بلوچ یکجھتی کمیٹی کیچ زون ءِ نیمگ ءَ مرچی تربت ءَ برجم داشتگیں زھرشانی ءِ رد ءَ شھر ترندیں سیکورٹی ءِ چیر دستی ءَ کنگ بیتگ ءُ انٹرنیٹ سروسز بند کنگ بیتگ اَنت ۔
بی وائی سی ءِ رد ءَ ریاست ءَ تربت ءَ گوستگیں روچ ءَ چہ دفعہ 144 ءِ سر ءَ زھرشانی ءِ دیم ءَ دارگ ءِ ھاتر ءَ ایر کتگ۔ گوستگیں شپ ءِ دیر ءَ بی وائی سی ءِ باسک سید بی بی بلوچ چہ وتی لوگ ءَ بے قانونی جواز ءَ دزگیر کنگ بوتگ ءُ آئی ءَ را گْوشگ بوتگ کہ 24 کلاک ءَ پد بزاں زھرشانی ءَ پد یلہ کنگ بیت۔
آئی ءَ گوشتگ کہ مرچی سرجمیں شھر ءَ کرفیو ءِ جار جنگ بوتگ، موبائل نیٹ ورک ءُ انٹرنیٹ ءِ سروسز ھم بند کنگ بوتگ اَنت، درجن ءَ چہ گیش مردمانی دزگیر کنگ ءِ ھال ھم رسگ ءَ اِنت۔
بی وائی سی ءِ رد ءَ اے درستیں گامگیج ریاستی واک ءِ بے لگامیں کارمرز کنگ ءُ پچیں جبری پالیسی ءِ درشان انت۔ یک نیمگے چہ عدلیہ ءَ سیاسی بگیردارانی ھلاپ ءَ وتی مرزی ءِ پیسلہ کنگ ءِ ھاترا کارمرز کنگ بوھگ ءَ اِنت ءُ دومی نیمگ ءَ ھمے پیسلھانی ھلاپ ءَ امن ءُ ایمنی ءِ راجمانی توار ءَ را گٹگیر، بندش، تیرگواری ءُ ترس ءِ وسیلگ ءَ سرپد کنگ ءِ جھد کنگ بوھگ ءَ اِنت۔ اے درستیں گپ اے گپ ءِ پدر کنگ ءَ اَنت کہ ریاست سیاسی ءُ اکلاکی اڑانک ءِ تہ ءَ اِنت ءُ بی وائی سی ءِ لس ھمایت ءَ چہ بے دروریں ترس ءُ بیم ءِ آماچ اِنت۔