کولپور ءِ بُنجاھی شھدگ ءِ سر ءَ سلاہ بندیں مردماں راہ بستگ ءُ پورس ءِ سلاہ پچ گپتگ انت، پیکٹری ایش مانداشتگ

بلوچستان ءِ دمگ کچی ءِ ھند کولپور ءِ بُنجاھی شھدگ ءِ سر ءَ سلاہ بندیں مردماں بازیں کلاکاں چہ راہ بستگ، لیویز فورس ءِ سلاہ دستیگ کتگ ءُ سمینٹ شرکت ءِ مشینری مانداشتگ اَنت-

ھالانی رِد ءَ مروچی شپ ءِ وھد ءَ سلاہ بندیں مردمانی مزنیں کچے ءَ کولپور ءِ دمگ بُنجاھی شھدگ سر بستگ ءُ گاڑیانی پٹ ءُ پول کتگ اَنت-

ھمے میان ءَ سلاہ بندیں مردماں لیویز چوکی دستیگ کتگ ءُ کارمندانی سلاہ ءُ پرپٹ زرتگ ءُ پد ءَ چوکی مانداشتگ وھدے کہ یک سیمنٹ شرکتے ءِ سرجمیں مشینری مانداشتگ اَنت-

دمگی اِھوالکار رِد ءَ سلاہ بندیں مردماں دو کلاکاں چہ گیش راہ بستگ ءُ پد ءَ ناشناسیں نیمگے ءَ شتگ اَنت-

دمگی واکدار ءَ انگت ھچ وڑیں درشان شنگ نہ کتگ-

زانگ بہ بیت چارشمبے ءِ روچ ءَ سلاہ بندیں مردمانی مزنیں کچے ءَ ھُزدار ءِ شھر زھری ءَ دہ کلاکاں چہ گیش وتی دست ءَ کتگ ءُ ھمے میان ءَ سرکاری کارگس ءَ ھوار پولیس تھانہ ءَ دستیگ کنگ ءَ پد مانداشتگ-

بلوچ لبریشن آرمی ءَ زھری شھر دستیگ کنگ زمہ واری منّ اِتگ-

گل ءِ جارکش جیئند بلوچ ءَ وتی درشان ءِ تہ ءَ گْوشتگ کہ زھری ءَ بی ایل اے ءِ سرجمی ءَ دستیگ، آپریشن ھیروف دومی ءِ بھر ءِ پوجی ھیلکاری بیتگ-

جارکش ءَ گْوشتگ کہ اے آپریشن ءَ بلوچ لبریشن آرمی ءِ دو یونٹس، اسپیشل ٹیکٹیکل آپریشنز اسکواڈ ( ایس ٹی او ایس ) ءُ فتح اسکواڈ ءَ بھر زرتگ – اے پیشگامی آیاں بی ایل اے ءِ انٹیلیجنس ونگ “زراب” ءِ سرجمی ءَ کُمک گون بیتگ-

زانگ بہ بیت اشی ءَ ساری بلوچ لبریشن آرمی ءِ مجید برگیڈ ءِ یک اُرشے ءَ پاکستان پوج ءِ کاروان ءَ ھوار کارمندانی بروکیں یک بسے تربت ءَ فدائی اُرش ءِ نشانگ کتگ اَنت-