بلوچستان ءِ دمگ کیچ ءِ ھند شھرک ءَ گوستگیں شپ ءَ پاکستانی لشکر ءَ یک لوگے ءِ سر ءَ بیڑ برتگ ءُ ورنا فراز میار دزگیر کتگ ءُ ناشناسیں جاھے ءَ برتگ۔
دمگی مردمانی رد ءَ اے وئیل شپ ءِ بے وھد ءَ پیش اتکگ کہ لشکری مردماں میتگ ءِ کش ءُ گور انگیر کتگ انت ءُ لوگ پٹ ءُ پول کتگ ءُ فراز میار گوں وت برتگ-
فراز میار ءِ کھول ءُ دمگی مردماں آئی ءِ زورانسری بیگواہ کنگ ءِ ھلاپ ءَ زھرشانی کنان ءَ چین ءُ پاکستان ءِ گزرانکی راہ بند کتگ۔ سی پیک دگ ءِ بند بوھگ ءِ سبب ءَ دوئیں نیمگاں گاڑیانی دراجیں لین لگ اتگ انت۔
بلوچستان ءَ زورانسری بیگواہ کنگ ءِ وئیل نوکیں گپے نہ انت۔ چِد ءُ پیش ھم اے وئیلانی ھلاپ ءَ انسانی ھکانی جھدکار ءُ گلاں توار چست کنگ ءَ انت ۔