سئے شمبے ءِ روچ ءَ بلوچستان ءِ مزن شھر شال ءُ نوشکی ءَ نودربرانی مزنیں کساسے ءَ وتی دستاں چراگ روک کنان ءَ پروفیسر غمخوار حیات ءِ ستاشانی کتگ-
گیشیں ھالانی رد ءَ بلوچ اسٹوڈنٹس آرگنائزیشنز الائنس (ایشی ءِ تہ ءَ بی ایس اے سی، بی ایس او ءُ بی ایس او پجاری ھوار انت) ایشانی نیمگ ءَ شال ءَ پروفیسر غمخوار حیات ءَ ستاشانی ءِ واستا یک دلپدردی ءِ واکے بندات بیتگ۔ واک گڈسر ءَ کندیل روک کنگ بوت انت کہ آئی ءَ پہ بلوچ لبزانک ءَ بے مٹیں ھزمت ءُ وانگ ءُ زانگ ءِ پڑ ءَ آئی ءِ بے مٹیں کرد ءِ ستاشانی واستا چراگ بالینگ انت۔
بساک ءَ گوشتگ کہ نودربر گل ءِ بستار ءَ مئے ھمے گمان اِنت کہ مئے استاد، پروفیسر، دانش ور ءُ زانتکار مئے چاگرد ءُ راج ءِ بنکی مجگ اَنت، ایشانی بید ءَ ما ھچ وڑ ءَ دیم ءَ شت نہ کن ایں۔ پروفیسر غمخوار حیات ءِ بیرانی پہ مئے لبزانکی تک ءَ ٹوھیں تاوانے ۔
نودربر ءُ شھری ھم مزنیں کساسے ءَ چہ وتی لوگاں دراتکگ ءُ پروفیسر غمخار حیات ءِ بنکی ھنکین نوشکی ءَ روانک اش کش اتگ۔ ھواریں مردماں پروفیسر غمخھر حیات ءِ اکس زرتگ ءُ آئی ءِ لبزانکی ھزمتاں یات داتگ ءُ آئی ءِ کوش ءَ پہ براہوئی لبزانک ءَ بے کساسیں تاوانے لیک اِتگ ءُ شھر ءِ دگانی سر ءَ روانک کش اتگ۔
زانگ بہ بیت کہ پروفیسر غمخوار حیات گوستگیں روچ ءَ نوشکی ءِ دمگ کلی مینگل ءَ سرکاری کمک ءِ سلاہ بندیں گل ”ڈیتھ اسکواڈز“ ءِ تیرگواری ءِ آسر ءَ بیران بوتگ۔
پروفیسر غمخوار حیات براہوئی زبان ءِ نامداریں شاعر، نبشتہ کار، رجانکار، کسہ نویس ءُ انشائیہ نبیسے بوتگ۔ آئی ءَ لبزانک ءِ جتا جتائیں تبکاں ارزشت داریں ھزمت کتگ ءُ نزیک ءَ بیست کتابانی نبشتہ کار بوتگ۔ آ راسکوہ لبزانکی دیوان ءُ اوتان کلچر اکیڈمی ءِ بن ھشت ایر کنوکانی تہ ءَ ھم ھوار بوتگ۔
آئی ءِ وانوکاں چہ ھوار سیاسی، چاگردی، لبزانکی ءُ المی پڑاں آئی ءِ کوش ءِ سر ءَ سکیں رنج ءُ گم ءِ درشانی کتگ۔
جتاجتائیں پھناتاں گوشتگ کہ غمخوار حیات ءِ شھیدی ءَ نہ ایوکا براھوی لبزانک ءَ بلکن ءَ زانت ءُ زانت ءِ دنیا ءَ ہم بے دروریں تاوانے داتگ۔