بلوچستان ءِ جتا جتائیں دمگاں دگہ ھپت مردمانی زورانسری ءَ بیگواہ کنگ ءِ کیس دیم ءَ اتکگ انت کہ آھانی تہ ءَ یک کسان سالیں بچکے، یک گشندہ یے، یک مزدورے، یک ماھی گیرے ءُ یک ڈرائیورے ھوار انت۔ ھالانی رد ءَ اے مردم پاکستانی لشکر ءُ انٹیلی جنس ادارھانی نیمگ ءَ جتاجتائیں آپریشن ءِ بیڑانی وھد ءَ دزگیر کنگ ءُ بیگواہ کنگ بوتگ انت۔
ھالانی رد ءَ 29 اپریل 2026 ءِ بیگاہ ءَ گوادر ءِ ڈھور چیک پوسٹ ءَ ایم آئی ءِ کارندھاں آواران ءِ نندوکیں 23 سالی جاوید بلوچ ء قادر بخش دزگیر کتگ ءُ بیگواہ کتگ۔جاوید بلوچ ءِ بابت ءَ گشگ بیت کہ آ وتی بس ڈرائیور ءُ بس ءِ واھند اِنت۔
دومی نیمگ ءَ کیچ ءِ دمگ چاہ سر تربت ءَ 20 سالی خلیل کریم ء کریم بلوچ دزگیر کنگ بوتگ ءُ بیگواہ بیتگ۔ خلیل کریم ءِ بابت ءَ گشگ بیت کہ آئی ءِ سیادی گوں بلیدہ میناز ءَ اِنت ءُ آ یک گشندھے ۔
دومی نیمگ ءَ گوادر ءِ دمگ پانوان جیونی ءَ 19 اپریل 2026 ءِ شپ ءَ یک ءُ نیم ءِ نزیک ءَ ایف سی ءُ ایم آئی ءِ کارندھاں لوگانی سر ءَ چھاپہ ءِ وھد ءَ سئے مردم دزگیر ءُ بیگواہ کتگ انت۔ آوار جنگ بوتگیں مردمانی تہ ءَ 14 سالی دلشاد داد داد کریم ء داد کریم ، ڈرائیور علی فضل ء فضل بلوچ ، ءُ 19 سالی دریا ورد سھیل کریم ء عبدالکریم ھوار اَنت ۔
ایشی ءَ ابید نومبر 2025 ءَ چاگی ءِ دمگ شاہ سالار ءَ دو مردمانی زوراکی ءَ بیگواہ کنگ ءِ ھال رس اِتگ اَنت۔ھالانی رد ءَ 24 سالی عبدالحق شھزاد ء عبدالحکیم کہ آ یک مزدورے، سی ٹی ڈی ءِ کارندہ ءَ دزگیر کتگ ءُ بیگواہ کتگ۔ ھمے ور سِی سالی ئیں مجید ء مھمد بلال جھمنند کلی حاجی محمد چاگی ایف سی ءُ سی ٹی ڈی ءِ کارندہانی دزگیر کنگ ءَ پد بیگواہ کتگ۔