ھب، ھاران، تربت: زورانسری بیگواھیانی ھلاپ ءَ زھرشانی ، شھدگ بند

بلوچستان ءِ واپاری شھر ھب، ھاران ءُ تربت ءَ پاکستانی پوج ءِ زورانسری بیگواھیانی ھلاپ ءَ زھرشانی برجاہ انت، ھمے وڑ ھب ءَ بھوانی ءِ ھند ءَ کراچی، شال ءُ مکران ءِ بنجاھی شھدگ بند انتاے

اھوالانی رد ءَ مروچی ھب لسبیلہ پریس کلب ءِ دیم ءَ بیگواھیں جنید ھمید ءُ یاسر ھمید ءِ کھول ءِ ھمراھی ءَ چاکر بگٹی ءِ کھولانی نیمگ ءَ آیانی سلامتی ءَ یل کنگ ءِ ھاتر ءَ سَے روچی شدھرتالے بنجلے برجم کنگ بیتگ – ھمے وھد ءَ انتزامیہ ءَ کھول اے زھرشانی ءِ دارگ ءِ جھد کتگ بلے بے سوب بیتگ-

زورانسری بیگواھیں جنید ء عبدالحمید ءِ گوھار ءِ گوش انت کہ ھشت اکتوبر دوھزار ءُ بیست ءُ چار ءِ شپ ءِ ساھت دَہ بج ءِ نزیک ءَ ھب بھوانی شاہ پمپ ءِ نزیک ءَ منی مستریں برات جنید ھمید ءُ عبدالحمید سَے گاڑیاں ھواریں یک درزنے ءِ کچ ءَ سلاہ بندیں مردماں توپک ءِ زور ءَ آوار جتگ ءُ گون وت برتگ اَنت-

آئی ءَ گوشتگ بیست ءُ ھشت سالی ئیں منی برات جنید ء عبدالحمید ھمے شھر ھب ءَ یک کمپنی OTsula پاکستانی لمیٹڈ ءِ ملازمے ءُ سرجمیں مردم زان انت-

زانگ بہ بیت جنید ھمید ءِ برات یاسر ھمید یازدہ اکتوبر دوھزار ءُ بیست ءُ چار ءِ شپ ءَ کلات ءَ ھما وھد ءَ آوار جنگ بیتگ آ وتی سیادے یک گسے ءَ جھمنند بیتگ – یاسر ھمید ایشی ءَ پیش زورانسری بیگواھی ءِ آماچ بیتگ کہ آئی ءِ کھول ءَ یل کنگ ءِ لوٹ کتگ بیتگ-

ھمے وڑ ھب ءِ شھر ءَ بھوانی ءِ ھند ءَ یک سالے ءَ پیش پاکستانی پوج ءِ دست ءَ زورانسری بیگواھی ءِ آماچیں اسرار بلوچ ءِ کھول ءَ کراچی، شال ءُ مکران ءِ شھدگ ءِ سر ءَ ٹائر مانداشتگ ءُ ٹریفک ءِ واستا بند کنگ بیتگ ءُ اسرار بلوچ ءِ یل کنگ ءِ لوٹ اش کتگ – زھرشانی ءِ سبب ءَ ٹریفک ءِ روانی مھتل انت ءُ انتزامیہ کھول ءِ گون ءَ گپ ءُ تران ءَ بے سوب بیتگ-

دومی نیمگ ءَ چہ ھاران ءَ زورانسری بیگواھیں بلاول بلوچ ءُ عاصم بلوچ ءِ کھول ءَ ھاران ریڈ زون ءَ زھرشانی برجاہ انت-

بلاول ءِ مات ءَ دزبندی کتگ کہ اگاں منی زھگ ءَ جرمے کتگ گڑا ریاستی ادارہ آئی ءَ آمیدگس ءَ پیش کنگ بہ بیت اِنت-

ھمے وڑ کیچ ءِ بنجاھی شھر تربت آپسر کولوائی ءِ بازار ءِ جھمنندیں فدا ولی داد ءِ یل کنگ ءَ شھید فدا چوک ءَ مروچی دومی روچ ءَ ھم برجاہ انت-

زھرشانی ءَ دگہ ھشت بیگواھیں مردمانی کھول زھرشانی ءَ ھوار بیتگ انت ءُ وتی مردمانی یل کنگ ءِ لوٹ ءَ کنگ ءَ انت-