سب الٹرن کلاس ءِ لیکہ ءُ بلوچ زرمبشت
نبشتہ کار : یاسر باران
دی بلوچستان پوسٹ
سیمی ءُ گڈی بھر
سب الٹرن کلاس ءُ بلوچ زالبول
زورگیر سان تھنا دود ءُ ربیدگ، چاگرد ءُ زبان ءَ تاں برجا نہ اَنت بلکیں زالبولانی سر ءَ ھم آئی ءِ سان کپ اَنت ۔ زورگیر مدام اے جھد ءَ کنت کہ زالبول گِس ءِ تہ ءَ بہ بیت ءُ زرمبشت ءِ بھر مہ بیت، وتی بنکی ھکاں پد مہ جنت، وتی راجدپتر ءَ چہ پدمنتگ بہ بیت، چہ وتی بامرداں شموشکار بہ بیت، زورگیر مدام ایردستیں تبکہ ءِ دود ءُ دودماناں جھل لیک اِیت ءُ بلوچ راجمان ءِ تہ ءَ زورگیر ءِ اے سان ملائیت ءِ دروشم ءَ اَنت ءُ بلوچ راجمان ءِ تہ ءَ زالبولانی سر ءَ اے مزنیں کچے ءَ سانمند اَنت ، چوشکہ بلوچ زالبول بازیں کچے ءَ چہ وانگ ءَ دارگ بیتگ، بلوچ زالبولانی سیاسی چست ایر ءِ سر ءَ بندش جنگ بوتگ، بلوچ زالبول سب الٹرن ءِ انتھاں ءَ آؤرتگ ءُ سر کتگ، اے درست زورگیر ءِ سازتگیں پندل اَنت، پرچاکہ بلوچ راجمان ءِ تہ ءَ زالبول ءِ سر ءَ ھچ چشیں بندشے نہ بوتگ، بلوچ ءِ یازدہ ھزار سالی گوستانک اے چیز ءِ شاھدی ءَ دنت، بلوچ گوستانگ ءِ بندپتر ءَ زالبول مدام شیرزال ءِ نام ءَ زانگ بیتگ۔
وھدے کہ دری زورگیر کئیت گڑا آ زالبول ءِ گوستانک ءَ مسخ کنت ءُ وتی narrative build ءَ کنت، بلے وھدے گوزگ ءَ پد انچیں شیرزالیں زالبول کاینت کہ آ زورگیریں ریاست ءِ زورگیر ءَ پروش دے اَنت ءُ زالبول ءَ وت واجھی ءِ راہ ءَ پرّین اَنت ۔ آ زالبول ءَ وتی گوستانک ءِ پد جنگ ءِ سکین دے اَنت، چوش کہ لمہ بانک بلوچ چاگرد ءِ تہ ءَ (لمہ بانک) ءِ بلاھیں کردے زانگ بیت ۔
بلوچ آجوئی ءِ زرمبشت ءَ لمہ بانک ھما باکردیں زالبول ایں کہ آئی ءَ بلوچ ءِ ھمک زالبول ھمے درونت داتگ کہ object چی ئے ءُ ؟ subject نیمگ گام جنگی ءِ اِنت ۔
بلوچ زالبول ءَ سب الٹرن کنگ ءِ ھاتر ءَ ریاست ءَ وتی سرجمیں زور کارمرز کتگ، بازیں جاھاں ریاست سوب مند ھم بوتگ بلے وھدیکہ سال دوھزار پنچ ءَ کریمہ کئیت گڑا آ ریاست ءِ اے ساز اتگیں گپچل ءَ پروش دنت ءُ بلوچ زالبول ءَ ایردست ءِ بگیری ءِ گھگیری ءِ چیدگ جوڑ کنت ، بلوچ نودربرانی رھُشونی ل ءَ کنت ءُ بلوچ جھد ءِ اندرءَ یک چیدگے نکش کنت، آ بلوچ زالبولاں چہ کُوچگاں در کنت ءُ شھر ءَ سر کنت، مروچی کہ بلوچ زالبول object چہ subject نیمگ ءَ وتی کرتنی کرد ءِ نیمگ ءَ سپر کنگ ءَ اِنت گڑا اے بانک ءِ رنگیں کارستے ءِ شپ روچ کرتنی جھد ءِ مُز اِنت کہ مروچی بلوچ زالبول تھنا یک گس ءِ تہ ءَ مھدود نہ اَنت ، یک فلیٹ فارم ءَ تاں مھدود نہ اَنت، بلکیں جھد ءِ ھمک تک ءُ پھناتاں سر اِنت ۔ کسے کربانی دیگ ءَ اِنت ، کسے سپارتکاری کنگ ءَ اِنت، کسے چاگردی ترامجاھاں وتی مردمانی گوانک اِنت ءُ کسے زھرشانی ءِ کنگ ءَ اِنت ۔
مروچی بلوچ زالبول ءِ جھد ءِ تہ ءَ بھر زورگ ءَ اے پدر کتگ کہ زالبول تھنا گس ءِ زینت نہ اَنت بلکیں آجوئی جھد ءِ روکیں چراگے ءِ مانند اَنت کہ ھمک راہ ءِ سر ءَ کندیل ءَ بلان اَنت ۔
مروچی پد ءَ بلوچ زالبول ءِ جھد یازدہ ھزار سالی گوستانک ءِ سھرائی ءَ کنگ ءَ اَنت ۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-