بلوچستان ءَ پاکستانی پوج ءَ وتی ھد ءُ سیمسر گوازینتگ اَنت

بلوچستان ءَ پاکستانی پوج ءِ آئی جوڑ کتگیں ڈیتھ اسکواڈ ءِ کارندھاں وتی ھد ءُ سیمسر گوازینتگ اَنت-

بلوچستان ءَ پاکستانی پوج ءَ وتی بُرزی زوراکی ھم گیش کتگ ھمے یکیں ماہ ءَ بلوچستان ءِ جتاجتائیں دمگاں ھُزدار، بولان، زامران بازیں جاھاں جیٹ بالگرد، ڈرون ءُ کواڈ کاپٹرانی سر ءَ بمبگواری کتگ ءُ اے بمبگواریاں چہ لس مردماں جانی ءُ مالی تاوان ءِ دیمپانی کنگ کپتگ-

زانگ بہ بیت گوستگیں شپ ءَ بلوچستان ءِ دمگ ھُزدار ءِ تھسیل زھری ءَ پاکستانی پوج ءِ ڈرون اُرش ءَ دو زالبول ءَ ھوار سے مردم بیران وھدے کہ چار سالی ئیں چُک ءَ ھوار پنچ مردم ٹپی بیتگ اَنت-

اے ڈرون اُرش زھری ءِ دمگ تراسانی ءِ نزیک ءَ کنگ بیتگ، چریشی ءَ ثناء اللہ ءِ چل سالی ئیں لوگ بانُک بی بی آمنہ، علی اکبر ءِ چل یک سالی ئیں لوگ بانُک لال بی بی ءُ سی سالی ئیں محمد حسن ء محمد یعقوب جاہ پہ جاھی بیران بیتگ اَنت-

ڈرون اُرش ءَ پد لیویز ءِ واکدار وئیلجاہ ءَ سر بیتگ ءُ ٹپی نادُراھجاہ ءَ برتگ اَنت، بلے انجیرہ کراس ءِ نزیک ءَ ایف سی ءِ کارندھاں ٹپی گپتگ اَنت-

اِھوالکار ءِ رِد ءَ پاکستانی پوج ءَ اے میان ءَ ٹپی بیتگیں ثناء اللہ ءُ چار سالی ئیں چُک سوراب ءَ، دو دگہ ٹپیانی ھمراھی ءَ شال ءَ برتگ اَنت وھدے کہ ٹپی علی اکبر ناشناسیں جاھے ءَ برتگ اَنت-

زھری ڈرون اُرش ءَ بیران بیتگینانی تہ ءَ بیگواہ کنگ بیتگیں علی اکبر ءِ لوگ بانُک، ٹپی ثناء اللہ ءِ لوگ بانُک ءُ سیاد ھوار اَنت-

زانگ بہ بیت کہ پاکستانی پوج ءِ واکدار ءَ ڈرون اُرش پدر کتگ ٹاہ داتگ کہ اشی ءَ بلوچ آجوئی لوٹوکیں سلاہ بندیں گل ءِ باسک نشانگ کتگ اَنت-

ھمے ھپتگ ءَ زھری ءَ اے دومی وئیل اِنت کہ اود ءَ پاکستانی پوج ءِ کاروائی ءَ لس آبادی نشانگ کتگ اَنت، اشی ءَ ساری زھری ءِ کوھی دمگ پوجی بالگرداں بمبگواری ءَ چہ سے شھری بیران بیتگ اَنت-

اے دوئیں کاروائیاں پاکستانی پوج ءِ ھمگرنچیں ادارہ آئی ایس پی آر ءَ بلوچ سرمچارانی اوتاک نشانگ کنگ ءُ سلاہ شورو دستیگ کنگ ءِ ٹاہ داتگ بلے آئی ءَ ھچ وڑیں نام زاھر نہ کتگ-

زھری ءُ کش گوراں اگست ءِ ماہ ءَ چہ بلوچ آجوئی لوٹوکانی اُرشانی نشانگ کنگ ءَ پد پاکستانی پوج ءِ نیمگ ءَ چہ بُرزی اُرشانی دْرچ بندات کنگ بیتگ چریشی ءَ تنی وھدے شش لَس شھریانی بیران ءُ پنچ ءَ چہ گیش ٹپیانی ھال اِنت-

دومی نیمگ ءَ بلوچ اسٹوڈنٹس آرگنائزیشن آزاد ءِ بُنجاھی جارکش ءَ وتی درشان ءِ تہ ءَ گْوشتگ کہ ھُزدار ءِ دمگ زھری ءَ زورگریں پاکستانی پوج ءِ نیمگ ءَ چہ لس آبادیانی سر یَ ڈرون اُرش ءَ چریشی ءَ دو زالبول ءَ ھوار سے بلوچ پُسگ شھید بیتگ اَنت، اے زورگر ءِ نیمگ ءَ چہ جنگی جرم ءِ ھما دْرچ اِنت کہ بازیں دھکاں چہ زورگپتگیں بلوچستان ءَ برجاہ ءَ اِنت-

آئی ءَ گوشتگ کہ پاکستانی پوج وتی بے سوبی ءَ چیردیگ ءِ ھاتر ءَ لَس آبادیانی سر ءَ اُرش وتی گارکتگیں وتی ھوسلاھانی رکینگ ءِ ناکامیں جُھد ءَ اِنت کہ اشی ءِ پروش ورگ ءِ تچکیں نشانی اِنت ھم – بلے بلوچ راج زورگر ءِ اے زوراکی ءُ جنگی جرم ءِ سوب ءَ وتی راجی آجوئی ءِ جُھد ءَ چہ ھچبر دزکش نہ بیت-