جیونی ءَ اُرش ءَ پد بیگواہ بوتگیں مردمانی لاش دزکپتگ انت- پاکستانی پوج ءَ دیم پہ دیمی اُرش ءَ کُشگ ءِ ٹاہ داتگ – اے مردم پیش ءَ بیگواہ بیتگ انت – سیاسی ءُ چاگردی مھلوک –
گوادر ءِ دمگ جیونی پانوان ءَ چہ گوستگیں روچ ءَ پنچ مردمانی لاش دزکپتگ بوتگ۔ دزکپتگیں لاشانی سر ءَ لٹ ءُ کٹانی نشان گندگ بوتگ انت۔ دزکپتگ بوتگیں لاشانی تہ ءَ چار ءِ پجار اسکول ءِ استاد عبدالحق، پیری، عیسیٰ ءُ حیدر علی ءِ ناماں بوتگ انت کہ آ زوراکی ءَ بیگواہ کنگ بوتگ اَنت۔
پاکستانی لشکر ءَ آدینگ ءِ روچ ءَ پانوان ءَ پاکستان کوسٹ گارڈز ءِ کیمپ ءِ سر ءَ بلوچ لبریشن آرمی ءِ مجید بریگیڈ ءِ فدائی اُرش ءَ پد آپریشن ءِ تہ ءَ سلاہ بندیں مردم کُشگ ءِ ٹاہ داتگ اَت۔
جیوانی ءِ پانوان ءُ گنز ءِ نیام ءَ دزکپتگ بوتگیں دوئیں لاش روبار ءِ نندوکیں عیسیٰ ءِ چُک پیری ءُ روبار ءِ نندوکیں عمر ءِ چُک شاہ بخش ءِ ناماں زانگ بوتگ اَنت۔ بلوچ یکجھتی کمیٹی ءِ رد ءَ اے دوئیں مردم ھمے سال ءِ 7 جنوری ءَ پاکستانی لشکر ءَ چہ وتی گساں پہ زور بیگواہ کتگ اَنت ءُ یک لاشے ءِ پجار پہ زور بیگواھیں حیدر علی محمد ءِ نام ءَ بوتگ ۔
وائس فار بلوچ مسنگ پرسنز ءِ رد ءَ حیدر علی محمد ءِ لاش گوستگیں روچ ءَ جیونی ءَ دست کپتگ ، آئی ءِ کھول ءِ رد ءَ آ پیسر ءَ ھم پہ زور بیگواہ کنگ بوتگ ۔ اگست 2025 ءَ آئی ءِ کھول ءَ ھم گوادر ءَ ڈی سی ءِ کارگس ءِ دیم ءَ دھرنا کتگ ءُ آئی ءِ جان سلامتی ءِ لوٹ کتگ۔
عبدالحق ءِ جون ھم ھمے دمگ ءَ دست کپتگ۔ عبدالحق ھمے سال ءِ فروری ءَ پہ زور بیگواہ کنگ بوتگ۔ آ گوادر ءِ میمر ناؤ اکیڈمی ءِ پرنسپل ءُ سال دوھزار ءُ دہ ءَ بیگواہ رمضان بلوچ ءِ کستریں برات انت-
عبدالحق ءَ چہ بلوچستان یونیورسٹی ءَ کمپیوٹر سائنس ءِ پڑ ءَ ماسٹرز کتگ ات ءُ پد ءَ مشکے ءَ ”میمر نو اکیڈمی“ ءِ نام ءَ اسکولے جوڑ کتگ ات کہ گمانی ءَ پاکستانی لشکر ءَ زوراکی ءَ بند کتگ ات۔ آئی ءَ پد ءَ گوادر ءَ ہمے نام ءَ یک اکیڈمی یے ایر کتگ کہ اود ےَ زہگاں وانینگ ءَ بوگ ءَ بیتگ-
وائس فار بلوچ مسنگ پرسنز ءِ گشگ انت کہ زوراکی ءَ بیگواہ کتگیں محمد رمضان بلوچ ءِ برات عبدالحق ءِ درکانودی کوش ءِ سر ءَ سک دلپدرد انت۔ اے وئیل ءِ جتائین ءُ پلگاریں رنگے ءَ پٹ ءُ پول کمگ بہ بیت
–