بلوچستان ءِ بنجاھی شھر شال ءِ نزیک ءَ سلاھبندیں ترندیں اُرشے ءَ پاکستانی لشکر ءِ دو پوسٹ سرجمی ءَ کنٹرول کتگ اَنت ءُ اود ءَ سلاہ ءُ گولہ بارود گپت ءُ پوسٹ آتش کُت اَنت۔
اے وئیل گوستگیں روچ ءِ بیگاہ ءَ بوتگ کہ اود ءَ مزنیں کساسے ءَ سلاہ بندیں مردماں یکیں وھد ءَ ولی تنگی (زرغون گر) ءُ اسپان کاریز ءَ پاکستانی لشکر ءِ دو پوسٹانی سر ءَ اُرش کتگ۔
داں مزنیں وھدے ءَ دمگ ءَ مزنیں تیرگواری ءُ تراک برجاہ بوتگ اَنت۔ سلاہبنداں دوئیں پوسٹ کنٹرول کتگ انت ءُ اود ءِ سرجمیں جنگی سامان ءُ سلاہ گپتگ انت۔
ھالانی رد ءَ اے اُرش ءَ سیزدہ ءَ چہ گیش فورس ءِ کارندہ بیران ءُ بازیں ٹپیگ بوتگ انت۔ واکداراں اُرش ءِ ھال راست کتگ ءُ چار بیران بوتگیں کارندھانی پجار پدر کتگ کہ ایشی ءِ تہ ءَ نائب صبیدار اول خان، نائیک نور بخش، سپاہی سمیع اللہ، سپاہی رفیق ھوار اَنت ءُ سئے کارندہ بیگواہ اَنت-