زورانسری بیگواھی ءِ آماچیں نسرین بلوچ، ھانی بلوچ، خیرالنسہ، فاطمہ بلوچ، فرید بلوچ ءُ مجاھد بلوچ ءِ کھولاں مرچی لسبیلہ پریس کلب حب ءِ دیم ءَ آیانی یل کنائینگ ءِ ھاتر ءَ زھرشانی کتگ-
اے درچ ءِ سر ءَ تران کنان ءَ مردماں گوشتگ کہ زالبولانی بیگواھی ءِ نشانگ ءِ امل سک ءَ ترندیں دردناکی ءِ آماچ کنگ انت-
زھرشانی کنوکاں گوشتگ کہ پاکستانی لشکر ایشی ءَ پیش ھم مئے ورنا درکانودی چِست کنگ بیگ ءَ انت – نی مئے زالبول آیانی توک ءَ کسان سالین جنک ءُ لاپریں زالبول ھم زورانسری بیگواھی ءِ آماچ بوگ ءَ انت-
آیاں گوشتگ اے جنین آدماں کجام جرم کتگ کہ اے وڑ ءَ بیگواہ کنگ بوتگ انت؟ اگاں آیانی سر ءَ ھرچ وڑیں بھتامے ھست آ ملک ءِ آمیدگس ءَ پیش کنگ بہ بنت۔ کَسے ءَ بیگواہ کنگ نہ ایوک ءَ انسانی ھکانی سنگینیں لگتمالی اِنت بلکیں ناجائز ءُ ناجائزیں کارے ۔ اے رھبند ءَ چہ پدّر اِنت کہ اے زالبول انت بے گناہ انت۔
کھول ءَ گوشتگ آیاں زورانسری بیگواھی ءِ ھلاپ ءَ پولیس ءِ تھانہ ءَ ایف آئی آر ءِ نبشتگ کنگ ءَ شتگ انت بلے ایس ایچ او ءَ درھواست ءِ زیرگ ءِ انکاری کتگ – آئی ءَ جُست کتگ اے چونیں انساپے؟ ھمے لاچاری ءِ درچ ءَ مارا زھرشانی ءِ راہ گرگ کپتگ-
آھاں گشتگ کہ مارا انساپ دیگ بہ بیت ءُ آھاں گشگ بہ بیت کہ آہانی زالبول چونیں جاوران انت، اگاں مئے زالبول زوت برداشت کنگ نہ بوت انت گڑا ما تچکیں زھرشانی کنگ ءَ لاچار بہ ایں۔
گُڈسر ءَ زھرشانی کنوکاں انسانی ھکانی راجی ءُ میان اُستمانی گلاں گوں کڈنی کتگ آیانی بیگواھیں زالبولانی یل کنائینگ ءِ ھاتر ءَ وتی سرجمیں کرد ءَ پیلو بہ کن ات-
ھمے درچ ءَ بی وائی سی ءِ رھشون فوزیہ بلوچ ءَ تران کنان ءَ گوشتگ بلوچستان ءَ زالبولانی زورانسری بیگواھی ءِ جاورھال سکا سنگین انت – زالبولانی بیگواہ کنگ ھاکمانی لڑ ءَ بلوچستان ءَ ترس ءُ بیم ءِ تالان کنگ انت ءُ راستی ءَ راجی پکر ءُ چاگردی زانشت ءِ ایرموش کنگ ءِ بے سوبیں جھدے-
آئی ءَ گوشتگ کہ بلوچستان ءَ ھمک روچ مردم بیگواہ بوگ ءَ انت ۔ برے جنین آدم سڑکانی سر ءَ گران کنگ بوگ ءَ انت، ءُ برے آ گار ءُ بیگواہ کنگ بنت ءُ راج ءِ گیرت ءُ ننگ ءِ گون ءَ لیب کنگ بوگ ءَ انت۔ وت ءَ اسلامی جمھوریہ گُش ایت بلے اد ءَ نہ ارزشت گندگ بیت ءُ نہ ریاست۔ اِد ءَ اسلامی روایات پادمال کنگ بوگ ءَ اَنت، تئی نام ءَ آمریت مُشگ بوگ اِنت ءُ انساپ ءِ نام ءَ ھچ نیست۔
فوزیہ بلوچ ءَ گشتگ کہ بی وائی سی پہ زورانسری بیگواہ بوتگیں مردمانی کھول ءِ گوما اوشتاتگ ءُ ھرکجا زلم ءُ زورانسری انت ءُ بلوچستان سیاسی ءُ راجی زانشت ءِ برجائی ءِ ھاتر ءَ ھمک لڑ ءَ وتی پرامن جمھوری جنز ءَ برجاہ دارگ ءَ انت۔