کھریں بے تواری گار کنت
نبشتہ کار: کیگد کندیل
دی بلوچستان پوسٹ
دسمبر ءِ یکّ سکّیں سارتیں شپے اَت اَنچو سردی جان ءِ بند بند بوگ بوگ ءَ تالان اَت اَنچو گُش ئے اِے شپ چہ درُستیں شپاں گیشتِر سرد تِر اَت گوریچ گوں تُرندی ءَ زهر زهر ءَ کشگ ءَ اَت دور ماں آزمان ءَ ماه سکّ رُژنا اَت ماه ءَ وتی رُژنائی هر نیمگ ءَ تالان کُتگ اَت هر چینچو شپ دیم ءَ روان اَت کھریں سردی همینچو گیش بوان اَت۔
درُستیں میتگ ءُ بازار ءِ مردم واب ءِ اَمبازاں شُتگ اِت اَنت چہ دُگنیا جھان ءَ بے سما اِت اَنت۔
همے میتگ ءِ دیمی نیمگ ءَ کّمو گِستا یکّ بلاهیں کبرستانے هست اَت اِے کبرستان سکّیں دیریگیں ءُ کوهنیں کبرستانے اَت چہ اِے بلاهیں کبرستان ءَ دیمی نیمگ ءَ یکّ لِچی بستگیں بانے هست اَت کہ آ بان بازیں هوراں ترک ترک اَت سرے کرز ڈن ءَ اِت اَنت اِے بان انچو بے ترک ءُ بے توار اَت مِسل ء همے کبرستان ئیگ ءَ چہ بان ءِ دریگ ءَ یکّ رُژنائی یے سر کشان اَت اِے رُژنائی همے بان ءِ تہ ءِ چُل ءِ تہ ءَ آس اَت کہ روک اَت-
اِے آس ءِ دیم ءَ مُرتگّیں ساهے ءِ زِندگیں اکسے اَت کہ آ گوں جیڑگاں دوچار اَت هنچو هیالانی جُھلیں زِر ءَ بُک اِتگ اَت اِے سما نیست اَت کہ باریں شپ ءِ چینچو پاس گوستگ آ چہ اندر ءَ همے آس ءِ پیم ءَ روک اَت آئی ءِ چمانی واب دیر اِنت گار بوتگ اِت اَنت هنچو کہ آئی ءِ ورنائیں بچ وتی دور ماں درامدیں دیارے ءَ رسترانی دست ءَ گار ءُ بیگواه کنگ بوتگ اَت-
آئی ءِ نام نازُک اَت میتگ ءِ درُستیں جنیناں گوں نام ئِے همیش اَت .کہ نیم نام ءَ توار اِش کُت.روچ ءَ آئی ءَ گوں یکّ کانٹیں چشمکے ءَ میتگ ءِ جنینانی گُد مشین ءَ دوتک اَنت ءُ شپ ءَ همے آس ءِ پانگ اَت اِے پرُشتگ ءُ کروتکگیں بان ءَ یکّ مشینے ءَ اَبید دگہ هِچ چوشیں دگہ شے یے نیست اَت بلے درامدیں سپائیانی سر هر روچ همد ءَ بُن اَت پہ پٹ ءُ پول ءَ هر وهد ءَ همے گّپ اِش کُت کہ تو سرمچاراں وتی لوگ ءَ جاه دے ئے پہ ھمایاں نان ءُ ورگ جوڑ کن ئے دنزاں گِپتگیں هما پیتی کہ بان ءِ کُنڈے ءَ اِیر اَت آئی ءِ تہ ءَ یکّ دو جوڑی پُچ هست اَت هر وهد ءَ کہ پٹ پول اِش کُت گُڑا اِے پیتی ءِ تہ ءِ همے گُدان ءَ در کُت دور دات گُشت ئِے اِے پُچ هم هماهانیگ اَنت تئی چُک ءَ سرمچارانی کُمک کُتگ تو هم کنگ ءَ ئے ّبیچارگیں نازُک ءِ گّپ هر وهد ءَ همیش اَت کہ منی چُک ءَ را گوں اِے وڑیں هِچ کاراں دست نہ بوتگ نیکہ منی چُک ءَ سرمچارانی هِچ وڑیں کُمکے کُتگ اِے گپاں آئی ءِ سر ءَ توپک دارگ بوت کہ وتی چُک ءِ هک ءَ اگاں گپے تو کُت گُڑا ما تئی لوگ ءَ مانندار اِیں تئی چُک ءَ کُش آں اِے پٹ پول پہ نازُک ءَ نوکیں هبرے نہ اَت پہ گاربیگواهیں مردماں هروهد ءَ روانک اِش کش اِت گُڑا آکر ءَ هرکّس ءَ همے جُست کُت تو وتی چُک ءِ آجوئی ءِ هاتِر ءَ پرچا روانکاں بهر نہ زور ئے گُڑا آئی ءَ هر وهد ءَ همے گُشت من ءَ هروچ درآمد لوگ ءِ تہ ءَ کّم شرپ کن اَنت من ءَ بیهار دینت اگاں من روانکاں بهر زرت یا کہ وتی چُک ءِ نام گِپت گُڑا آ منی چُک ءَ کُش اَنت-
هم روچیگیں شپانی وڑ ءَ اِے سرجمیں شپ ءَ هنچو جِک ءُ سر اَت چل ءِ روکیں آس ءِ دیم ءَ نیشتگ اَت چم ئِے همے آس ءَ سک اِت اَنت چم چہ ارس ءَ پُر اِت اَنت وتی گاریں چُک ءِ یکّ ژندیں اکسے دست ءَ اَت آئی چمانی ارس همے اکس ءِ سر ءَ کپان اِت اَنت آس ءِ شھم ءَ گوں درپیشگ ءَ لگّ اِت اَنت آئی ءِ هیالانی زِر ءَ چولے پُروشت گوستگیں یات آئی چمانی تہ ءَ اوژناگ کنگ ءَ لگ اِت اَنت-
بِگند ئے آ همے جیڑگ ءَ اَت کہ آئی ءِ چُک ءَ را مرچی پُریں هپت سال سرجم اِنت کہ بیگواه اِنت شپ آسر بوان اَت تھاری وت ءَ گار کنگ ءِ نِدارگ ءَ پدر کنگ ءَ اَت بلے آ انگت ءَ هما هیالاں گوں چیر ءُ سر اَت- نوں روچ در آیان اَت رؤوکیں وت ءَ زِندگ ءِ جُھد ءَ کنگ ءَ اَت بلے دِیر نہ گوست کہ آئی ءَ ساه دات-
بلے آئی ءَ وتی هیالانی همراهی اَنگت ءَ یل نہ داتگ اَت آئی ءَ اِے کھریں شپ گوں بیگواهیں بچ ءِ هیالاں کدی روچ بوت آئی ءَ سما نہ داشتگ اَت روچ ءَ وتی بانزُل زمین ءِ دِلبند ءَ تالان کُت اَنت ڈن ءَ هلک ءُ بازار ءِ مردمانی کوکارانی توار اَت ءُ آ نوں چہ هیالانی جان ءَ دراَتک-
پاد اتک دیم پہ دروازگ ءِ نیمگ ءَ روان بوت کہ باریں چے بوتگ کہ اینچو مردماں چہ واب ءَ بُست کُتگ کوکار ءُ جاک اِنت اِش آئی ءَ در پچ کُت دیم ءَ آهان اَت داں اِے سرجمیں مردم یکّ جونے یے سر ءَ مُچ اَنت-
کہ آئی ءِ دیم سیاهیں گُدے ءِ تہ ءَ اِنت آ چمانی ارساں ساپ کنان اَت ءُ دیم ءِ گُد ئِے دور کُت گوں سیاهیں گُد ءِ دور کنگ ءَ آئی ءِ ودار ءِ کسہ آسر بوت-
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-