سیاست ءُ مسلح جنگ ءِ پجّار
نبشتہ کار: زربار بلوچ
دی بلوچستان پوسٹ
انسانی راجدپتر ءَ پٹ ءُ پول بکن ئے گڑا سرپد بہ ئے کہ سیاست ءُ مسلح جنگ یکے چہ دومی ءَ سرجم ءَ جتا کنگ نہ بنت، لس لیکہ ایش اِنت کہ سیاست گپ ءُ تران کانود سازی ءُ اقتدار ءِ امن ءُ ایمانی ءَ گوں کارمرز کنگ ءِ نام اِنت ءُ جنگ زور ءِ وسیلہ ءَ وتی مکسد ءَ سرجم کنگ ءِ جھد اِنت، سیاست بنیادی ھوالہ ءَ پائدگ مال ءُ مڈی ءُ اقدار ءِ کنگ ءِ اَمل اِنت ، وھدے کہ جتا جتائیں گل ، ریاست یہ زرمشتانی پائدگ یکے دومی ءَ گوں اڈ اَنت ءُ سیاسی وسیلہ جیڑہ ءِ گیش ءُ گیوار ءَ بے سوب بنت گڑا اے جیڑہ سلاہ بندیں رنگے زور اَنت بلے سیاست جنگ ءِ بندات ءَ پد ھم ھلاس نہ بیت، سُھل یکجاھی جوڑ کنگ لس مھلوک ءِ ھمراہ داری ءِ ھاتر ءَ جھد ءُ سپارتی کار جنگ ءِ وھد ءَ ھم برجاہ مان اَنت ، ما گشت کنیں کہ سیاست ءُ سلاہ بندیں جنگ یکیں جیڑہ ءِ دو جتا جتائیں تب ءُ مَیل اَنت مشھوریں پوجی کاروان کلاوزویتز (carl von Clausewitz) جنگ ءَ سیاست ءِ تسلسل ءِ لیک اِتگ ، آئی ءِ رِد ءَ جنگ ءِ مکسد ایوک ءَ جنگ ءِ پڑ ءَ سوبمندی ءِ رسگ نہ اِنت بلکیں سیاسی مول ءُ مرادانی ھم سرجم کنگ اِنت ھمے سوب اِنت کہ جنگی سوبمندی ءِ ھکیکی ایمیت ھم ھما وھد ءَ پدّر بنت کہ آ سیاسی آسراں سر کنگ بنت، ءُ اگاں یک ملکے ءِ یا زرمبشتے ءِ یک نیمگے بزاں کہ جنگی ھوالہ ءَ مھکم بہ بیت بلے سیاسی مول ءُ مراداں پیلو کت مہ کنت گڑا اے وڑیں سوبمندی نا سرجم لیکگ بیت۔
راجدپتر ءِ تہ ءَ چوشیں درور ھست اَنت کہ اود ءَ مسلح جنگ ءُ سیاست یک برابر ءَ کارمرز بوتگ اَنت ءُ انگت ءَ بوگ ءَ اَنت ، ویتنام وار ءِ میان ءَ سکیں زوریں جنگ ءَ ھوار مزاکرات ءِ سلسلہ برجاہ دارگ بنت،ھمے وڑ ءَ Afghanistan war ءِ وھداں جنگی چست ءُ ایراں ھوار سیاسی سُھل ھم بوتگ اَنت انوگیں وھد ءَ Russia- Ukrain war ءُ ایران امریکہ ءِ جنگ ھم اے ھکیکت ءِ مسال اِنت کہ جنگ ءِ میان ءَ سپارتی ءُ سیاسی چست ءُ ایر سرجم ءَ ھلاس کنگ نہ بوتگ اَنت۔
یک راج ءِ آجوئی ءَ سیاست ءُ سلاہ بندیں جنگ ءِ کِرد
جھان ءِ راجدپتر اے گپ ءِ گواہ اِنت کہ آجوئی راجاں سوگات ءِ دروشم ءَ دیگ نہ بوتگ بلکیں ایشی ءِ رسگ ءِ واستا دراجیں جھد کربانی ءُ یک نہ اوشتوکیں زرمبشتے لوٹ اِیت، وھدے یک راجے گلام ءُ دری تاگت ءِ پادانی چیر ءَ لگتمال کنگ بیت ءُ بُنوکی ھکّاں چہ زبھر کنگ بیت، گڑا آ پہ وتی آجوئی ءُ وتی زمین ءِ وت واجہ بوگ ءِ ھاتر ءَ بازیں در ءُ وسیلھے پہ وت پول اِیت ، سیاست ءُ جنگ ھمے وسیلھانی تہ ءَ دو ھاسیں وسیلہ اَنت ۔بازیں جنزانی تہ ءَ راج سیاسی جد ءُجھد ءِ سپارتکاری ءُ راجی سرپدی ءَ چہ وتی آجوئی ءَ گر اَنت لھتیں جنز سلاہ بندیں گھگیری ءِ راہ ءَ گر اَنت بلے گیشتر جارواں اے دوئیں راہ گوں یکے دومی ءِ برابری ءَ جنز اَنت پمیشکا یک راجے ءَ را وتی آجوئی سر بوگ ءِ واستا سیاست ءُ جنگ دوئیناں سرپد بوگ المی اِنت۔
آجوئی جنز ءِ تہ ءَ سیاست ءِ اھمیت:
سیاسی جد ءُ جھد ھرچ راجی زرمبش ءِ بُنھشت اِنت سیاست ھما وسیلہ اِنت کہ یک راجے وتی لوٹاں یک مھکمیں شکلے دنت وتی پجار ءَ پدر کنت ءُ راج ءَ پہ یک وت ماں وتی مکسد ءِ واستا یکجا کنت،سیاسی رھشون وتی راج ءَ سرپد کنت کہ آجوئی پرچا المی اِنت ءُ آجوئی ءِ رسگ ءَ پد چاگرد کجام نیمگ ءَ رھادگ بیت،آجوئی ءِ راجدپتر ایوک ءَ گوں جزباتاں سوبمند نہ بیت بلکیں یک ھاسیں سیاسی نظریہ تنظیم ءُ حکمت عملی ءِ لوٹ اِیت ، سیاسی جد ءُ جھد ءِ مستریں مکسد ایش انت کہ آ راج ءِ تہ ءَ شئور ودیگ کنت ، راج ءَ یکجاہ کنت ،میاں استمانی کمک ءِ گرگ ءُ دژمن ءِ سیاسی موکپ ءَ چیلنج کنت، آجوئی ءِ لوٹ ءِ کانودی ءُ اکلاکی جواز پیداک کنگ
آجوئی ءِ جُنز ءَ مسلح جنگ:
راجدپتر ءِ تہ ءَ چوشیں بازیں درور ھست اَنت کہ راجی زرمبشتانی تہ ءَ راجانی سیاسی لوٹ مدام لگتمال کنگ بوتگ اَنت بُنوکی ھکاں چہ زبھر کنگ بوتگ اَنت یا کہ امن ءِ راہ ءُ در بند کنگ بوتگ اَنت گڑا اے وڑیں جاوراں راجاں مسلح جنگ ءِ سر ءَ زور داتگ، مسلح جنگ ءِ راہ ءَ یک راجے وتی آجوئی ءَ گوں گپ ءُ تران ءَ ناں بلکیں جنگ ءِ تریکہ سرجم کنگ لوٹ اِیت، ایشی مکسد دری تاگت ءِ سر ءَ زور دیگ ءُ اے پیشدارگ اِنت کہ راج تھی گلامی ءِ منگ ءَ تیار نہ اَنت، سلاہ بندیں جھد ءِ مکسد راجی گھگیری ءَ املی شگل ءِ دیگ دشمن ءِ تاگت ءَ چیلنج کنگ ، میان استمانی دلگوش ءَ گوں وت کنگ ءُ لس مھلوک ءِ تہ ءَ کربانی ءِ جزبگ ودیگ کنگ۔
آسر :سیاست زند ءِ ھرچ پڑ ءِ تہ ءَ ھوار اِنت سیاست چاگرد ءِ دیم ءَ برگ ءِ یک وسیلھے ، سیاست ءِ وسیلہ ملک جوڑ کنگ بنت ملکانی تہ ءَ ھکومت جوڑ کنگ ءُ پروشگ بنت اگاں گوں ارزانیں گالاں بگشاں سیاست ھما ھمل اِنت کہ آئی ءِ وسیلہ یا چاگرد ءِ دیم ءَ برگ پیسلہ کنگ بنت، ءُ جنگ مدام دو یا کہ دو ءَ چہ گیش ملکانی درمیان ءَ بیت اِنت ءُ گیشتر وھداں اختلاف ، زمین، تاکت یا کہ ھکّانی نہ رسگ ءِ بنت اِنت ، جنگ ھما ھالات اِنت کہ جیڑہ گپ ءُ تران ءِ بدل ءَ گوں تپنگ ءَ ھل کنگ بنت ءُ سیاست ھما ھالات اِنت کہ جیڑہ گوں گپ ءُ تران ءَ شر کنگ بنت، اگاں ما راجدپتر ءَ چمشانکے بدے ایں گڑا ما گندیں کہ ھرچ راجے کہ وتی آجوئی ءِ واستا جھد کتگ ءُ آجوئی گپتگ گڑا آ جھدانی تہ ءَ سیاست ءُ مسلح جنگ دوئیں برابر کارمرز بوتگ اَنت، یا ھما راج کہ وتی آجوئی ءِ واستا جھد کنگ ءَ اَنت اے جھدانی تہ ءَ ھم سیاست ءُ مسلح جنگ برابر کارمرز بوگ ءَ اَنت انچوش کہ بلوچ جھد ءِ آجوئی اِنت، ھرچ جھد ءِ تہ ءَ سیاست ءُ مسلح جنگ دو parallel شے اَنت ما سیاست ءَ ءُ مسلح جنگ ءَ چہ یک دومی ءَ جتا کُت نکن ایں۔ بلوچ جنز ءِ تہ ءَ اولی روچ ءَ بگر دانکہ مروچی ءَ سیاست سک ءَ شوکیں وڑے ءَ کارمرز بوگ ءَ اِنت ءُ سلاہ بندیں جنگ ھم وتی آسراں سر اَنت مرچی سیاست ءِ وسیلہ ءَ راج ءِ تہ ءَ شئور پیداک کتگ۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-