بلوچستان ءَ یک نیمگے ءَ مردم یل بیگ ءُ دومی نیمگ ءَ مردمانی آوار جنگ ءُ بیگواھیانی درچ برجاہ انت ءُ گوستگیں روچاں ھپت ءُ چار روچاں بلوچ کھولاں ماں پاکستان ءِ بنجاھی شھر اسلام آباد ءَ زھرشانی نندانک داتگ بیتگ ءُ پد ءَ گوستگیں دو روچ پیش آیاں وتی زھرشانی نندانک ھلاس کتگ-
زھرشانی نندانک ءِ ھلاسی ءِ دزبندی بلوچ راجدوست میر محمد علی تالپور ءُ بیگواھیں بلوچانی واستا ماں اسلام آباد ءَ گھگیری کنوکیں انسانی ھکانی ءُ وکیل ایمان زینب مزاری ءَ وتی تامر بندی کلوہ ءَ کتگ ءُ گوستگیں دو روچ ءَ پیش نشتگیں کھولاں زھرشانی نندانک ماں اسلام اباد ءَ ھلاس کتگ ءُ گھگیری کنگ ءِ جار جتگ-
ھمے وڑ ءَ بلوچستان ءَ مردمانی آوار جنگ ءِ درچ برجاہ انت – پاکستانی لشکر ءَ جتا جتائیں دمگاں سئے مردم دزگیر کتگ ءُ بیگواہ کتگ انت ءُ دگہ سَے بیگواھیں مردم یل کنگ بیتگ انت-
کیچ ءِ دمگ دشت کنچتی ءَ بیست ءُ ھپت ستمبر ءِ شپ ءِ ساھت یک ءَ پاکستانی لشکر ءَ الطاف ء ھیبتان ءُ گلاب ء ایوب بلوچ دزگیر کتگ ءُ پد ءَ بیگواہ کتگ انت۔
ھمے رنگ ءَ کیچ ءِ دمگ ھیر آباد ءَ 25 ستمبر ءَ سھب ءِ 5 بج ءَ پاکستانی لشکر ءَ سعود ء ھاجی رھیم چہ آئی ءِ لوگ ءَ دزگیر کتگ کہ ایشی ءَ پد آئی ءِ بابت ءَ ھم ھچ وڑیں ھال ءُ اھوال دیم ءَ نیتکگ انت۔
دومی نیمگ ءَ سئے بیگواھیں مردم یل بیتگ ءُ وتی لوگاں سر بوتگ اَنت ۔ بارکھان ءِ نندوکیں شیراز ء غلام قادر 20 ستمبر ءَ دزگیر کنگ بوتگ ءُ ھپت روچ ءَ پد 27 ستمبر ءَ یل بوتگ ھمے رنگ ءَ بالگتر ھنگول ءِ نندوکیں سراج ء سنجر ھم 26 ستمبر ءَ چہ تربت ءَ دزگیر کنگ بوتگ ءُ دومی روچ ءَ بیست ءُ ھپت ستمبر ءَ وتی لوگ ءَ سر بیتگ ، چہ بارکھان ءَ سَے ماہ ءَ پیش بیگواہ بیتگیں اصغر کرمدانی پاکستانی پوج ءِ بندیگ جاہ ءَ یل بیتگ ءُ وتی لوگ ءَ سر بیتگ-
زانگ بہ بیت کہ بلوچستان ءَ زورانسری بیگواھیانی درچ بازیں سالاں برجاہ اِنت کہ چریشی سانمندیں کھول ءُ انسانی ھکانی گلاں دلپدردی درشان کنگ ءَ اَنت۔ کھولانی گشگ اِنت کہ آھانی نزیکیں مردم بے ھچ وڑیں کانونی کارروائی ءَ دزگیر ءُ بیگواہ کنگ بوھگ ءَ اَنت۔