لبزانک ءُ چاگرد
نبشتہ کار: عاقب ابراھیم
دی بلوچستان پوسٹ
لبزانک چاگرد ءِ منّت ءَ زندگ اِنت اگاں لبزانک چہ چاگرد ءَ جتا کنگ بہ بیت گُڑاں لبزانک ءِ ھستی پش نہ کپ ایت۔پرچا کہ لبزانک ءِ کار وتی چاگرد ءِ آدینکی ءَ کنگ اِنت چاگرد ءِ شَرّ ءُ ھرابانی پیشدارگ اِنت۔
بَلے ما مرچیگیں وتی لبزانک ءِ دروشم ءَ گِندیں داں مارا ھمے سما بیت کہ مئے لبزانکاراں لبزانک ءِ راہ گار کُتگ ءُ رُنگراھاں سپر کنان اَنت ۔ما اگاں دنیا ءِ آ دگہ لبزانکاں بچاریں داں مارا ھمے گندگ ءَ کیت کہ لبزانک ءَ چاگردی بدلیانی توک ءَ بلائیں کردے پیلو کُتگ ءُ لبزانکاراں پہ وتی راج ءُ زمین ءُ زبان ءَ سک باز کربانی داتگ۔
بَلے مئے لبزانکار چہ چاگرد ءَ چٹ بے سما اَنت چاگردی ھچ وڑیں کارانی توک ءَ لبزانکی مردم گندگ ءَ نئیت تاں کَیت گُڑا آرت ءِ توک ءَ واد ءِ برابر۔تو اگاں ایشاں جُست بہ کن ئے واجہ سبب چے اِنت؟ کہ شُما ھچ وڑیں سُر ءُ پُراں گوں نہ اِت ؟ھچ وڑیں ننداک ءُ روانکاں گندگ نہ بَہ اِت ؟داں پسہ ھمے بیت کہ من یک نبشتکارے آں منی کار ننداک ءُ روانکاں بھر زورگ نہ اِنت منی کار نبشتہ کنگ اِنت ۔
اے راستے کہ تئی کار نبشتہ کنگ اِنت بَلے تو چی نبشتہ کنگ ءَ ئے؟ تئی یک چُشیں نبشتانکے گندگ ءَ نئیت کہ چاگردی گھبودی ءُ گھتری ءِ ھاتر ءَ کار آمد بہ بیت تو ناں زُلم ءُ زوراکی ءِ ھلاپ ءَ نبشتہ کنگ ءَ ئے ءُ نیکہ چاگرد ءِ آدگہ سلکاریانی سر ءَ نبشتہ کنگ ءَ ئے تئی سرھال دلبر ءِ مھپراں بندات بیت ءُ بُرواناں ھتم۔گپ کیت ننداک ءُ روانکانی گُڑا ترا اے گپ ھم سما بہ بیت کہ اے جاگہ ءَ تئی بھر زورگ ھژدری اِنت پرچا کہ یک لبزانکارے ءُ یک لس مھلوکے ءِ گپانی توک ءَ زمین ءُ آزمان ءِ پرک بیت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسانی درشانی انت-