ھُزدار : پاکستانی پوج ءِ کاروائی زالبول ءُ چُکانی سر ءَ لَٹ ءُ کُٹ، دو مردم بیگواہ کتگ اَنت

بلوچستان ءِ دمگ ھزدار ءِ ھند اورناچ ءَ گوستگیں روچ ءَ پاکستانی پوج ءِ نیمگ چہ یک کاروائی ءِ میان ءَ زالبول ءُ چُکانی سر ءَ لَٹ ءُ کُٹ ءُ دو مردم زورانسری بیگواھی ءِ ھال اِنت-

دمگی اِھوالکار ءُ چمّگدانی رِد ءَ اے بیڑ پاکستانی پوج ءُ ڈیتھ اسکواڈ ءِ کارندھاں بیڑبرتگ-

چمّگدانی گوشگ اِنت کہ کاروائی ءِ میان ءَ لوگ ءَ ساڑی زالبول ءُ چُکانی دزگیری ءِ جُھد ءَ گھگیری کتگ، چریشی ءَ پد پوج ءَ زالبول ءُ کسان سالی ئیں چُک سک لَٹ ءُ کُٹانی نشانگ کتگ اَنت- دمگی مردمانی رِد ءَ لَٹ ءُ کُٹانی آسر ءَ بازیں زالبولے ٹپی بیتگ وھدے کہ چُکاں سک تُرس ودی بیتگ-

اِھوالکار ءِ رِد ءَ اے کاروائی ءِ میان ءَ دو مردم آوار جتگ ءُ ناشناسیں ھندے ءَ برتگ، چریشی ءَ پد آیانی ھچ وڑیں ھال دز نہ کپتگ – بیگواہ کنگ بیتگیں مردمانی پجّار یاسین ء بھرام ءُ یوسف ء محمد کریم نام ءَ چہ بیتگ اَنت-

بلوچستان ءَ گوستگیں دو دھکاں چہ زورانسری آوار جنی، درکانودی آوار جتگ ءُ کاروائی ءِ میان ءَ شھری بیرانیانی بھتام دیم ءَ آیگ ءَ اَنت- دمگی ءُ میان استمانی انسانی ھکانی گل پاکستان ءَ چہ لوٹ کنگ ءَ اَنت کہ آ شھریانی بُنیادی ھکانی پھاز ءِ دلجمی بدنت-