءَ گُشتگ اَت کہ بس رھشونانی یک پرمانے ءِ ودار اِنت آ چوشیں موہ نیل اِیت کہ زورگیر ءَ پِٹے ھم تاکت مان اِیت کہ آئی ءِ راج ءِ لٹ ءُ پل استحصال دیمتر کرت بہ کنت۔داں زمانگے ٹکری نسیر کہ ٹیکدار ءِ نام ءَ ھم مشھور اَت آئی ءِ لوگ میتگ ءِ روژنیں جیڑھانی پدرا کنگ ءِ جاہ اَت۔پنچیں براتاں مھلوک ءَ پنچیں توپان ءِ نام داتگ اَت کہ راجی جیڑھاں پہ اگاں آشوب ءِ توپانے کیت گڑا چہ ھمد ءَ کیت۔باوست ءُ ھبر وتی جاگہ ءَ بیست ءُ یکمی کرن ءَ یک اے وڑیں جیڑھے نیست کہ ناممکن اِنت کہ راج ءَ پیسلہ بکرتیں ءُ سرجم مہ بوتیں ھمے سوبینی ءِ روچ ءَ رپیک ءَ کمشنر ءِ اگدہ ءِ سیٹّ گپت، پیز پارلیمنٹ ءَ وزیر جوڑ بوت، ھمید ءَ اِمبراں انچیں کشارے تیار کرت کہ درستیں الاکہ ءِ مردماں پیسر منڈی ءَ گپت ءُ درستاں گیش نپ کرت۔ اشرپ ءِ بگیر ءَ ھکومت ءَ کیس واپس زرتگ اَت ءُ آ سر بلند بوتگ اَت۔

دومی نیمگ ءَ ھکومت بازیں سیاسی سروکاں گرگ ءُ جیل ءَ بندی کنگ ءَ اَت۔ ھر نیمگ ءَ راجی ءِ ریلی ءُ ھڑتال اَت ھکومتی مشینری سوچگ ءُ بن دیگ بوگ ءَ اَت۔ انوں ھم ٹکری نسیر ءِ لوگ ءَ پنچیں براسانی مجلس برجم اَت۔ شھباز ءَ گوشگ اَت رھشونانی پرمان ءَ ھڈتال وَ المی اِنت بلے اے پیم ءَ ھاکم ءَ زیات مے مھلوک ءَ تاوان رس اِیت۔ ما کُشگ ءُ بندی کنگ بئیں، انگت ایمنی ءَ کار کنگ ءَ پد نہ کنز ایں بلے مارا گِس ءِ مردمانی پکر کنگی اِنت، وت ءَ رکینگی اِنت ھاکم سک زالم ءُ زوراک اِنت۔
آئی ءَ ھبر دیم ءَ بران ءَ کمشنر رپیک گوشگ ءَ اَت، منی کار مھلوک ءِ جان ءُ مال ءِ رکینگ اِنت اگاں من چوشیں مردمانی ھمایت ءَ بہ کن آں کہ آ سوچگ ءُ پروشگ ءَ ھوار اَنت گڑا منی ڈیوٹی نہ مان اِیت۔
پیز چوشیں درستیں جیڑھاں پارلیمنٹ ءِ تہ ءَ باوست کنگ ءِ راہ ءَ سوج دیگ ءَ اَت ءُ گوشگ ءَ اَت سنگ ءُ سر میڑینگ نہ بنت راج باید سرپد بہ بیت۔ھمید پوج کشی ءِ ترس ءَ اَت ءُ مھلوک ءَ یک کش جار جنان ءَ گوشت اگاں ھاکم بلوٹ اَنت اے پوج زوراکی ءَ مئے کشاراں برباد کنت آس دنت۔ ما گژن ءَ مِریں۔ من نہ زاناں مئے زھگاں کے نان دنت؟ پنچیں براساں یک دومی ءِ پد ءَ ھمے پریشانی پدرا کرت ما اگاں راج ءَ رکینگ ءِ جھد ءَ شہ پد نہ کنز ایں بلے شما اے بزان اِت مئے لوگ نہ مان اَنت ھچ ھم پشت نہ کپ اِیت ما شما درست کُشگ ءُ گار کنگ بیں۔

تاں بازیں روچاں یکیں پیم ءَ باوست ءَ روان کرت مھلوک ءَ چِد ءَ دیم ءِ گپ اشکنگ لوٹ اِت بلے پنچیں براتاں ابید کس ءَ دگہ گپ نہ جت۔ مھلوک انوں روچ پہ روچ کم بھر زورگ ءَ اِت اَنت۔ ھرکس ءَ گشت بلے اے و ایشانی گِس ءِ جیڑہ اِنت ما وَ رَد وارتگ کہ درستیں راجی جیڑھانی آسر ھمے پنچیں براساں گون اِنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-