بلوچستان ءَ پاکستانی پوج ءُ آئی ءَ بندوکیں ادارہ ءُ بلوچانی مڈیانی لُٹ ءُ پولی ءَ ھواریں گاڑیانی سر ءَ یکشلیں اُرش برجاہ انت-
گوستگیں روچاں شال تپتان ءِ دگ ءِ بندش ءِ جار جنگ بوتگ ات کہ اود ءَ راہ سرجم ءَ بلوچ سلاہ بنداں وتی دستیگی ءَ کنگ ءِ جار پرینتگ ءُ گوشتگ اے راہ پہ مڈی بروکانی واستا بند انت-
ھمے ڈول ءَ گوستگیں شپ ءَ بلوچستان ءِ شھر شال ءُ خاران ءِ اُرشانی تہ ءَ پاکستانی لشکر ءَ تاوان رس اتگ انت۔ دو شمبے ءِ روچ ءَ فرنٹیئر کور ءِ پوسٹ ءُ سی ٹی ڈی ءِ کارگس ءِ سر ءَ جتا جتائیں اُرش کنگ بوتگ انت۔
شال ءِ شھر ڈگری کالج سریاب روڈ ءِ سر ءَ پاکستانی لشکر ءِ چوکی ءِ سر ءَ ناشناسیں سلاہ بندیں مردماں اُرش ءِ نشانگ جوڑ کتگ کہ ایشی ءِ تہ ءَ بازیں تراک ءُ مزنیں تیر گواری ءِ توار بوتگ انت۔
دومی نیمگ ءَ خاران ءِ شھر ءِ ریڈ زون ءَ انسداد ناشرکاری ءِ کارگس جتا جتائیں نیمگاں نشانگ جوڑ کنگ بوتگ۔
دمگی بنشون ءِ رد ءَ سی ٹی ڈی ءِ کارگس ءِ نزیک ءَ ھشت ءَ چہ گیش تراک ءُ مزنیں تیرگواری ءِ توار بوتگ ءُ پد ءَ ایمبولینس دیم پہ جاہ ءَ روگ ءَ گندگ بوتگ اَنت۔
واکداراں اے اُرشانی راستی کتگ بلے جانی تاوانانی بابت ءَ ھچ وڑیں ھال ءُ اھوال نہ داتگ۔