کابل : پاکستانی بُرزی اُرش ءَ نیشہ آماچیں الاجی 400 گیش مردم بیران، 250 زدگ بیتگ انت

اوگانستان ءِ کسان جارکش حمد اللہ فطرت ءَ گوشتگ بُنجاھی شھر کابل ءَ نشہ آماچیں مردمانی جاندراھی بنجل ءِ سر ءَ پاکستانی بُرزی ءِ اُرش ءِ آسر ءَ بیران بیتگیں مردمانی کچ 400 ءَ سر بیتگ انت ءُ 250 زدگ انت-

جارکش ءِ رد ءَ اُرش ءَ بازیں کساسے ءَ لس شھری نشانگ کنگ بیتگ انت ءُ زدگ بیتگیں مردم نادراہ جاھاں برگ بوگ ءَ انت کہ اود ءَ بازینانی جاور سک ناگیگ انت-

اوگان ھکومت ءِ جارکش ذبیح اللہ مجاھد ءَ گْوشتگ کہ پاکستانی بُرزی اوگانستان ءِ بُرزی سیمسری ھلاپ ورزی کنان ءَ کابل ءَ برجاہ نشہ الاج کنوکیں بُنجاہ نشانگ کتگ-

آئی ءَ درشان ءِ تہ ءَ گوشتگ کہ اے اُرش ءَ گیشتر لَس شھری اسرمند بیتگ اَنت کہ الاج ءِ واستا ساڑی بیتگ اَنت-

تالبان ھکومت ءَ اے کاروائی ءِ اوگانستان ءِ وتواجھی ءِ تچکی ءَ ھلاپ ورزی گوشتگ ءُ ایر جتگ- جارکش ءَ گْوشتگ اے گامگیج سرجمیں منّتگیں انسانی اسولانی ھلاپ ءُ انسانیت ءِ ھلاپ جرم اِنت-

جانسلامتی وزیر ءِ جارکش ءَ گْوشتگ کہ سانمندیں مردم زوت نادُراھجاہ ءَ برتگ اَنت ءُ ٹپیانی کساس گیش بیگ ءَ اِنت-