مستونگ، بارکھان ءُ کلات ءِ شھدگانی سر ءَ ناکہ بندی ءُ اسنیپ چیکنگ زمہ واری بی ایل ایف ءَ منّ اِتگ اَنت

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ کہ مئے سرمچاراں نوزدہ مارچ 2026 ءَ مستونگ ءِ دمگ شیخ واصل ءِ ھند سر ءَ شال – تفتان دگ سر ءَ ناکہ بندی کتگ- اے کاروائی شپ وھد ءَ تاں برجاہ بیتگ، کہ اے میان ءَ شھدگ سر ءَ گاڑیانی روگ آیگ سرجمی ءَ بند کتگ- اے میان ءَ ھرچ وڑیں شکی ئیں گاڑی پٹ ءُ پول کتگ اَنت ءُ شھدگانی سر ءَ سرمچارانی دستیگ برجاہ داشتگ-

جارکش ءَ گْوشتگ کہ ناکہ بندی ءِ میان ءَ اود ءَ ساڑی لیویز چیک پوسٹ سرمچاراں وتی دستیگ کتگ- کاروائی ءِ میان ءَ چیک پوسٹ ءِ سر ءَ ساڑی کارندہ دزگیر کتگ اَنت، وھدے زورگریں ریاست ءِ کمکاری ءِ واستا کارمرز بیؤکیں اے پوسٹ مانداشتگ سرجمی ءَ تباہ کتگ- دزگیریں کارندہ کڈن کنگ ءَ پد ءَ یل کتگ اَنت آ زورگریں توانمندانی کمکاری ءَ چہ پھریز بکن اَنت-

جارکش ءَ گوشتگ دگہ یک کاروائی یے سرمچاراں 18 مارچ 2026 ءَ یک مھکمیں کاروائی ءِ میان ءَ بارکھان ءُ رکھنی ءِ میانی دمگ ءَ ھوار، کوھلو ءُ شھدگ بوڑی عیشانی ءَ بازیں ھندانی سر ءَ ناکہ جتگ- کساس سے کلاکاں تاں برجاہ بیؤکیں اے ناکہ بندی ءِ میان ءَ سرجمیں گوزوکیں گاڑی سک پٹ ءُ پول کتگ اَنت- ناکہ بندی میان ءَ بارکھان پولیس ءِ ایس پی سعد آفریدی ءِ اسکواڈ ءِ دو گاڑیاں ناکہ بندی جاہ ھند ءَ سر بیتگ اَنت، اود ءَ سرمچاراں دارگ ءِ اشارہ کتگ بلے آ نہ اوشتگ اَنت بلکیں ناکہ بندی پروشتگ تچگ ءِ جُھد کتگ کہ چریشی ءَ دوئیں گاڑی نشانگ کتگ اَنت- بلے اے تیرگواری تھنا کڈنی دروشم ءَ کتگ دانکہ آ وتی پالیسی ءِ سر ءَ دلگوش کنگ موہ دیگ بہ بیت-

جارکش ءَ گوشتگ ما پولیس کارندھاں تُرندی ءَ بیھار دے ایں کہ آ دیمتر ءَ سرمچارانی ناکہ بندی ءِ ھلاپ ورزی ءَ چہ پھریز بہ کن اَنت، اگاں ناں آ وتی جانی ءُ مالی تاوان ءِ زمہ وار بنت- اے کاروائی ءِ میان ءَ دزگیر کتگیں یک پولیس کارندھے سرمچاراں انسانی ھمدردی بُنیاد ءَ یل داتگ اَنت-

جارکش ءَ گوشتگ ھمے روچ ءَ 18 مارچ ءَ دگہ یک کاروائی ءَ سرمچاراں کلات ءِ دمگ سنگ داس ءَ آر سی ڈی شھدگ سر ءَ ناکہ بندی گاڑیانی روگ آیگ بند کتگ اَنت- داں دیراں تاں برجاہ بیؤکیں اے کاروائی ءَ گاڑیانی پٹ ءُ پول کتگ بلے دُژمنیں پوج ءِ ھچ وڑیں کاروان، یا چاریگ نہ گوستگ اَنت- ناکہ بندی ءَ چہ دمگ ءَ سرجمیں راھانی سر ءَ سرجمی ءَ گپتگ اَنت- ناکہ بندی ءِ میان ءَ سرمچاراں راج ءَ را آجوئی ءِ سلاہ بندیں جُنز ءِ لوٹ، تاثیر، ارزشت ءُ مول ءُ مراد ءِ بابت ءَ سرپدی دات۔

جارکش ءَ گوشتگ کہ بی ایل ایف ءِ سرمچارانی اے کاروائی پیش دار اَنت کہ سرجمیں شھدگ ءُ سرجمیں راہ مئے دست ءَ اَنت۔ داں بازیں کلاکاں دگ بندی ھمے پیش دار ایت کہ سرجمیں ھندانی راہ مئے دست ءَ اَنت۔ داں بازیں اداراں برجاھیں دگ بندی اے گپ ءِ تچکیں منانک اِنت دمگ ءِ آبادی ءُ رھوت کاری ءِ نزام مئے دست ءَ اِنت۔ دژمن ءِ پھازداری ءَ ابید سرمچارانی روچانی رھم ءَ مزنیں شھدگانی بند کنگ ءُ گسں پوجی ھنر ءُ ھیلھاں بازیں اداراں پٹ ءُ پول کنگ مئے آپریشن سوبمندی ءِ چیدگ اِنت کہ ایشی دیم پہ دیمی کنگ دژمن ءِ بے سوبی اِنت۔