گنجل جنگ ھلاس نہ بیت تو پیسر ءَ شھید بیت ئے
نبشتہ کار: چراگ نگوری
دی بلوچستان پوسٹ
شپ اَت تھار ماھی اَت جمبراں گرندگ اِت اَنت سْیاہ تھاریں گواتے ءَ ھم مانشانتگ اَت، سنگت درای گوں اوتاگ ءِ ساز ءُ ساماناں سرَ پُٹ اِت اَنت کہ اناگہ لھتیں نوکیں سنگت ھم اتک ءُ مئے اوتاک ءَ سر بیت اَنت، ما سنگت چاہ ءُ آپ کت اَنت ءُ بلاھیں کاگدے جت کہ ھور مئے توپگ ءُ جاٹہ ءُ باکی راشناں مہ میسین اِیت۔دیر نہ گوست کہ جمبر ءَ لھتیں ترمپ دور دات گوست ءُ شت باریں کجا شت ءُ آزمان ھم ساپ بیان اَت،۔ ما ھمے نوکیں سنگتانی دیوان ءَ نشتین ءُ گپ تران کت، ءُ چہ ھمے سنگتانی تہ ءَ یک کسانیں ورنایے مان اَت کہ سک مزاک ءُ مسکرا بازھوے اَت۔
من بندات گوں سنگت ءَ انچو نزیک نہ بیتاں بلے وھدے کہ من سنگت تب زانت کہ گڑا من سنگت ءَ گوں لچ اِتان ءُ ما سک مزاک کوچراھی کت پرچا کہ من زانت کہ اے سنگت بھ نہ چیڑ اِیت ءُ زھر نہ کنت۔ سنگت ءِ نام گنجل اَت، ما ھرردے کہ پہ مزاک ءُ مسکرائی ءَ جُست کت کہ تئی نام کے اِنت ؟ گڑا گنجل ءَ وتی وتی دست دلبند ءَ جَت گوں بچکندگ ءَ گشت کہ ،منی نام انت آپریشن گنجل۔
گنجل سکیں مھروان ءُ دلساپیں ھمبلے اَت مدام بچکندگ ءَ اَت ، گنجل مدام واب گندگ ءَ اَت کہ زمین آجو بیت جنگ ھلاس بیت ما دراھیں سنگت رواں وتی لوگان ءُ پد ءَ مئے زمین بیت کس مارا جست نہ کنت کہ کجا بیتگ ئے؟ ءُ کجا روگ ءَ ئے؟ گْوادر ءِ باتیل ءِ سر ءَ مئے راجی بیرک لگ اِیت ۔گنجل مدام واب گندگ ءَ اَت کہ وھدے کہ جنگ ھلاس بیت من رواں جیونی ءَ ھما مردماں گشاں کہ شما چی گشتگ کہ شما چار چوریگ ئے گوں شما اے بلاھیں دژمن جنگ ءُ گلینگ نہ بیت ءُ شما وت ءَ مپت ءَ گنوک کتگ کہ ما زمین آجو کنیں۔
یک روچے دیگر ءِ وھد ءَ ما دراھیں سنگت نشتگ اِتیں کہ گنجل کند اِت ءُ گشت کہ اڑے ما جنگ ءَ پشت کپتیں ،من جست کت کہ چے ءَ گنجل ءَ یکبرے پد ءَ کند اِت ءُ گشت ،بلوچستان 2026 ءِ اولی ماہ ءَ آزات بیت نی پشت کپتگیں ماہ وَ چار اَنت ما وِ ھمیش ایں نوکی جنگ ءَ ھوار کپتاں نی ما چی کنیں؟ مئے ڈیھ ءِ کُنگراں پیسر ءَ آزات کت، دراھیں سنگتاں ٹَھک دات ءُ کند اِت۔گنجلی زمین انگت آجو نہ اِنت ءُ جنگ ھم ھلاس نہ اِنت، دراہ جنزان اِنت ، بلے تو پیسر ءَ شھید بیت ئے وت ءَ پہ راجدپتر ءِ تاکاں چو مدامی نمیران کت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-