شال ءَ پوج ءِ دست ءَ آوار جنگ بیتگیں سئیں زالبول ھپتگے ءَ پد یل کنگ بیتگ انت، چہ کراچی ءَ سَے ورناہ بیگواہ

چہ شال ءَ زورانسری بیگواھی ءِ آماچیں زورانسری آوار جنی ءِ آماچیں سئیں زالبول شش اگست دوھزار ءُ بیست ءُ شش ءَ یل کنگ بیتگ انت-

گیشیں ھالانی رد ءَ 30 جولائی ءَ دوھزار ءُ بیست ءُ شش ءَ چہ شال ءِ دمگ کلی علاؤلدین شیخ عمر ءَ تانیہ ء جمعہ خان، جویریہ ء خیر اللہ ءُ رافعہ ء سعد اللہ پاکستانی لشکر ءَ دزگیر کنگ ءَ پد بیگواہ کتگ انت-

ھر سئیں زالبول یک ھپتگے ءَ بیگواہ کنگ ءَ پد شش اگست 2026 ءَ شال ءَ یل کنگ بیتگ-

زانگ بہ بیت بلوچستان ءَ داں انگت ءَ بازیں زالبول پاکستانی لشکر ءِ دست ءَ بیگواہ کنگ بیتگ انت-

ھمے وڑ ءَ چہ کراچی ماری پور ٹکری ءَ گوستگیں لھتے روچاں وھداں سَے مردم زورانسری بیگواھی ءِ ویل پیش اتکگ انت-

اھوالانی رد ءَ آوار جنگ بیتگینانی تہ ءَ 28 سالی ئیں صابر ء عزیز یک مزدورے ءُ ٹکری ماری پور کراچی ءِ جھمنند انت 6 اگست 2026 ءِ شپ ءِ ساھت ھشت ءُ سِی منٹ ءَ لوگ ءِ نزیک ءَ رینجرز ءِ کارندھاں آوار جتگ ءُ گون وت برتگ-

ھمے وڑ ءَ 30 سالی ئیں عبدالعزیز ء نور داد کہ مزدورے ءُ ٹکری ءِ جھمنند انت ءُ 7 اگست 2026 ءِ شپ ءِ ساھت دو ءَ چہ لوگ ءَ رینجرز ءَ دزگیر کتگ-

ھمے وڑ ءَ بیست ءُ ھشت سالی ئیں عامر ء عبدالواحد کہ یک دکاندارے 5 اگست دوھزار ءُ بیست ءُ شش ءَ کساس شپ ءِ ساھت ھشت ءَ رینجرز ءُ سی ٹی ڈی ءِ کارندھاں آوار جتگ ءُ برتگ-

کھول ءِ گوشگ انت آیانی آوار جنگ ءَ پد آیانی بارو ءَ ھچ وڑیں ھال ءُ اھوال دیم ءَ نیتکگ انت-