پنجگور ءِ تہ ءَ پاکستان ءِ کالونیل پالیسی۔
نبشتہ کار: کمبر بلوچ
دی بلوچستان پوسٹ
چوناھا کجام ھم ملک ءُ ھنداں کہ آجوئی ءِ جنز جنزگ ءَ بنت ، گڑا اود ءَ مارا کاونٹر انسرجنسی ءِ پالیسی گندگ ءَ کاینت چہ زوراک ءِ نیمگ ءَ۔ ھمے داب ءَ کہ مرچی بلوچستان ءِ توک ءَ آجوئی ءِ جنزے جنزگ ءَ اِنت گڑا ما گندیں کہ بلوچستان ءِ ھمک ھند ءُ دمگاں زوراکیں پاکستان ءِ کاونٹر انسرجنسی پالیسی بے جنزگ ءَ ھست اِنت۔ ھمے ھساب ءَ ما بلوچستان ءِ دمگ پنجگور ءَ ھمے کاونٹر انسرجنسی پالیسیاں چاریں کہ چہ داب ءَ جنزگ ءَ ھست اَنت۔ وھدے ما گندیں کہ جنز ءُ جنگ ءِ تہ ءَ تینزی ءُ شدت اتکگ گڑا زوراک ءَ بے وتی پالیسیانی تہ ءَ مٹی ءَ ھوار تینزی اوں آؤرتگ ۔ آ پالیسی ھارڈ ءُ سوفٹ پالیسیانی دروشم ءَ اِنت۔ مرچی پنجگور ءِ وانگجاہ آ توری شاھدربرجاہ بہ بنت ، یا اسکول ءُ کالج بہ بنت ، ما گندیں کہ یک شل ءَ زوراکیں پوج ءِ دزمانجنی ھست اِنت ۔ دومی اسٹکیر پالیسی پہ باڈر ءِ واستا کہ مھلوک ءَ یکجاہ کن مراگش اڈ بدے ءُ اسٹیکر بھر ءُ بانگ بکن۔ سیمی پرواز نامیں فاونڈیشن ءِ کہ ھمک مردم ءَ وتی زمہ ءُ زرّی کمک بکن کہ آہدکان ءُ مارکیٹ پچ بکن اَنت ءُ روزگار بکن اَنت ءُ رسانکدر ءُ اے پروگراماں شنگ ءُ تالان کنگ۔ چارمی نام نھادیں کچیری کہ پوج کمانڈنٹ گوں وتی دلاراں کیت ءُ کچیری اڈ دنت کہ ما مھلوک ءِ جیڑہاں گیش ءُ گیوار کنیں۔ اے سرجم ءَ سوفٹ پالیسی اَنت زوراکیں پاکستان ءِ پنجگور ءِ تہ ءَ ۔ ھمد ءَ دومی نیمگ ءَ ھمک روچ مردماں گار ءُ بیگواہ بکن ءُ تیر سپتگیں جوناں دور بدے۔ اے سرجمیں پالیسیاں ما دیم ءَ دلجمی ءَ بیان کنیں ۔ متلب جنز ءِ کاونٹر کنگ ءِ واستا سرجم ءَ سرکار ءُ وتی چن ءُ لانچ کرتگ ءُ پندل سازی ءَ اِنت۔
پیسر ءَ پنجگور ءِ تہ ءَ سرکار ءِ نیمگ ءَ ھچ اے وڑیں پالیسی دیم ءَ گندگ نیتکگ ۔ ناں اد ءَ کچیری بوتگ ، ناں اد ءَ ترانکاری مراگش ءُ انئام بوتگ ، ناں اد ءَ بزگ ءُ جنوزاماں ٹوکن ءُ اسٹیکر دیگ بوتگ ، ناں اد ءَ زمین داراں کمک کنگ بوتگ ۔ بلے مرچی کہ جنز ءُ جنگ ءِ تہ ءَ ترندی اتکگ ، مرچیگیں جنگ ءَ دژمن سرین پروش کرتگ ، دژمن انچوش بے وس ءُ لاچار کرتگ کہ آ مرچی وڈ وڑیں پالیسی ءُ آسراتی پہ لس بلوچ ءَ آرگ ءَ اِنت ، آ راہ ناں پہ بلوچ ءَ ھمدردی ھست ناں کہ بلوچ ءِ پکر ءِ ھست ، آ راہ دیگ ءَ ھچ مکسد ءُ گرزے نیست ، ابید ء ایشی ءَ کہ بلوچ چہ وتی جنگ ، جنز ، زمین ، پجار ، راجی زمہ واریاں چہ دارگی اَنت ۔ آئی ءِ کر ءَ تھنا ھمیش راہ پشت کپتگ ، اے کاونٹر انسرجنسی پالیسی آؤرتگ اَنت ئِے۔
انچوش کہ من پیسر ءَ گپ گُشتگ اَت کہ پنجگور ءِ وانگجاہ سرجم کمانڈنٹ ءِ دست ءَ اِنت۔ ما گندیں کہ یوت اینگیجمنٹ پالیسی ءِ تھت ءَ ھمک روچ مکران شاھدربرجاہ ءَ وڑ وڑیں مراگش اڈ دیگ بیگ ءَ اَنت ۔ ھمے داب کالج ءُ اسکول اَنت ۔ روچ لیپ ٹاپ ءِ بھر کنگ ءَ اَنت ، روچے ترانے مکابلہ اَنت ءُ زرّی انئام دیگ بیت ، روچے ایگزیبشن اِنت ، روچے کمپیوٹر اسکل پروگرام اِنت ، روچے پاکستان ءِ راجی روچانی نام ءُ روچ ءِ جناح ءُ اقبال ءِ نام تران کاری مراگش اِنت ۔ متلب اے سرجمیں مراگشاں اڈ دیگ ءِ مول ءُ مراد نودربراں وتی نیمگ ءَ مشکول کنگ ۔ اے چیز ھمد ءَ پدر بیت کہ شاھدربرجاہ ءِ تہ ءَ اینکس مراگش ءَ جاہ ھست بلے بساک ءِ وڑیں نودربر ادارہ ءِ کہ وانگی ننداکے اڈ دنت آ دارگ بیت ءُ پاتراپ ءُ بیھار دیگ بیت کہ اے وڑیں ننداک مکن ۔ اے سرجمیں کارانی مکسد لس نودربر ءَ چہ وتی راجی گلامی ، راجی زمہ واری ءُ جنز ءَ چہ دور دارگ ءِ ھاتر ءَ بیگ ءَ اِنت ۔ اے پالیسی پہ نودربرانی واستا اَت ۔ بیا اِت دیم ءَ چاریں کہ لس مھلوک ءِ چوں گوں وت ءَ برتگ۔ پنجگور ءِ انوگیں کماندنٹ کہ ظفر اقبال ءِ آئی ءِ نوکیں فاونڈیشنے پچ کتگ ءُ وتی دلاراں داتگ ۔ ایشی ءِ کار ایش اِنت کہ لس مھلوک ءُ دکان پچ کن ءُ بدے ، کسے ءِ نادراہ ءِ الاج ءِ واستا زرّی کمک بکن ۔ شش ءُ ھپت ماہ بیت کہ اے کار گوں تینزی ءَ جنزگ ءَ اِنت ۔ متلب لس مھلوک ءَ اے باور کنائینگ کہ من شمئے گموار ءُ کمکاراں۔ توری دومی نیمگ ءَ ھمک روچ مھلوک ءِ چکاں بیگواہ کن ءُ تیر سپتگیں جوناں دور بدے بلے مھلوک ھچ سما ءَ نہ اِنت ، انچوش گوں وت ءَ مشکول ئِے کتگ ۔ ھمے فاونڈیشن ءِ تھت ءَ مھلوک ءَ مشین ءُ سولر بدے پہ زمین داری ءَ ، متلب اینچو بزگی ءُ اینچو زر ھرچ کنگ ، اے چیز وَ پدر اِنت کہ مپت ءَ اینچو ھرچ کنگ وَ نکنت ۔ مکسد ھست اِنت ، آ مکسد مھلوک ءَ چہ وت ءَ بے ھیال کنگ کہ آ کے اِنت ، آئی ءِ کار ءُ زمہ واری چی اَنت ، آئی ءِ آجوئی ءَ جنزے جنزگ ءَ اِنت ، سر ندر بوگ ءَ اَنت ، بلے مھلوک ءَ انچوش وتی پندلانی تہ ءَ بے سما کرتگ کہ آ راہ گوں ھچ ءَ کار نیست ، درست چیز برابر اَنت ۔ ھمے داب ءَ مراگش اڈ بدے ءُ مھلوک ءَ اسٹیکر ءُ ٹوکن بدے کہ من شمارا روزگار دیگ ءَ آں ۔ نام نھادیں کچیری ءِ پالیسی ءِ زوراک ءَ آؤرتگ ۔ ھمک دو یا سے ماہ ءِ سر ءَ کچیری اڈ بدے گوں وتی ھمکوپگیں دلاراں کہ من مھلوک ءِ جیڑھاں گوش دارین ءُ ایشی ءَ ھلاس کنگ ءِ جھد ءَ کنیں ۔ دومی نیمگ ءَ ھمک روچ لاش دور بدے کہ مھلوک ترس ءُ بیم ءِ آماچ بہ بیت ءُ زوراکیں پاکستان ءِ ھلاپ ءَ ھچ سر مکش اِیت ۔ اگاں ما سرجم ءَ اے پالیسی ءَ شیھمیں دابے بچاریں گڑا ھمے سما بیت کہ زوراکیں پاکستان چو مات ءِ دروشم ءَ سافٹ پالیسی کارمرزگ ءَ اِنت بلے جاھے تو گند ئے کہ مات ءِ ناں بلکیں ماتوے گوں وتی یارڈ پالیسیاں۔
نوں اے پالیسیانی بیگیری ءَ لھتیں زمہ واری ھست اِنت ۔ سرپدیں نودربر ، نودربر ادارہ ، ماس پارٹی ، استاداں ، اے دوراں آیاں اے ڈُبہ وتی کوپگاں زورگی اِنت ۔ لس نودربر ءُ لس مھلوک سرپد کنگی اِنت ۔ کالج ءُ شاھدربرجاہ بہ بیت ، یا دگہ ھند ءُ دمگ بہ بنت سرجمیں لس مھلوک سرپد کنگی اِنت کہ اے پالیسی مئے ءُ شمئے ادارکی وشی بوت کن اَنت بلے ابدی ناں۔ بوت کنت پہ لیپ ٹاپ ءَ یک نودربر ادارکی وشی مھسوس کنت کہ آئی ءِ وانگی کمکے بوتگ ، بوت کنت پہ مشین ءُ سولراں یک زمین دارے ادارکی گل ءُ شادان بیت کہ آئی ءِ کسانیں جیڑہ ءِ ھل بوتگ ، بوت کنت پہ اسٹیکر ءُ ٹوکن ءِ آ یک جنوزامے گل بیت کہ منی چُکانی دو وھد ءِ ورگ در کیت ، بوت کنت چہ پرواز فاونڈیشن ءِ کمک ءَ یک دکاندارے گل بیت کہ من ءَ کمے مسات بوتگ کہ وتی کار ءُ بار ءَ جنز ایں ، بوت کنت پہ کچیری ءِ اڈ دیگ ءَ لس مھلوک وشی سما کنت کہ مئے جیڑہ گوشدارگ بنت ، بلے یک چیزے کہ اے کُلانی تہ ءَ یکے آ گلامی اِنت ۔ لس مھلوک ءِ سما ءَ اے آرگی اِنت کہ اے گلامی اِنت کہ پہ دو وھد ءِ نان ءَ تو آئی ءِ چمدار ئے، ترا اسٹیکر دیوک ھمیش اِنت کہ ترا جنوزام ئِے کتگ ، ترا سولر ءُ مشین دیوک ھمیش اِنت کہ ترا پہ دو وھد ءِ نان ءِ چمدار ئِے کتگ ، ترا لیپ ٹاپ دیوک ھمیش اِنت کہ تئی ھند ءِ داتگیں شاھدربرجاھاں روت لاھور ءُ پنڈی بند اِیت ۔ اے کُل جیڑہ راج ءَ راہ سرپد کنگی اِنت ۔ ماس پارٹی ءُ نودربر ادارہاں مراگش اڈ دیگی اِنت ءُ زوراک ءِ پندل پاشک کنگی اَنت ۔ لس مھلوک اے سرپد کنگی اِنت کہ ترا ایشی ءِ کچیری ، اسٹیکر ءِ بھر ءُ بانگ ءِ مراگشاں دیگی نہ اِنت ، لس نودربر سرپد کنگی اَنت کہ ترا پہ چار کلدار ءِ انئام ءُ لیپ ٹاپ ءِ آ آئی ءِ چمدار بوگی نہ اِنت ۔ اے کلیں مراگش کہ بوگ ءَ اِنت ، اے مرچی جنز ءُ جنگ ءِ ترندی اِنت کہ زوراک ءِ ھمے کچ ءَ ناوس کرتگ کہ آ نوں کیت ءُ وڑ وڑیں مراگش اڈ دنت کہ من شمارا آسراتی دے ایں ۔ راستی ءَ اے آسراتی نہ اِنت بلکیں لس بلوچ ءَ چہ وتی جنز ، جنگ ، راجی زمہ واریاں دور دارگ ءِ جھد ءَ اِنت۔
گڈی ءَ اے سرجمیں پالیسی شھیمیں دابے ءَ چارگی اَنت ، ایشانی سر ءَ نبشتہ کنگ بہ بیت ، ڈاکیومنٹری کنگ بہ بیت ، سیشن ءُ مراگش اڈ دیگ بہ بیت ، لس مھلوک ءِ گوم ءَ نندگ ءُ اے جیڑھانی سر ءَ باوست کنگ بہ بیت ۔ دنیا ھر دمگ ءَ کہ زوراکے اتکگ گڑا آئی ءَ ھمے وڑ ءُ داب ءَ کارمرز کرتگ ۔ اے چیز ءَ ما ءُ شما بزانیں کہ آ کہ تئی لوٹگ ءُ وارگ اتکگ ، تئی نسل کشی ءَ اتکگ ، پہ تئی مادنانی لوٹگ ءَ اتکگ ، آ راہ پرتو ھچ وڑیں ھمدردی یے نیست ، ناں کہ آ راہ تئی ، شد لاپی ، بزگی ، بے وانندگی ءِ پرواہ ھست ۔ ناں کہ آ راہ مرگ ءِ پرواہ ھست ۔ نوں راج ءَ راہ سرپد بوگی اِنت کہ اے دررست پالیسیانی مول ءُ مراد مارا وتی ،زمین ، پجار ، جنز ، جنگ ، راجی زمہ واریاں چہ درست دارگ ءَ اَنت ۔ اے سرجمیں کاونٹر انسرجنسی پالیسی اَنت ءُ ھچ بلوچ ءَ اے پالیسیانی ھمراہ بوگی نہ اِنت ، اے دابیں مراگشاں بائیکاٹ کنگی اِنت، روگی نہ اِنت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-