فرانس ءِ روتاک لی مونڈے ءَ اے گپ پدر کتگ کہ بلوچانی نامداریں انسانی ھکانی باسک ڈاکٹر مھرنگ بلوچ ءِ نام دومی بر اِنت کہ پہ نوبل امن داد ءَ نامینگ بوتگ۔
بلے اے میان استمانی شرپ ءِ ھاترا نامینگ بوھگ ءَ ابید ھم آئی ءَ را پاکستان ءَ ناشرکاری ءُ کوش ءِ کیس ءِ تہ ءَ عمر قید ءِ سزا دیگ بوتگ۔
ھالانی رد ءَ ڈاکٹر مھرنگ بلوچ ءِ کیس زندان ءِ تہ ءَ یک بندیں کوٹی یے ءَ کنگ بوتگ کہ اود ءَ نہ اھوالکار ءُ نہ لوگ ءِ مردماں آیگ ءِ اجازت بوتگ۔ آئی ءِ وکیلاں اے پیسلہ ءِ ھلاپ ءَ اپیل ءِ جار جتگ ءُ آمید گس ءِ کارروائی ءَ درکانودی ءُ ناانساپی لیک اِتگ۔
ڈاکٹر مھرنگ بلوچ ءَ گْوستگیں بازیں سالاں چہ بلوچستان ءَ پہ زور بیگواھی، درکانودی کوش ءُ انسانی ھکانی لگتمالی ءِ ھلاپ ءَ وتی توار چِست کنگ ءَ اِنت۔ آئی ءِ جھد ءِ منانک ءَ آئی ءَ را دومی بر ءَ نوبل امن داد ءِ نامزد کنگ بوتگ کہ اے داد آئی ءِ امن جھد ءِ پدراھی جھانی تک ءَ یک گچینی منانکے زانگ بوھگ ءَ انت۔
میان اُستمانی انسانی ھکانی گلاں آئی ءِ عمر قید ءِ سزا ءِ سر ءَ سکیں درناکی درشانی کتگ ءُ اے سزا ءَ را بگیر داری ءِ توار ءِ لگتمال کنگ ءِ جھد لیک اِتگ ءُ ڈاکٹر مھرنگ بلوچ ءِ زوتیں یل کنگ ءِ لوٹ کتگ۔