گوادر یونیورسٹی ءِ وائس چانسلر ءُ دگہ استادانی یل کنگ ءِ ھاتر ءَ تربت ءَ زھرشانی

گوادر یونیورسٹی ءِ وائس چانسلر پروفیسر ڈاکٹر عبدالرزاق صابر ،پرو وائس چانسلر ڈاکٹر سید منظور احمد، لیکچرر ڈاکٹر ارشاد بلیدی ءُ ڈرائیور حاتم ءِ زورانسری آوار جنی ءِ ھلاپ ءَ سرجمیں بلوچستان شھدربرجاھانی وڑ ءَ نوزدہ مئی 2026 ءَ یونیورسٹی آف تربت ءَ ھم سیاھیں روچ برجم دارگ بیتگ ءُ زھرشانی واک برجم دارگ بوتگ-

زھرشانی واک ءَ یونیورسٹی فیکلٹی باسک ءَ انتزامیہ ءِ کارداراں بھر زرتگ-

زھرشانی کنوکاں لوٹ کتگ کہ پروفیسر ڈاکٹر عبدالرزاق صابر ءُ آئی ءِ ھمراھاں انسانی ہمدردی بُنیاد ءَ پہ سلامتی ءُ پہ ازت یل بہ کن اِت-

زھرشانی کنوکاں ھکومت ءُ کانود ایر کنوکیں ادارھاں چہ دزبندی کتگ کہ آوار جنگ بیتگیں استاد ءُ دگہ مردماں زوت پہ سلامتی یل کنگ ءِ دلجمی بدے اِت-

آئی ءِ گوشگ اِنت کہ استادانی زورانسری آوار جنی ءِ سوب ءَ کھول، یونیورسٹی استاد، نودربر چاگرد ءَ سک تُرس ودی بیت-

واک ءَ ھواریں مردماں گوشتگ کہ استادانی ھلاپ ءَ بیتگیں اے وڑیں دلپدردیں وئیلاں بلوچستان زانتی ءِ نزام ءِ سر ءَ یک ھرابیں اسرے کپگ ءَ اِنت-

آئی ءَ گْوشتگ کہ بلوچستان ءَ یک جوانیں زانت ءِ تلان کنگ ھاتر ءَ پروفیسر ڈاکٹر عبدالرزاق صابر ءُ آئی ءِ ھمراھانی ھدمت ناکابل بیھال لیکھتگ-

زھرشانی واک ءِ آسری ءِ سر ءَ زھرشانی کنوکاں کھول ءَ گوں سرجمی ءَ یکجاھی درشان کنان ءَ یکرندے پد ءَ لوٹ کتگ کہ پروفیسر ڈاکٹر عبدالرزاق صابر ءُ آئی ءِ ھمراھاں زوت پہ سلامتی یل بکن اِت-