کیچ ءَ پوجی کاروان ءِ سر ءَ تراک، سوراب ءَ پُھل تباہ

بلوچستان ءِ دمگ کیچ ءِ ھند مند ءَ پوجی کاروان نشانگ کنگ بیتگ، وھدے کہ سوراب ءَ شال –کراچی شھدگ سر ءَ برجاہ یک مزنیں پُھلے تراک ءَ چہ تباہ کنگ ءِ ھال اِنت-

دمگی اِھوالکار ءِ رِد ءَ کیچ ءِ دمگ مند ءَ ریدیگ ءِ ھند سر ءَ یک تُرندیں تراکے ءِ توار اش کنگ بیتگ، چریشی ءَ پد دمگ ءَ تُرندیں تیرگواری ءِ توار ھم اش کنگ بیتگ- ھالانی رِد ءَ تراک ءَ پوجی کاروان ءَ ھوار یک گاڑی یے نشانگ کنگ بیتگ چریشی ءِ آسر ءَ گاڑی سرجمی ءَ تباہ بیتگ-

اِھوالکار ءِ گوشگ وئیل ءَ پد دمگ ءَ تیرگواری ءِ دْرچ برجاہ بیتگ، وھدے کہ جانی تاوان ءِ ھال ھم دیم ءَ اَتکگ- بلے بیرانی یا ٹپیانی کچ ءِ درگت ءَ تنی وھدے ھچ وڑیں ھال دیم ءَ نیتکگ-

دومی نیمگ ءَ سوراب ءِ دمگ مل شاھورائی ءَ شال –کراچی ھائی وے سر ءَ برجاہ دگہ یک پُھلے گوں تراکناکیں شووراں چہ تباہ کتگ-

دمگی اِھوالکار ءِ رِد ءَ تراک ءِ آسر ءَ پُھل ءَ سک تاوان رس اِتگ ءُ شھدگ سر ءَ گاڑیانی روگ ءُ آیگ سانمندی ءِ گمان اِنت-

اے وئیل انچیں وھدے ءَ دیم ءَ اَتکگ اَنت وھدے بلوچستان ءِ جتاجتائیں دمگاں سیکیورٹی ءِ ھمگرنچیں وئیلانی تہ ءَ گیشی گندگ آیگ ءَ اِنت- اے ماہ ءَ بلوچستان ءَ پوج ءِ کارندہ، پولیس ءُ گچین ءِ شھدگانی سر ءَ نشانگ کنگ بازیں وئیلی رپورٹ کنگ بیتگ اَنت-

ساوتھ ایشیا ٹیررازم پورٹل ءِ اوپن سورس ڈیٹا ءِ رِد ءَ جولائی 2026 ءَ بلوچستان ءَ 176 ءِ وئیل ریکارڈ کتگ اَنت آیانی تہ ءَ یکجاھی ھساب ءَ 438 مردم مرتگ، آیانی تہ ءَ 127 پوج ءِ کارندہ ھوار اَنت-

جنوری ءَ چہ جولائی 2026 ءِ میان ءَ بلوچستان ءَ 765 ءِ وئیلاں ءُ 1،600 نکش بیتگ- اُرشانی دروشم ھم مَٹ ءُ بدل ءَ گندگ بیتگ اَنت، آیانی تہ ءَ وتکش تراک، سنگر گریں اُرش، یکیں وھد ءَ بازیں جاھانی سر ءَ یکجاھی کاروائی، گچین ءِ شوربندیانی سر ءَ اُرش ءُ ڈرونز کارمرزی ھوار اَنت-