نوشکی شھدگ سر ءَ سلاہ ناکہ بندی، ریکوڈک پروجیکٹ ءِ ھپدہ مردم دزگیر کتگ اَنت

بلوچستان ءِ دمگ نوشکی ءَ ھوار دالبندین ءُ مستونگ ءَ شال –تفتان بُنجاھی شھدگ یکشل ءَ بلوچ لبریشن آرمی ء دستیگ اِنت، شھدگ سر ءَ چیک پوائنٹس جوڑ کتگ ءُ پٹ ءُ پول کتگ-

گوستگیں روچ ءِ بیگاہ ءِ وھد ءَ نوشکی ءِ دمگ مَل ءَ سلاہ بندیں مردماں ناکہ بندی ءَ ریکوڈک پروجیکٹ ءَ چہ ھمگرنچ ھپدہ مردم دزگیر کتگ اَنت-اے مردمانی پجّار ھم نہ بیتگ بلے سرجمیں مردم بلوچستان ءَ چہ مڈی درکنوکیں ریکوڈک پروجیکٹ ءَ چہ ھمگرنچ بیتگ-

زانگ بہ بیت کہ بلوچستان ءَ گوستگیں روچاں مستونگ، ھاران ءُ نوشکی ءِ نزیک ءَ بلوچستان ءَ چہ مڈی بروکیں گاڑی ءُ آیانی پھازوکی ءَ ساڑی پاکستانی پوج اُرشانی نشانگ کتگ اَنت-

گوستگیں شمبے ءَ نوشکی ءَ سیندک ءَ چہ سُھر ءُ دگہ مڈی بروکیں بیست ءَ چہ گیش ٹرالر گاڑی ءُ آیانی پھازوکانی سر ءَ سلاہ بندیں مردماں مزنیں کچے راکٹ ءُ دگہ سلاھاں چہ اُرش کتگ، چریشی ءِ آسر ءَ ھشت ءَ چہ گیش گاڑی تباہ کتگ اَنت – اے اُرش ءَ پاکستانی پوج ءِ شش ءَ چہ گیش کارندہ ھم مرتگ-

اشی ءَ اَبید ھاران ءَ مڈی بروکیں دو وھدے کہ مستونگ ءَ سے گاڑی مانداشتگ اَنت، وھدے کہ دالبندین ءَ چہ مڈی بروکیں شرکت ءَ چہ ھمگرنچ سے مردم سلاہ بنداں مردم آوار جتگ-

اے وئیل ءِ زمہ واری بلوچ آجوئی لوٹوکیں سلاہ بندیں گل بلوچ لبریشن آرمی ءَ منّ اِتگ گْوشتگ کہ بلوچ مڈی لُٹ ءُ پُل ءَ ھمگرنچیں گاڑی ءُ سیکیورٹی کارندھاں اُرشانی نشانگ کتگ اَنت-

جارکش جیئند بلوچ ءَ گْوشتگ کہ شال –تفتان بُنجاھی شھدگ سر ءَ بی ایل اے ءَ سرجمی ءَ دستیگ کتگ ءُ اے سرجمیں شھدگ نو بی ایل اے ءِ دستیگ ءِ دمگ ءِ بھر اِنت- ما نی ھچ وڑ بلوچ مڈیانی لُٹ ءُ پُل کنوکیں گاڑیانی ٹرک، ٹریلرز ھچ وڑیں کاروانانی اد ءَ گوزگ ءِ اجازت نیست-