کیچ : پاکستانی پوج ءِ دست ءَ سے مردم زورانسری بیگواہ

بلوچستان ءِ دمگ کیچ ءَ پاکستانی پوج ءَ سے مردم آوار جتگ ءُ بیگواہ کتگ اَنت –

بیگواہ کنگ بیتگیں مردمانی پجّار ڈاکٹر داد شاہ ء واحد بخش، جھمنند سنگ آباد، امان بلوچ ء طاھر بلوچ ءُ نیک سال آسمی نام ءَ چہ بیتگ اَنت-

دمگی اِھوالکار ءِ رِد ءَ، داد شاہ مروچی یشکمبے ءَ چہ تربت شھر ءَ آوار جتگ، وھدے کہ نیک سال آسمی ھوشاپ دمگ ءَ ھما وھد ءَ آوار جتگ وھدے آ بیگواھیں برازتک عیواز حسین ءِ واستا گُد ءِ برگ ءُ پیشی دیگ ءَ لوٹائینتگ-

آواز حسن ء حسن پیسر ءَ چہ عرض محمد بازار ءَ زورانسری بیگواہ کتگ ءُ بُنجل ءَ برتگ-

امان بلوچ ء طاھر بلوچ، کہ سنگانی سر تربت ءِ جھمنند اَنت، کہ پاکستانی پوج ءِ کارمنداں ٹی ایم سی نادُراھجاہ ءِ نزیک ءَ آوار جتگ ءُ ناشناسیں جاھے ءَ برتگ-

زانگ بہ بیت امان بلوچ ءِ مستریں برات، عدنان طاھر، گوں پولیس ءَ بندوک اِنت آ ھم لھتے وھد ءَ ساری ریاستی پوج ءَ آوار جتگ اَت ءُ آ کساس دو ماہ ءَ تاں بیگواہ بیگ ءَ پد آجو بیتگ-

بلوچستان ءَ انسانج ھکانی واستا پُرکاریں گل پانک ءَ اے وئیل گوں تُرندی ءَ ایر جنان ءَ گوشتگ کہ بلوچستان ءَ زورانسری آوار جنی یک نوکیں درچ گوں تُرسناکی ءَ گیش بیگ ءَ اِنت ، آئی ءِ تہ ءَ گیشتر کسانی سالی ئیں نودربریں ورنا اَنت ، اے ریاستی زوراکی وانگ ءُ ایمنی ءِ ھک ءَ یک سنگینیں اڑان اِنت-

پانک ءَ لوٹ کتگ کہ امان بلوچ ءَ زوت دیم بیار اِت ءُ بلوچستان ءَ برجاہ زورانسری آوار جنی ءِ درچ ءَ بند بہ کن اِت-