کراچی ءُ بلوچستان ءِ جتاجتائیں دمگ لسبیلہ ءُ مستونگ ءَ کماشے ءَ ھوار چار مردم آوار جنگ ءُ بیگواہ کتگ اَنت-
بلوچستان ءِ دمگ چہ بیلہ کراس ءَ ھیبتان ء مالو مری جھمنند بیلہ ءَ نُھ جولائی 2026 ءَ پاکستانی پوج ءَ آوار جنگ ءَ پد بیگواہ کتگ-
کھول ءِ رِد ءَ ھیبتان مری ءَ بیلہ کراس ءِ ھند ءَ چہ پوج ءَ آوار جتگ ءُ بیگواہ کتگ-
ھمے وڑ مستونگ ءِ دمگ سراوان ٹاؤن ءِ جھمنندیں بیست سالی ئیں کفایت اللہ بلوچ ء سفر خان بلوچ دہ جون 2026 ءَ چہ منگچر ، کلات ءَ بیگواہ کتگ- کھول ءِ رِد ءَ کفایت اللہ بلوچ دکاندارے ءُ آ فرنٹیئر کور (ایف سی) ءَ آوار جتگ ءُ بیگواہ کتگ-
دومی نیمگ ءَ کراچی ءِ دمگ حاجی شاہ علی گوٹھ، شرافی ملیر ءِ جھمنند بیست ءُ چار سالی ئیں یونس بلوچ ء انور بلوچ بیست ءُ نُھ جولائی 2026 ءِ شپ ءِ کساس دہ ءَ ٹنڈو اللہ یار ءِ دمگ چہ ابراھیم شاہ پولٹری فارم ءَ بیگواہ کتگ – کھول ءِ رِد ءَ یونس بلوچ یک دھکنکارے ءُ آ کاؤنٹر ٹیررازم ڈیپارنمنٹ ءَ آوار جتگ ءُ بیگواہ کتگ-
دومی وئیل کراچی ءِ دمگ حاجی شیڈول گوٹھ، ملیر نمبر ھشت ءِ جھمنندیں سی ءُ پنچ سالی ئیں عبدالمجید ء حاجی غلام محمد بیست ءُ نُھ جولائی 2026 ءِ شپ ءِ کساس دہ ءُ نیم ءَ چہ شھدگ بھٹو کراچی ءَ بیگواہ کتگ- کھول ءِ رِد ءَ عبدالمجید ءَ پلمبر کار کتگ ءُ کار ءَ چہ واتری ءَ آ رینجرز کارندھاں آوار جتگ-
چریشی ءَ پد آیانی درگت ءَ ھچ وڑیں ھال دیم ءَ نیتکگ-