بلوچستان ءِ دمگ کیچ، گوادر، نوشکی ءَ وتکشی ءُ تیرگواری ءِ وئیل ءَ دو مردم بیران ءُ دو ءِ جاور نگیگ اَنت-
بلوچستان ءِ دمگ کیچ ءِ بُنجاھی شھر تربت ءَ ناشناسیں سلاہ بندیں مردمانی تیرگواری ءَ چہ دو مردم بیران بیتگ اَنت-
اے وئیل پشمبے ءِ بیگاہ ءَ تربت کوہ مراد ھند سر ءَ بیتگ-
بیران بیتگیں مردمانی پجّار راشد حکیم ءُ دلشاد اللہ بخش نام ءَ چہ بیتگ اَنت- دوئینانی سیادی کولواہ ءَ چہ گوشگ بیگ ءَ اِنت-
چمّگدانی رِد ءَ اُرشکار پرپٹ ءَ سوار بیتگ اَنت ءُ آ نشانگ کتگ ءُ آ ھما دمان ءَ تتکگ اَنت-
وئیل سوب زانگ نہ بیتگ-
ھمے وڑ گوادر ءِ دمگ پسنی سالاچ ءِ جھمنندیں ورنا عبدالوحید ءَ وتکشی کنگ جُھد کتگ وتی گُٹ بُر اِتگ-
وئیل ءَ پد دمگی مردماں زوت دزمانجی کتگ ریسکیو ٹولی ھال داتگ چریشی ءَ ریسکیو زوت سر بیتگ ٹپی ئیں ورنا دوا درمان کنگ ءَ پد پاک عمان نادُراھجاہ ءَ برتگ-
ریسکیو گوشگ رِد ءَ ورنا ءِ جاور نگیگ اَنت تنی وھدے وتکشی جھد ءِ سوب زانگ نہ بیتگ اَنت-
دومی نیمگ ءَ نوشکی ءَ ڈپٹی کمشنر کارگس ءِ سیکورٹی سر ءَ ساڑی یک لیویز کارندہ ءَ وتکشی ءِ جُھد کتگ ءُ وت ءَ تیر جتگ-
اِھوالکار رِد ءَ وتکشی جُھد کنوکیں کارندہ حیات خان تُرندیں ٹپی جاور ءَ ٹیچنگ ھپستال نوشکی ءَ برتگ، اود ءَ آئی ءِ نگیگیں جاور ءِ چارگ چہ شال دیم داتگ-
پولیس ءُ ھمگرنچیں ادارہ دوئیں وئیلانی سبب ءَ زانگ واستا گیشیں پٹ ءُ پول کنگ ءَ اِنت، بلے تنی وھدے ھچ وڑیں گپ دیم ءَ نیتکگ-