نوشکی راجی مچی نندانک ءِ سر ءَ پوج ءِ اُرش ءَ ٹپی ئیں ورنا بیران

پاکستانی پوج ءِ تیرگواری ءَ چہ ٹپی کراچی ءَ الاج بیوکیں ورنا ءَ مروچی ٹپانی درد نہ سگ اِتگ ءُ بیران بیتگ-

گیشیں ھالانی رِد ءَ ھمے سال اگست ءَ بلوچ یکجھتی کمیٹی ءِ سرجمیں بلوچستان ءَ زھرشانی ئیں نندانک میان ءَ نوشکی ءَ نندانک دیوکیں زھرشانی کنوکانی سر ءَ پاکستانی پوج ءِ تیرگواری ءَ چہ ٹپی ئیں ورنا مروچی چہ کراچی ءَ بیران بیتگ-

پاکستانی پوج ءِ تیرگواری ءَ چہ ٹپی ئیں حکمت اللہ دو ماہ ءُ چہ کراچی جناح نادُراھجاہ ءَ الاج بیگ ءَ بوتگ، مروچی ٹپانی درد نہ سگ اِتگ بیران بیتگ، آئی ءِ میت نوشکی ءَ دیم دیگ بیتگ-

زانگ بہ بیت ھمے سال جولائی ءَ گوادر ءَ ھوار سرجمیں بلوچستان ءَ بلوچ راجی مچی ءَ ھوار مردمانی ھلاپ ءَ تاکت کارمرز ءُ دزگیریانی ھلاپ ءَ بلوچ یکجھتی کمیٹی ءِ برجم داشتگیں شھریاں زھرشانی ئیں روانکے کش اِتگ اود ءَ پاکستانی پوج ءَ زھرشانی کنوکانی سر ءَ تچکی ءَ تیرگواری کتگ-

نوشکی ءَ پاکستانی پوج ءَ تیرگواری ءَ چہ حکمت اللہ ءَ ھوار دو زھرشانی کنوکیں دو ٹپی وھدے کہ حمدان بلوچ نامیں ورنایے بیران بیتگ-

وئیل ءِ ھلاپ ءَ بلوچ یکجھتی کمیٹی ءُ آل پارٹیز نوشکی ءَ ھپتگاں تاں نوشکی ءَ بُنجاھی شھدگ سر ءَ نندانک داتگ وئیل ءَ ھوار پوج کارمندانی ھلاپ ءَ کاروائی ءِ لوٹ کتگ، بلے زھرشانی ءَ اَبید ھچ وڑیں گامگیج زیر نہ بیتگ-

زانگ بہ بیت کہ بیست ھشت جولائی ءَ بلوچ یکجھتی کمیٹی ءِ نیمگ ءَ چہ گوادر ءَ مچی برجم دارگ ءِ وھد ءَ پاکستانی پوج ءِ نیمگ ءَ چہ تاکت کارمرز ءُ تیرگواری تاں انو پنچ مردم بیران بیتگ اَنت وھدے کہ بازیں مردم سک ٹپی بیتگ اَنت، وھدے کہ اے میان ءَ پاکستانی پوج ءَ مچی ءَ بھر زیروک ھزرانی مردم دزگیر کتگ اَنت-