پاکستانی لشکر ءَ پیش کدمی ءِ ساھت ءَ بازیں کچے ءَ شھریانی دزگیر کُتگ ءُ ناشناسیں جاگہ ءَ بُرتگ اَنت، میتگ ءَ تین روچ ءِ کرپیو ءِ جار، شھری پَسّ اِتگ اَنت۔
بلوچستان ءِ ھَند زھری گوستگیں پانزدہ روچ اِنت کہ پاکستانی لشکر ءِ آپریشن ءِ دیمپانی ءَ کنگ ءَ اِنت۔
چموداں سلاھبندیں بلوچ آجوئی لوٹوک گلانی کنٹرول ءَ چہ پد پاکستانی لشکر ءِ بازیں کچے ءَ زھری ءَ آپریشن بندات کُتگ۔
اے سال ءِ 11 اگست ءَ بلوچ آجوئی ءِ سلاہ بندیں گلاں زھری ءِ تہ ءَ ایر کپگ ءُ دمگ ءِ کنٹرول کنگ ءَ پد پاکستانی لشکر ءِ سر ءَ چار ھترناکیں اُرش کُتگ۔ بلوچ آجوئی تپاک براس ءَ اے اُرشانی ذمہ واری زرتگ ءُ 37 کارندہ ءِ کُشگ ءِ جار جتگ۔
پاکستانی لشکر ءَ 15 ستمبر ءَ بالی اُرش ءِ تہ ءَ یک لوگے ءَ نشانگ جوڑ کتگ ءُ پندران ءِ ٹک ءِ سئے مردم بیران بوتگ اَنت ءُ دو روچ ءَ پد 17 ستمبر ءَ ڈرون ءِ اُرش ءَ چار مردم بیران بوتگ اَنت کہ آھانی تہ ءَ دو جنین آدم ھوار اَنت ءُ پنچ مردم ٹپیگ بوتگ اَنت کہ آھانی تہ ءَ یک چُکے ھم ھوار اِنت۔
تراسانی ءِ نزیک ءَ پاکستانی ڈرون ءِ اُرش ءَ بیران بوتگیں مردمانی تہ ءَ 40 سالی بی بی آمنہ ، ثنا اللہ ءِ جنین ، 41 سالی لال بی بی ، علی اکبر ءِ جنین ءُ 30 سالی محمد حسن ، محمد اکبر ءِ چُک ، بیران بوتگیں مردمانی تہ ءَ 45 سالی علی غالہ ءِ چُک ، علی غول ءِ چُک ، عبدالحکیم، 38 سالہ عبدالنبی، فرزند محمد یعقوب، 4 سالہ عمیر احمد، فرزند غلام رسول، و 65 سالہ ملا بخش، فرزند منڈاو ھوار اَنت۔
پاکستانی لشکر ءَ پد ءَ ثناء اللہ کہ ڈرون ءِ اُرش ءِ آماچ بوتگ ات دزگیر کتگ ءُ ٹپیگیں جاوراں ھزدار کینٹ ءَ دیم داتگ۔
دومی نیمگ ءَ دمگی وسیلگاں دی بلوچستان ءَ را اے گپ ءِ پدرائی کتگ کہ 27 ستمبر ءَ بالی اُرش ءَ پد پاکستانی لشکر مزنیں کساسے ءَ زھری ءَ دیم ءَ شتگ ءُ انجیرہ ءِ نزیک ءَ بلوچ لبریشن آرمی ءِ اُرش ءَ دگہ 15 کارندہ بیران بوگ ءَ پد بالی اُرش گیش بوتگ اَنت۔
یک اکتوبر ءَ لشکر ءَ نوراگاما ءِ دمگ ءَ ڈرون ءِ اُرش کتگ ءُ چار مردم بیران بوتگ اَنت۔ دمگی وسیلگ ءِ رد ءَ بیران بوتگیں مردم شھری بوتگ اَنت کہ آ کپاس ءِ کشارانی نزیک ءَ نشتگ اَنت کہ ڈرون ءِ اُرش ءَ آھانی سر ءَ اُرش کتگ۔
وسیلگ ءِ رد ءَ تاں انوگ ءَ ڈرون ءِ اُرشانی تہ ءَ نزیک ءَ یازدہ مردم بیران ءُ بازیں ٹپیگ بوتگ اَنت کہ آھانی تہ ءَ یک شپانک ءُ یک نودربرے ھوار اِنت۔
دمگی مردماں دی بلوچستان پوسٹ ءَ گوں تران کنان ءَ گْوشتگ کہ زھری ءَ کرپیو ءِ جار جنگ بوتگ وھدے کہ اے وھد ءَ پاکستانی مزنیں کساسے نزیکیں دمگاں ٹینکاں دیم ءَ روگ ءَ اِنت کہ ایشی ءِ تہ ءَ زھری بازار ھم ھوار اِنت۔
دمگ ءَ ھستیں بلوچ آجوئی ءِ گلاں گوں پاکستانی لشکر ءَ ھچ وڑیں نوکیں جنگ ءُ چوپ ءِ منّ نہ کتگ ءُ ھمے وھد ءَ جتا جتائیں وسیلگاں چہ ویڈیو ءُ اکسانی وسیلگ ءَ وتی ھست بوگ ءِ جار جتگ۔
وسیلگاں پاکستانی لشکر ءِ نوکیں پیش کدمی ءِ ھال داتگ ءُ گْوشتگ کہ 27 ستمبر ءِ پیش کدمی ءِ وھد ءَ پاکستانی لشکر ءَ گزان ءِ نزیک ءَ لوگانی سر ءَ اُرش کتگ ءُ اے وھد ءَ جتا جتائیں دمگاں مردمانی ٹارچر کنگ ءِ ھال شنگ بوتگ، لوگ ٹینکاں چہ ھلاس کنگ بوتگ اَنت ءُ مردمانی زور ءَ گار ءُ بیگواہ کنگ بوتگ۔
چہ لشکر ءِ نیمگ ءَ ایر کنگ بوتگیں کرپیو ءِ پد ءَ زھری ءِ اندری ءُ ڈنّی راہ بند کنگ بوتگ اَنت ءُ دمگی مردماں گْوشتگ کہ کرپیو ءِ سبب ءَ در معمولی سیکورٹی جاور ھال ءَ چہ شھری زند نادراہ بوتگ۔
پاکستانی لشکر ءِ آئی ایس پی آر ءَ زھری ءَ جنگی آپریشن ءِ منّ اِتگ ءُ بلوچ آجوئی لوٹوکیں پناہ گاہ ھلاس کنگ ءُ بازیں بلوچ آجوئی لوٹوکیں مردم دزگیر کنگ ءِ داوا کتگ بلے آیانی پجار ءِ بابت ءَ ھچ وڑیں ھال ءُ اھوال دیگ نہ بوتگ۔
دی بلوچستان پوسٹ ءَ چہ وسیلگاں رستگیں ھالانی رد ءَ اے وئیلانی تہ ءَ آجوئی لوٹوکیں مردمانی تاوان ھم بیتگ بلے انگت آیانی کچ ءُ کساس زانگ نہ بیتگ۔
بلوچ یکجھتی کمیٹی ءِ نیمگ ءَ وتی یک بیانے ءِ تہ ءَ گْوشگ بیتگ کہ گْوستگیں دو ھپتگ ءَ چہ زھری ءَ جاری جنگی آپریشن ءِ وھد ءَ لس مردم نشانگ کنگ بیگ ءَ اَنت۔ بمبتراک ءُ توپان ءِ تہ ءَ لس مردم بیران بوگ ءِ ھال شنگ اِنت کہ آھانی تہ ءَ دو پیریں جنین ھم ھوار اَنت ءُ بے کساسیں ھاندان بے لوگ ءُ ترس ءِ آماچ اَنت۔ لوگ، اوشتاتگیں کشار، آپ ءِ وسیلہ ءُ شمسی نزام ھلاس کنگ بوگ ءَ انت کہ چہ ایشی ءَ دمگی آبادی ءِ زندگ بوگ ءِ ھترہ ءِ آماچ انت۔
بیان ءِ تہ ءَ گوشگ بوتگ کہ اے وئیل انفرادی نہ بلکیں مچانکی انسانی ھکانی لگتمالی ءُ جنگی جرمانی درشان اَنت۔