بلوچستان ءِ دمگ چاگی ،گوادر ءَ دو مردمانی زورانسری ءَ بیگواہ کنگ ءِ وئیل دیم ءَ اتکگ اَنت ءُ چہ پنجگور ءَ بیگواھیں مردمے ءِ لاش دزکپتگ۔
بنشون ءِ رد ءَ 28 اپریل 2026 ءَ شپ ءِ سئے بج ءَ ایف سی ءِ کارندھاں چاگی ءِ دمگ ھرماگے ءِ نندوکیں نظام بلوچ ء خدا رحم چہ نوکنڈی بازار ءَ دزگیر کتگ۔
کھول ءِ گْوشگ اِنت کہ نظام بلوچ وانندھیں ورنایے ، کہ دیریں بے روزگاری ءِ سوب ءَ زمیاد ڈرائیورے ءِ بستار ءَ کار کنگ ءَ اَت۔
کجول ءِ رد ءَ نظام بلوچ ءِ دزگیر کنگ ءَ پد آئی ءِ بابت ءَ ھچ وڑیں ھال ءُ اھوال دیگ نہ بیتگ۔
دومی نیمگ ءَ گوادر ءِ دمگ پانوان جیوانی ءَ زورانسری ءَ بیگواہ کنگ ءِ دگہ وئیلے ھم دیم ءَ اتکگ۔ دمگی مردمانی رد ءَ 19 مئی 2026 ءِ شپ ءَ پانوان ءَ حاجی صالح بلوچ ءِ لوگ ءَ پاکستانی لشکر ءَ ارش کتگ ءُ چہ اود ءَ آئی ءِ کسانیں چُک مختیار بلوچ دزگیر کتگ۔
کھول ءِ گْوشگ اِنت مختیار بلوچ ءِ بندیگ کنگ ءَ پد آئی ءِ بارو ءَ ھال دیم ءَ نیتکگ انت۔
دمگی چاگردی مھلوک ءِ گوشگ انت گوستگیں ماہ ءَ چہ جیونی، پانوان ءُ کش ءُ گور ءِ دمگاں بلوچ ورناہانی زوراکی ءَ بیگواہ کنگ ءِ دو درجن ءَ چہ گیش کیس دیم ءَ اتکگ انت۔
ھمے وڑ ءَ چہ پنجگور ءَ بیگواھیں مردمے ءِ لاش دزکپتگ-
دزکپتگیں لاش ءِ پجار محسن ء مسلم ءِ نام ءَ زانگ بیتگ-
دمگی مردمانی رد ءَ محسن شانزدہ مارچ دوھزار ءُ بیست ءُ شش ءَ پاکستانی پوج ءَ دو سیاد عبدالاحد ءُ یحییٰ ءِ ھواری ءَ آوار جتگ بیتگ-
کھول ءِ گوشگ انت محسن دزگیری جاہ ءَ لٹ شاپ کنگ ءُ کشگ بیتگ ءُ آئی ءِ لاش مروچی پروم کلگ کور ءَ دزکپتگ-