زھیر بلوچ ءِ یل نہ کنگ ءِ ھلاپ ءَ شال ءَ زھرشانی کنگ بیتگ

شال ءَ بیگواھیں زھیر بلوچ ءِ یل نہ کنگ ءِ ھلاپ ءَ کھول ءِ روانک ءُ پریس کلب ءِ دیم ءَ زھرشانی کتگ-

گیشیں ھالانی رِد ءَ چہ شال ءَ زورانسری آوار جنی ءِ نشانگ بیتگیں زھیر بلوچ ءِ یل نہ کنگ ءِ ھلاپ ءَ کھول ءِ نیمگ ءَ چہ شال ءَ روانک ءُ زھرشانی کنگ بیتگ، اود ءَ مھلوک مزنیں کچے ءَ زھرشانی ءَ ھوار بیتگ اَنت-

شال روانک ءَ زھرشانی کنوکانی دست ءَ بیگواھیں مردمانی دست ءَ اکس بیتگ اَنت ءُ آیانی یل کنائینگ ءِ لوٹ کنگ ءَ بیتگ اَنت-

شال روانک ءَ چہ تران کنان ءَ بیگواھیں زھیر احمد بلوچ ءِ کھول ءَ گْوشتگ زھیر احمد ء ڈاکٹر حاجی عبداللہ یک سرکاری کاردارے ءُ گوستگیں پانزدہ سالاں چہ پاکستان پوسٹ کارگس ءَ کلرک ءِ بستار ءَ ڈیوٹی ءَ پیلو کنگ ءَ بیتگ، آ بیست ءُ ھپت جون ءَ پشمبے ءَ ساھت دو ءِ وھد ءَ وتی کارگس ءَ جی پی او شال ءَ برجاھیں چہ زرغون دگ ءَ وتی لوگ ءَ کلی بنگلزئی سریاب دگ ءَ دراھگ ءَ بیتگ کہ لوگ ءَ سر بیگ ءَ ساری روچانی رھم ءَ بیگواہ کتگ-

زھیر احمد کھول گوشگ اِنت زھیر احمد یک سرکاری کاردارے ءُ آئی ءَ ھچ وڑیں سیاسی پشت نیست تھنا کھول ءُ ھونی سیادی پُشدر ءَ زھیر اھمد ءَ ھوار دگہ سیاداں وھد وھد ءِ سر ءَ تُرسینگ ءَ اَنت ءُ لوگانی سر ءَ شپ ءِ وھد ءَ باز رند ءَ بیڑ اش برتگ-

کھول ءِ گوشگ اِنت کہ زھیر احمد بلوچ پاکستانی پوج سی ٹی ڈی ءُ چیریں ادارھانی کارمنداں چہ شال ءَ زورانسری بیگواہ کتگ اَت اے درگت ءَ ما پریس کانفرنس ءَ آئی ءِ یل کنگ دزبندی ءُ زھیر احمد ءِ یل کنگ ءِ سوب ءَ ما لاچاری ءَ زھرشانی ءِ راہ در چتگ-

بیگواھیں زھیر احمد بلوچ ءِ لوگ بانُک ءَ دیمتر ءَ گْوشتگ کہ اشی ءَ ساری ھم ما ھپتگاں تاں زھرشانی ئیں نندانک داتگ ریڈ زون ءَ شتگیں مئے سر ءَ لَٹ کُٹ کنت بیتگ بلے ما وتی نندانک برجاہ داشتگ اشی ءَ پد انتزامیہ ءَ دلجمی دیگ ءَ نندانک ھلاس کتگ، بلے اشی ءَ اَبید زھیر بلوچ دیم ءَ آرگ نہ بیتگ-

آئی ءَ لوٹ کتگ کہ اگاں زھیر بلوچ سر ءَ ھرچ وڑیں بھتامے ھست گڑا آئی ءَ آمیدگس ءَ پیش بہ کن اِت اگاں آئی ءَ یل بہ کن اِت من آں ءُ منی چکاں درد ءُ رنجاں چہ بہ رکین اِت-

شال روانک ءَ دگہ بلوچ بیگواھیں مردمانی کھول ءُ سیاسی گلانی باسکاں ھوار نودربرانی مزنیں کچے ءَ ھوار بیتگ اَنت ءُ بلوچستان ءَ زورانسری آوار جنی ءِ ھلاس کنگ ءُ بیگواھیں دوستناکانی یل کنگ ءِ لوٹ کتگ-