زاھد علی بلوچ ءِ زورانسری آوار جنی ءِ ھلاپ ءَ کراچی ءَ زھرشانی، بُنجل چارمی روچ ءَ ھم برجاہ

کراچی ءَ بیست پنچ سالی ئیں بلوچ نودربر زاھد علی ءِ زورانسری آوار جنی ءِ ھلاپ ءَ کراچی پریس کلب ءِ ڈن زھرشانی بُنجل جمعہ روچ ءَ یکشل ءَ چارمی ءَ ھم برجاہ ءَ اِنت-

زاھد ءِ سیادی کراچی ءِ دمگ چہ لیاری ءَ اِنت ءُ آ کراچی یونیورسٹی میان استمانی سیادی ءِ پڑ ءِ نودربرے-

کھول ءِ گوشگ اِنت کہ زاھد ھپدہ جولائی دوھزار بیست پنچ ءِ بیگاہ ءِ پنچ نیم ءِ نزیک ءَ ھما وھد ءَ پوج ءِ ادارھانی کارندھاں دزگیر کتگ وھدے آ سواری ءِ ودار ءَ وتی رکشہ کر ءَ اوشتوک بیتگ، دزگیری ءَ پد ناں آئی ءِ دزگیری پدر کتگ نانکہ یک ادارھے ءَ آئی ءِ ساڑی بیگ ءِ گپ راست کتگ-

آیاں گوشتگ کہ مروچی زاھد ءِ زورانسری آوار جنی ءَ 23 روچ بیتگ بلے آئی ءِ درگت ءَ ھچ وڑیں ھال دز نہ کپتگ-

کھول ءِ گوشگ اِنت کہ زاھد ناں تھنا وتی وانگ ءِ ھرچ وت چست کتگ بیتگ بلکیں رکشہ ءَ چلائینتگ وتی کھول مالی کمک ھم کتگ، آئی ءِ پت عبدالحمید دراجیں مدتے ءَ ھیپاٹائٹس ءِ نادُراھے کہ چُک ءِ ھرچ ءَ چہ الاج کنگ ءَ اِنت-

زھرشانی بُنجل ءَ زاھد ءِ پت ءُ مات، نزیکیں سیادانی ھمراھی ءَ انسانی ھکانی کارکن، نودربر ءُ شھریانی مزنیں کچے ءَ بھر زیرگ ءَ اَنت-

زھرشانی کنوکاں پلے کارڈز ءُ بینرز چست کتگ بیتگ آیانی سر ءَ نبشتہ اِنت کہ زاہد کو بازیاب کرو” طلبہ کو لاپتہ کرنا بند کرو” زاھد بلوچ ءَ یل بہ کن اِت نودربراں بیگواہ کنگ ءَ بند بہ کن اَنت ” زورانسری آوار جنی مردماں آمیدگس ءَ پیش بہ کن اِت یا یل بہ کن اِت-

اے درگت ءَ زورانسری بیگواہ زاھد علی ءِ پت ءَ رسانکدر ءَ چہ گپ کنان ءَ گوشتگ منی چُک یک مھنتی نودربرے، آئی ءِ سر ءَ اگاں کجام وڑیں بھتامے ھست گُڑا آمیدگس ءَ پیش بہ کن اِت اگاں بے گناھے گُڑا زوت یل بہ کن اِت-

کھول ءِ گوشگ اِنت دانکہ زاھد یل کنگ نہ بیت زھرشانی بُنجل ھمکروچی ھساب ءَ برجاہ بیت-

آیاں انسانی ھکانی گل، آمیدگس، اِھوالکار ءُ سرجمیں زانتکاریں مردماں چہ دزبندی اِنت کہ زاھد ءَ ھوار سرجمیں بیگواھیں مردماں یل کنائینگ ءِ ھاتر ءَ توار چست بہ کن اِت-