چما پرچا ھاموش بہ بَہ اِیں؟
نبشتہ کار: شکل بلوچ
دی بلوچستان پوسٹ
وھدے ما وتی چماں تئی برجائیں زُلم ءُ زوراکیاں گندیں گڑا مئے چم آس دے اَنت کہ تو مئے شکرورنائیں بلوچ پوسگاں زورانسری آوار جن ئے اِش ءُ پد ءَ چو بے کسی ءِ پیم ءَ آھانی جسماں درانسانی ڈول ءَ ٹپ ءُ ٹور کن ئے جنگلاں دور اِش دے ئے کہ تو گُش ئے ھچ تِرک ءُ توار مہ کن اِت!
گپ بلوچ راج ءِ ھستانک ءُ آئی ءِ پجّار ءَ کہ سر اِنت ءُ تو چو رستر ءَ بلوچ راج ءِ چُکچینی ءَ لانک بستگ گڑا ما چتو ھاموش بوت کن اِیں؟ دژمن ءَ بلوچ راج ءِ سر ءَ وڑ وڑیں چُکچینی ءِ پندل سازینتگ آ تئی ھاموشیں چُکچینی بہ بیت شر(بزاں نشہ ءِ شکل ءَ چانوگرانی دستاں) ءُ دومی ابرمی چُکچینی ءِ وسیلہ ءَ بزاں راہ ءُ دگانی ویل بہ بیت، نیزگاری، بے زورگاری، بُنکی انسانی آسراتیاں چہ زِبھر یا کہ کجام شکل بہ بنت اَنچیں زورگار کہ پہ بزگی ءُ واری ءَ چہ پد چُنڈیں نانے ءِ شوھاز ءَ سر بہ بیت۔
بلوچ یکجھتی کمیٹی ءِ رھشون، ڈاکٹر ماھرنگ بلوچ ءُ واجہ سبگت اللہ شاھجی ءِ وتگڑیں اُمرکید ءِ سزا دیگ ءَ پد ما بلوچ راج اے سرپد بَہ اِیں کہ اے اُمرکید ءِ سزا پہ ڈاکٹر ءُ واجہ سبگت اللہ ءَ نہ داتگ اَنت بلکیں اے سزا پہ کُل بلوچ راج ءَ داتگ،۔ اے مئے وش بھتی اِنت کہ ما چُشیں رھشوناں وتی چماں گندیں ءُ تو مئے چمانی دیم ءَ مئے رھشوناں وتی دروگیں آمیدگسی پیسلہ دی ئے ءُ ما یکپارگی ھاموش بہ اِیں چُش بوت نہ کنت۔
ایشی ءَ چہ پد وھدے بی وائی سی کیچ ھنکین ءِ نیمگ ءَ پہ بی وائی سی ءِ رھشونانی وتگڑیں آمیدگسی پیسلہ ءِ ھلاپ ءَ 2 جولائی 2026 ءَ یک زھرشانی روانکے ءِ جار ءَ دنت ءُ کمے ساھت ءَ پد کیچ پولوس ءِ نیمگ ءَ 144 دقعہ ءِ جار ھم پِرّین اِیت کہ(آئی ءِ تہ ءَ ھچ وڑیں زھرشانی، راجی مُچی ءِ موکل دیگ نہ بیت) گڑا بزاں ھمے شپ ءَ 2 جولائی 2026 ءَ تُربت شاھی تمپ ءَ بلوچ یکجھتی کمیٹی ءِ بُنجاھی باسک ءِ لوگ ءَ چہ تُربَت سی ٹی ڈی ءِ نیمگ ءَ بیڈ برگ بیت ناں تھنا یک رندے بلکیں دو رند ءَ لوگ ءَ اُرش کنت، لوگ ءِ دروازگ ءَ پروش اِیت، بلے چہ ایشی ءَ پیسر سی ٹی ڈی سید بی بی ءَ زورانسری آوار جنت بلے زھرشانی ءَ پد شپ ءَ بیڈ بارت ءُ سھب ءَ یک پریس کانپرنسے ھم کنت کہ آئی ءِ تہ گُش اِیت تُربت پولیس تچک ءَ بلوچ راج ءِ چُکچینی ءَ ھوار اَنت ءُ اگاں گوں چیزے بوت گڑا ایشی ءِ زمہ دار تُربت پولیس ءُ تُربت سی ٹی ڈی انت۔
ڈاکٹر ماھرنگ بلوچ راج ءِ مُھکمیں توار اَت آ اِستان ءِ پاکستان وتی دروگ ءُ وتگڑیں آمیدگس ءِ وسیلہ ءَ زندان ءَ بندیگ کُتگ متلب ھر ھما کس کہ راج ءِ چُکچینی ءِ بگیر ءَ آواز چست کنت آ زندان کنگ بیت یا کُشگ بیت، دژمن ءِ مستریں اڑاند چمیشکا بی وائی سی اِنت کہ آ دژمن ءِ پندلاں زاھر کنت ءُ آ بلوچ راج ءِ ناں تھنا چُکچینی ءِ بگیر ءَ گپ جنت بلکیں چہ استان ءِ نیمگ ءَ بلوچ راج ءِ بوتگیں ناانساپی ءِ ھلاپ ءَ ھم گپ جنت۔ بی وائی سی مرچی دنیا ءِ ھر کُنڈ ءِ راج سرپد ءُ پوہ اِنت ءُ گوں بلوچ راج ءِ بوتگیں استانی زُلم ءُ زوراکیاں شر آگاہ اِنت کہ پاکستان ءَ 80 سال اِنت بلوچ سرڈگار ءِ سر ءَ بلوچ گواجناں لُٹ ءُ پل کنگ ءِ ھمراھی ءَ گوں بلوچ راج ءَ ناانساپی ءُ چُکچینی ءَ کنگ ءَ اِنت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-