بلوچستان ءِ دمگ ھُزدار ءُ کیچ ءَ مروچی جتاجتائیں وئیلانی ھال دیم ءَ اَتکگ اَنت- ھُزدار ءِ دمگ زیدی ءَ ڈیتھ اسکواڈ ءَ چہ ھمگرنچیں کارندہ اُرش ءِ نشانگ کتگ اَنت، چریشی ءِ آسر ءَ کم چہ کم پنچ مردم ءِ بیرانی ءِ ھال اِنت-
دومی نیمگ ءَ کیچ ءِ دمگ گیبن ءُ کلاتک ءَ پاکستانی پوج ءِ جھلی ءُ بُرزی کاروائیانی ھال اِنت- اود ءَ سُھب ءَ چہ تُرندیں تراکانی توار اش کنگ بیتگ اَنت-
اِھوالکار ءِ رِد ءَ ھُزدار زیدی ءَ پوج ءِ دہ ءَ چہ گیش گاڑیانی ھمگرنچیں یک کاروانے اُرش ءِ نشانگ کنگ بیتگ، چریشی ءِ آسر ءَ دو گاڑی تچکی ءَ تاوان رس اِتگ ءُ جانی تاوان ءِ ھال اِنت-
ھمے وڑ کیچ ءِ دمگ گیبن ءُ کلاتک ءَ دمگی اِھوالکار ءِ گوشگ اِنت کہ گوستگیں شپ ءَ چہ مزنیں کچے ءَ پاکستانی پوج دمگ ءِ نیمگ ءَ پیشگامی کنگ ءَ اِنت وھدے کہ پوج ءِ واستا توژگ، آپ ءُ دگہ زرورتیں سامان گاڑیانی سر ءَ برگ ءَ اَنت-
اے وئیلانی درگت ءَ سرکاری واکدار نیمگ ءَ تنی وھدے ھچ وڑیں درشان دیم ءَ نیتکگ-