بلوچ لبریشن آرمی ءِ جارکش جیئند بلوچ ءَ شنگ کتگیں درشان ءَ گوشتگ سرمچاراں گْوستگیں 10 روچانی میان ءَ زیردستیں بلوچستان ءِ.جتا جتائیں دمگاں 23 سوبمندیں کاروائی کرتگ انت۔ اے اُرشانی تہ ءَ زورگیریں لشکر ءُ لُٹ ءُ پلی کمپنی نشانگ جوڑ کنگ بوتگ اَنت ءُ مزنیں شاھدگانی سر ءَ زرکاری بندش ءِ چیردستی ءَ لُٹ ءُ پل کنوکیں گاڑیانی سر ءَ اُرش کنگ بوتگ انت۔ اے سرجمیں اُرشانی تہ ءَ شانزدہ زورگیریں لشکر ءِ کارندہ مرتگ انت ءُ بازیں ٹپیگ بوتگ اَنت ءُ جتا جتائیں جاھاں ترندیں جنگ ءُ چوپانی وھد ءَ بی ایل اے ءِ چار بھادریں سرمچار زمین ءِ پھریزگ ءِ وھد ءَ شھید بوتگ اَنت۔
بیست ءُ یک جون: سوراب ءِ مزنیں شھدگ ءِ سر ءَ سرمچاراں ناکہ بندی کتگ ءُ کلاکانی کلاک گاڑیانی پٹ ءُ پول برجاہ داشتگ۔ ھمے روچ ءَ زورگیریں پاکستانی لشکر ءُ ریاستی ایجنٹ (ڈیتھ اسکواڈ) ءَ کوہلو ءِ دمگ نساؤ ءِ دمگ ءَ دیم ءَ روگ ءِ جھد کتگ کہ ایشی ءِ سر ءَ سرمچاراں جتا جتائیں جاھاں آھانی سر ءَ اُرش کتگ۔ اے جنگانی تہ ءَ دژمنیں لشکر ءَ مزنیں جانی ءُ مالی تاوان رس اتگ۔
بیست ءُ سَے جون: سرمچاراں خاران ءِ سَے گچینی جاہ، ساراوان، نوروز کلات ءُ زروزئی ءِ سرجمی ءَ کنٹرول کتگ ءُ وتی سیکورٹی پوسٹ جوڑ کت اَنت ءُ اے کنٹرول دو روچ ءَ سوبمندیں رنگے ءَ برجاہ بوتگ۔ ھمے وھد ءَ ساراوان ءَ دو پُھل ءُ زروزئی ءَ یکے گوں تراکناکیں شورواں تباہ کنگ بوتگ انت۔ دومی نیمگ ءَ نوروز کلات ءَ بی ایل اے ءِ اسنائپراں زورگیریں لشکر ءِ سئے کارندہ کشتگ اَنت ءُ ساراوان ءَ دو روچ ءَ گوں زور گیریں لشکر ءَ برجاہ بوتگیں جنگ ءُ چوپانی تہ ءَ دژمن ءِ دگہ چار کارندہ جاہ پہ جاہ ءَ مرتگ انے ءُ مزنیں تاوانے رس اتگ۔ ھمے روچ ءَ سرمچاراں بسیمہ ءِ ‘جور’ ءِ جاہ ءَ گوں راکٹ ءُ دگہ مزنیں سلاہاں زورگیریں لشکر ءِ سر ءَ اُرش کُتگ کہ آ پہ فوجی زوراکی ءِ مول ءُ مراد ءَ دیم ءَ روگ ءِ جھد ءَ بوتگ۔ ھمے روچ ءَ سرمچاراں مستونگ ءِ دمگ ڈغاری کراس ءِ جاہ ءَ زورگیریں لشکر ءِ راشن ءِ برگ ءِ گاڑی ءِ سر ءَ اُرش کتگ دستیگ کتگ۔ ھمے وڑ تربت ءِ دمگ خیر آباد ءَ زورگیریں لشکر ءِ یک فوجی پوسٹے سرمچاراں اُرشے ءَ سک باز تاوان داتگ ءُ ھمے وھد ءَ پوسٹ ءِ سر ءَ ایریں سرجمیں جاسوسی کیمرہ ھم تباہ کنگ بوتگ اَنت۔
بیست ءُ پنچ جون: سرمچاراں مستونگ ءِ شیخ واسل ءِ مزنیں شاھدگانی سر ءَ ءُ نوشکی ءِ مل ءُ احمد وال پھاٹک ءَ زرکاری بندش جتگ۔ اے کاروائی ءِ وھد ءَ استھسالی کمپنیانی ھپت مزنیں مال برداریں گاڑی دستیتگ اَنت وھدے کہ 10 گاڑی سوتکگ ءَ سرجم ءَ تباہ کنگ بوتگ اَنت۔
بیست ءُ شش جون: خضدار ءِ دمگ زہری ءِ ’بلبل‘ ءِ جاہ ءَ سرمچاراں زورگیریں پاکستانی لشکر ءَ را جتا جتائیں اُرشانی تہ ءَ نشانگ جوڑ کتگ وھدے کہ آ دمگ ءَ فوجی زوراکی ءَ گوں بندوک بوتگ۔ اے ھونیگیں جنگانی تہ ءَ زورگیریں لشکر ءِ شش کارندہ مرتگ انت ءُ بازیں کارندہ ٹپیگ بوتگ اَنت۔ ڈیھ ءِ رکّینگ ءِ اے جنگ ءَ بی ایل اے ءِ دو سرمچار سنگت ڈاکٹر عزیز ءُ سنگت ماما مرجان گوں بھادری ءَ جنگ ءَ شھید بوتگ اَنت۔ ھمے روچ ءَ ھزدار ءِ دمگ کرخ ءَ اے ٹی ایف ءِ گاڑی ءِ سر ءَ اُرش کتگ ءُ اسٹیشن ھاوس ءِ افسر ءَ ھوار دو افسر سک ٹپیگ بوتگ اَنت۔ دیمترا سرمچاراں خاران شھر ءِ نزیک ءَ ’باب خاران‘ ءَ خاران شال ءِ شھدگ ءِ سر ءَ کلاکانی کلاک بندش برجاہ داشتگ ءُ آدینگ ءِ شپ ءَ بسیمہ ءِ ’چاکر سول‘ ءَ سرکاری ایجنٹانی ھست بوھگ ءِ ھال ءِ سر ءَ کارروائی کتگ ءُ مزنیں کساسے ءَ جانی ءُ مالی تاوان اش بوتگ۔
بیست ءُ ھپت جون: شال ءِ دمگ میان گنڈی ءَ سرمچاراں پولیس ءِ گاڑی ءَ را دور ءَ چہ کنٹرول کنگ بوتگیں تراک ءِ وسیلگ ءَ نشانگ جوڑ کتگ ءُ چار پولیس کارندہ ٹپیگ بوتگ انت۔ ھمے روچ ءَ دالبندین ءِ ’یکمچ‘ ءَ زرکاری ناکہ بندی ءِ وھد ءَ سئے مزنیں مال برداری ٹریلر تیرگوار کتگ ءُ ناکارہ کنگ بوتگ اَنت۔
بیست ءُ ھشت جون: مستونگ ءِ ’کمبیلا‘ ءَ دمگ ءَ دیم ءَ روگ ءَ بوتگیں زورگیریں پاکستانی لشکر ءِ سر ءَ سرمچاراں اُرش کتگ۔ اے ویلانی تہ ءَ زورگیریں لشکر ءِ دو سپاھیگ جاگہ ءَ مرتگ اَنت ءُ بی ایل اے ءِ دو سرمچار سنگت جہانزیب ءُ سنگت کوھزاد زمین ءِ رکّینگ ءِ وھد ءَ شھید بوتگ اَنت۔ ھمے روچ ءَ کیچ ءِ دمگ ھیرونک ءِ ’نکیر‘ ءِ جاہ ءَ سرمچاراں زورگیریں لشکر ءِ پیادگیں گشت ءَ گوں تراکناکیں شورواں نشانگ جوڑ کتگ کہ ایشی ءِ آسر ءَ یک کارندھے جاہ ءَ مرتگ ءُ دو ٹپیگ بوتگ اَنت۔ چہ ایشی ءَ ابید خاران ءِ باب خاران ءِ نزیک ءَ لٹ ءُ پلیکمپنی ءِ کیمپ ءِ سر ءَ اُرش کتگ ءُ اود ءَ دراھیں بھاری مشینری ءُ گاڑی سوتکگ انت۔
سِی جون: زورکاری بندش ءِ برجاہ دارگ ءِ ھاتر ءَ سرمچاراں نوشکی ءِ احمد وال پھاٹک ءُ مستونگ ءِ کنرک ءِ ’بابری‘ ءَ پنچ لٹ ءُ پلی گاڑی سوتکگ ءُ تباہ کتگ اَنت۔ ھمے روچ ءَ شال ءِ ھمگرنچیں دمگ ڈغاری ءَ سرمچاراں ’’زرغون گیس فیلڈ‘‘ ءَ کار کنوکیں لٹ ءُ پلی کمپنی ءِ راشن ءِ گاڑی یے دست گپتگ ءُ گاڑی ءِ ڈرائیور ھم گل ءِ دست ءَ اِنت کہ آئی ءِ سر ءَ گل ءں رھبندانی رد ءَ پٹ ءُ پول کنگ بوھگ ءَ اِنت۔
جارکش جیئند بلوچ ءَ گوشتگ بلوچ لبریشن آرمی وتی اے جزم ءَ پد ءَ پدر کنت کہ ھمگرنچیں جنگی کارروائی ءُ زرکاری بندش ءِ اے سلسلگ گوں گیشتریں ترندی ءَ برجاہ بیت داں زیردستیں بلوچستان ءِ سرزمین ءَ چہ زور گیریں پاکستانی لشکر سرجم ءَ درکپگ ءُ راجی آجوئی ءِ رسگ ءَ پد۔ دژمنیں ریاست ءِ زرکاری ءُ فوجی شریاناں لگت دیگ مئے ھکمت املی ءِ یک بنیاتی بھرے ءُ اے نوکیں سوبمندیں کارروائیاں اے گپ سابت کتگ کہ زورگیریں ریاست نوں وتی نوآبادیاتی مپادانی رکھینگ ءُ وتی ھلاس بوھوکیں مالیاتی ڈھانچہ ءِ انتزام کنگ ءَ سرجم ءَ ناکام بوتگ۔ اے مئے راجی پرز اِنت کہ ما زمین ءِ گواچناں لٹ ءُ کُٹ ءَ بہ بندیں ءُ دژمن ءَ را زرکاری رد ءَ ناتوان بہ کنیں کہ ایشی ءِ راہ ءَ سنگت ڈاکٹر عزیز، سنگت ماما مرجان، سنگت جہانزیب ءُ سنگت کوہزاد ءِ وڑیں بھادریں سرمچارانی ابدی کربانی مئے آشوبی تب ءَ گیشتر برانز دنت۔ ما یک رندے پد ءَ اے گپ ءَ پدر کنگ لوٹیں کہ بلوچ سرزمین ءِ زوراکی ءَ دراج کنگ ءِ فوجی ادارہ بہ بنت، آھانی دمگی ایجنٹ بہ بنت یا لُٹ ءُ پل کنوکیں شریک بہ بنت کہ زمین ءِ وسیلگاں لٹ ءُ کُٹ کن اَنت، درست بی ایل اے ءِ نشانگ بنت ءُ مئے بلوچ ءِ راستی ءُ انساپ ءِ جنگ بے رکاوٹ ءَ برجاہ بیت داں یک آجوئیں ءُ ابدمانیں ریاستے ءِ جوڑ کنگ بہ بیت۔