بلوچستان ءَ جتاجتائیں دمگاں سلاہ بندانی ناکہ بندی سے مردم دزگیر ءُ بازیں گاڑی ماندارگ بیتگ انت

بلوچستان ءِ جتاجتائیں دمگ زیارت، ھُزدار ،ھرنائی ،پنجگور ءُ دالبندین ءَ سلاہ بنداں داں دیراں ناکہ بندی کتگ ءُ سے مردم دزگیر بازیں گاڑی ماندارگ بیتگ انت-

گوستگیں روچ ءِ سھب ءَ ھُزدار ءِ دمگ ونگو ءَ سی پیک دگ، ایم ایٹ ءَ سلاہ بندیں مردمانی مزنیں کچے ءَ بُنجاھی شھدگ دستیگ کتگ چیک پوائنٹس جوڑ کتگ ءُ بازیں کلاکاں تاں برجاہ داشتگ-

اے میان ءَ پاکستانی پوج ءَ ھما وھد ءَ سلاہ بندانی دیمپانی کنگ کپتگ وھدے آیاں ءَ پیشگامی کنگ ءِ جُھد کتگ- دمگی اِھوالکار ءِ رِد ءَ داں دیراں پاکستانی پوج ءُ سلاہ بندانی میان ءَ میڑ برجاہ بیتگ-

ھرنائی ءِ دمگ مانگی ءَ سلاہ بندیں مردماں بُنجاھی شھدگ دستیگ کتگ مڈی بروکیں ٹرکاں ھوار بند ساچی شرکت ءِ مشینری مانداشتگ اَنت-

ھمے وڑ دالبندین ءَ چھتر ءِ ھند ءَ سلاہ بندیں مردماں چیک پوائنٹس جوڑ کتگ شال –تفتان بُنجاھی شھدگ دستیگ کتگ – دمگی مردمانی رِد ءَ سے کلاکاں چہ گیش سلاہ بندیں مردماں اسنیپ پٹ چیکنگ برجاہ داشتگ-

اے میان ءَ سیندک پروجیک ءِ واستا آئل بروکیں ٹینکراں ھوار دگہ گاڑی مانداشتگ اَنت بلے ھچ وڑیں جانی تاوان ءِ ھال نیست-

ھمے وڑ زیارت ءَ مانگی ءِ دگ سلاہ بندانی ناکہ بندی ءِ میان ءَ اسٹیشن ھاؤس ءِ آفیسر معسود احمد پانزائی گوں وتی سیاد اشرف ء پانزئی ءُ جاوید پانزئی سلاہ بنداں دزگیر کتگ اَنت-

دومی نیمگ ءَ پنجگور ءِ ھند چیدگی ءَ سلاہ بندیں مردماں ناکہ بندی کتگ ءَ گاڑی پٹ ءُ پول کتگ اَنت ھمے میان ءَ سلاہ بنداں چار مزنیں گاڑیانی سر ءَ اُرش کتگ ءُ تاوان داتگ اَنت-

زانگ بہ بیت بی ایل اے ءِ جارکش جیئند بلوچ ءَ وتی درشان ءِ تہ ءَ گوشتگ اَت کہ اے سرجمیں دگ منی سرمچارانی دستیگ اِنت چہ مڈی لُٹ ءُ پُل کنوکیں گاڑیانی ھچ وڑ اجازت ندے ایں اگاں کسے مڈی برت آ وتی زمہ وار وت اَنت-

بلے اے وئیلانی زمہ واری انگت ھچ ءَ گل ءَ نہ زرتگ اَنت-