بلوچستان ءِ دمگ کیچ ءِ ھند تربت ءَ یک زالبولے ءِ دزگیر کنگ ءَ پد ناشناسیں جاھے ءَ برگ ھال اِنت-
دمگی اِھوالکار ءِ رِد ءَ نامی ئیں بلوچ کسھہ نبشتہ کار ڈاکٹر حنیف شریف ءِ گھار سید بی بی مروچی تربت ءِ دمگ چہ شاھی تمپ ءَ کاؤنٹر ٹیررازم ڈیپارنمنٹ (سی ٹی ڈی) ءِ کارندھاں دزگیر کتگ – ھالانی رِد ءَ دزگیری ءَ پد آ ناشناسیں جاھے ءَ برتگ-
بلے اے درگت ءَ سرکاری ھساب ءَ ھچ وڑیں درشان دیم ءَ نیتکگ-
اے وئیل انچیں وھدے ءَ دیم ءَ اتکگ وھدے بلوچ یکجھتی کمیٹی ءَ وتی راھشونانی داتگیں اُمر بندیگیں سزا ءِ ھلاپ ءَ باندا تربت ءَ زھرشانی روانکے کشگ ءِ جار جتگ- گل ءِ نیمگ ءَ چہ زھرشانی روانک ءَ کارکنانی ءُ شھریاں چہ ھمگرنچ ءِ دزبندی ھم کتگ-
دومی نیمگ، گمانی زھرشانی ءِ پُشدر ءَ تربت پولیس ءَ کیچ ءَ 144 جتگ – واکدار ءِ رِد ءَ 144 ءِ بُنیاد ءَ راجی مُچی، روانک ءُ زھرشانیانی سر ءَ پابندی جتگ دانکہ ایمنی جاورھال برجاہ دارگ بہ بیت-