ھزدار ءَ چہ یکسدءُ بیست کیلومیٹر دور زھری میتگ اے وھدی سرجمی ءَ پاکستانی پوج ءِ انگیر ءَ انت ۔
دمگی اھوالکارانی رد ءَ زھری ءُ کش گوری ھند ءُ دمگاں برجاھیں پاکستانی پوج ءِ زوراکیانی سوب ءَ جاور ھال چدوگنتر ھراب بوان انت ۔
زھری ءَ چہ اتکگیں ھالانی رد ءَ گس تباہ کنگ بوتگ انت ، کشت ءُ کشار ماندارگ بوتگ انت ،آپ ءُ سولر سسٹم تاوان دیگ بوتگ انت چریشی ءَ دمگی مردمانی زند ھترہ ءِ تہ ءَ انت وھدیکہ دمگ ءِ تہ ءَ سرجمی ءَ کرفیو جنگ بوتگ درسیں راہ ءُ در بند کنگ بوتگ انت ، ورگ ءُ درمان دارگ بوتگ انت ، مردم چہ نادراھجاہ ءُ بنکی جانسلامتی ءَ چہ زبھر کنگ بوتگ انت اشی ءَ ابید مھلوک ءِ ٹرانسپورٹ سسٹم ھم دارگ بوتگ وھدیکہ گسانی سرا بیڑ برگ ءِ وھد ءَ زھگ ، زالبول ءُ کماش لٹ کٹ کنگ بوگ ءَ انت ۔
ھالانی رد ءَ کوچھو ءُ چشمہ ءَ ھوار بازیں دمگاں یکشل ءَ ٹوپ مارٹر گولہ آس دیگ بوگ ءَ انت چریشی ءَ کشار ءُ گساں تاوان رس اتگ وھدیکہ دھکان کار بازیں مالی تاوان ءِ دیمپان انت ۔
بمبگواری ءُ ترس
کوچھو ءَ بمبگواری ءَ چہ کرپاس ءِ کشار تباہ بوتگ انت وھدیکہ چشمہ ءُ کش ءُ گوری ھند ءُ دمگاں مارٹر گولہ آنی کپگ ءَ مردم ترس ءِ آماچ انت ۔ ڈاندار ءُ مورینکی ءَ گساں ھم تاوان رسگ ءِ ھال انت بلے پدا ھم رسانک ، انٹرنیٹ ءِ بندش ءِ سوب ءَ جانی تاوانانی تچکیں ھال نیست ۔
پاکستانی پوج ءَ ٹاہ داتگ کہ زھری ءَ بلوچ لبریشن آرمی بگیری ءَ جھلی ءُ برزی آپریشن برجاہ انت بازیں سلاہ بندیں مردم کشتگ انت بلے پدا ھم بلوچ لبریشن آرمی ءِ نیمگ ءَ ھچ وڈین درشان دیگ نہ بوتگ ۔
زانگ بہ بیت 18 ستمبر ءَ زھری ءِ ھند تراسانی ءِ نزیک ءَ پاکستانی پوج ءِ ڈرون ارش ءَ دو زالبولاں ھوار سے مردم زدگ بوتگ انت چدوپیسر ھم برزی بمبمگواری ءِ سوب ءَ لس مردمانی بیران بوگ ءِ ھال انت ۔
دمگی مردمانی گوشگ انت کہ زھری ءَ انٹرنیٹ ءُ میڈیا بلیک آؤٹ اے گپ ءِ گواہ انت کہ پوج وتی کاراں میان استمانی تکاں چیردیگ لوٹ ایت ۔
دومی نیمگ ءَ بلوچ یکجھتی کمیٹی ءِ جارکش ءَ وتی درشان ءِ تہ ءَ گوشتگ کہ زھری ءَ گوستگیں دو ھپتگ انت کہ پوجی لشکر کشی برجاہ انت کہ آپریشن ءِ میان ءَ لس مھلوک نشانگ کنگ بوگ ءَ انت ۔ بمب گواری ءُ گولھانی کپگ ءَ لس مھلوک ءِ نمیرانی ءِ ھال انت کہ آیانی تہ ءَ دو زالبول ھم ھوار انت وھدیکہ بازیں کھول ءِ بے گس ءُ ترس ءِ آماچ بوتگ ۔ گس ، کشار ، آپ ءُ سولر سسٹم تباہ کنگ بوگ ءَ انت چریشی ءَ دمگی مردمانی زند ھترہ ءِ تہ ءَ انت ۔
آئی ءَ گوشتگ کہ سرجمین دمگ انگیر کنگ بوتگ درسیں راہ ءُ در بند کنگ بوتگ انت ۔ وھدیکہ سرجمیں دمگ ءَ کرفیو جنگ بوتگ کہ انسانی ھکانی لگتمالی ءُ جنگی کتکاری ءِ زانگ بیت ۔
آئی ءَ گوشتگ کہ زھری ءَ اے وھدی جاور ھال سک باز نگیگ انت ما چہ اکوام متھدہ ، میان استمانی انسانی ھکانی گل ءُ کمک کاراں لوٹ کنیں کہ زوت دزمانجنی بہ کن انت مردمانی جان ءُ مال ءَ بہ پھریز انت ۔