کیچ: جتا جتائیں تیرگواری وئیلاں سی ٹی ڈی ءِ کارندہ ھوار دو مردم بیران، چار زدگ

بلوچستان ءِ دمگ کیچ ءِ بنجاھی شھر تربت ءَ جتا جتائیں تیرگواری وئیلاں سی ٹی ڈی ءِ کارندہ ھوار دو کس بیران ءُ چار زدگ بیتگ انت-

گیشیں ھالانی رد ءَ انسداد ناشرکاری ءِ مھکمہ ءِ یک کارندہے ناشناسیں سلاہ بندیں مردمانی تیرگواری ءَ بیران بوتگ۔

ھالانی رد ءَ اے وئیل دشتی بازار ءِ نوید سروس ءِ نزیک ءَ بوتگ کہ اود ءَ ناشناسیں ارش کنوکاں تیرگواری کتگ ءُ سی ٹی ڈی ءِ کارندہ شبیر احمد آسکانی بیران بوتگ۔

اے وئیل ءَ پد پولیس ءُ کانود دار کنوکیں ادارہ جاہ ءَ سر بوتگ انت ءُ چمدیستگیں مردم اش جم کتگ انت ءُ دمگ انگیر کتگ ءُ اُرشکارانی پٹ ءُ پول بندات کتگ۔

پولیس ءِ رد ءَ لاش پوسٹ مارٹم ءِ ھاتر ءَ ٹیچنگ ہسپتال تربت ءَ سر کنگ بوتگ وھدے کہ وئیل ءِ گیشیں پٹ ءُ پول برجاہ اِنت۔

ھمے وڑ تربت شاھی تمپ ءَ زونگ گراؤنڈ ءَ وتی ھمراھانی تیرگواری ءَ زھیر ء سعد اللہ بیران بیتگ-

اھوالانی رد ءَ وئیل گوستگیں شپ ءِ ساھت دوازدہ ءَ پیش اتکگ کہ اود ءَ آئی ءِ ھمراھاں تیرگواری کتگ ءُ آ کشتگ-

ھمے وڑ ءَ جوسک ءَ ناشناسیں مردماں تیرگواری کتگ ءُ شاہ نواز ء ھیدر جھمنند جوسک،شاہ نواز ء سرفراز جھمنند سنگانی سر ءُ یاسین ء نبی بخش جھمنند میری زدگ کتگ انت-

ھمے وڑ تربت ءَ مبارک کازی چوک ءَ سلاہ بندیں پرپٹ سواریں مردمانی تیرگواری ءَ داد رھمان ء مھمد علی جھمنند ٹی ٹی سی کالونی زدگ بیتگ انت-

پیش اتکگین وئیلانی بارو ءَ تنی وھدی دگہ گیشیں سرپدی دیم ءَ نیتکگ انت-