مروچی فیفا ورلڈ کپ ءِ راؤنڈ آف32 ءَ پرانس ءَ سویڈن ءِ دیم ءَ سے ، میکسیکو ءَ ایکواڈر ءِ دیم ءَ دو ءُ انگلینڈ ءَ ڈیموکریٹگ ریپبلک کانگو ءِ دیم ءَ دو پہ یک گولے ءَ وتی گوازی کٹ اتگ ءُ پری کوارٹر فائنل ءَ سربوتگ انت ۔
مروچی بوتگیں اولی گوازی پرانس ءُ سویڈن ءِ میان ءَ بوتگ کہ پرانس ءَ سویڈن 0-3 ءَ پروش داتگ ۔ گوازی ءِ اولی ھاپ ءِ گڈسر ءَ اسٹار فارورڈر ایم باپے ءَ 45 می منٹ ءَ اولی گول داتگ ۔ پدا دومی ھاپ ءَ بارکولا یک دگہ گولے داتگ ءُ سیمی گول پدا ایم باپے ءَ 74منٹ ءَ داتگ ءُ باج برتگ ۔
مروچی بوتگیں دومی گوازی میکسیکو ءُ ایکواڈور ءِ میان ءَ بوتگ کہ میکسیکو ءَ دو گول ءَ گوازی کٹ اتگ ۔ میکسیکو ءِ نیمگ ءَ اولی گول نوننس ءَ وھدیکہ دومی گول ہیمی نینس ءَ داتگ ءُ چل سال ءَ پد وتی ٹیم پری کوارٹر ءَ سرکتگ ۔
راؤنڈ آف 32 ءِ مروچی بوتگیں سیمی گوازی انگلینڈ ءُ کانگو ءِ میان ءَ بوتگ کہ کہ کانگو ءَ جوانیں وڈی ءَ گوازی کنان ءَ انگلینڈ ءِ دیم داشتگ ءُ گوازی ءِ ھپتمی منٹ ءَ کانگو ءِ لیبی برائن سیپینگا اولی گول داتگ ءُ پدا سرجمیں ھاپ ءَ کانگو ءِ لیبیاں گول ءِ موکگ ءَ نہ اشتگ ۔
دومی ھاپ ءَ گوازی ءِ 75 منٹ ءَ انگلینڈ ءِ لیبی ہیری کین ءَ گول موک اتگ ءُ ھردو ٹیم 1-1 گولے ءَ دیمیگ بوتگ انت ۔ گوازی ءِ 86 می منٹ ءَ انگلینڈ ءِ نیمگ ءَ ہیری کین ءَ باج بری ءِ دومی گول داتگ ءُ گوازی کٹ اتگ ۔