راستی ءِ کُشگ
ٹی بی پی شونگال
بلوچستان دنیا ءِ ھما دمگاں گوں ھوار انت کہ اود ءَ میان اُستمانی اھوالکاراں پترگ ءِ سر ءَ ابید جارانکی بندشے جنگ بیتگ، ءُ اگاں دمگی اھوالکار ریاستی درشانداب ءَ وت ءَ جتا بہ کن انت گڑا آیاں یا بیگواہ ءُ بے کانود ءِ کوشانی وڑیں سنگینیں جاورانی دیمپانی کنگ کپ ایت- ریاستی زوراکیانی راستی ءَ داں دنیا ءَ سر کنگ ءِ پژدر ءَ داں انگت ءَ بلوچستان ءَ چِل ءُ دو اھوالکار کُشگ بیتگ انت-
ایمنسٹی انٹرنیشنل ءَ بلوچستان ءَ “ اھوالکارانی کبرستان ” نامینتگ، ھمے وڑ 2024 ءِ رپورٹرز وِد آؤٹ بارڈرز(RSF) ءَ کلات ڈویژن ءِ سَدر ھند، ھزدار ءَ دنیا ءِ ھما دَہ شھراں ھوار کتگ اود ءَ اھوالکاراں درستاں گیش بیمناک ءُ ترسناک بیتگ- پاکستان کساسی رنگ ءَ اھوالکارانی واستا یک ترسناکیں ڈیھے الم ھست انت، بلے بلوچستان آیانی واستا بازیں وھدے ءَ مَرگ ءِ پاتراپ بیتگ – اد ءَ ریاستی زُلمانی پاشک کنگ گیشتریں اھولکارانی ساہ ءُ سرانی دشمن بوگ ءَ انت-
پاکستان ءِ بنجاھی اھوالکاری ادارہ ریاستی زور ءِ سبب ءَ بلوچستان ءِ جنگ آماچیں گوات، انسانی ھکانی پالمالی، ءُ زورانسری بیگواھیانی وڑیں اھوالانی دیگ ءَ گستا انت – بلوچستان ءِ بارو ءَ یک نیمگ ءَ لگت دیوکیں درشانداب ءَ دنیا ءِ دیم ءَ پیز کنگ ءَ انت دانکہ ریاستی ادارہ بلوچ راجی زرمبشت ءَ ڈنی پندلانی آسر دیگ ءُ آئی ءِ سیاسی بستار ءَ ھلاس بہ کن اَنت-
بلوچستان ءَ آجوئی ءِ جنگ دو دھکاں گیش برجاہ انت- لھتے سالانی میان ءَ بلوچ سِلاہ بندکارانی کاروائیانی توک ءَ ترندی ءُ جوانیں شوربندی ھوار انت،چریشی ءِ پژدر ءَ ریاست ءَ ھم انسداد ءِ پالیسی گیش ترند کتگ انت – آسرداری بلوچستان ءِ بازیں جاھاں مھلوک تچک ءَ ریاستی زوراکیانی ساھگ ءَ زندگی ءِ گوازینگ ءَ لاچار انت – اے داب ءَ اھوالکاری ءِ بنداتی زمہ واری ھمے بیت انت آ اے زُلماں پاشک بہ کنت اِنت، بلے بدبھتی ءَ پاکستان ءِ میڈیا ءِ ادارہ راستی ءِ جاہ ءَ ریاستی درشانداب ءَ تالان کنگ ءُ وت ھم زوراکی ءِ بھر جوڑ بیتگ انت-