بولان ءَ دزگیر کنگ بوتگیں دژمن ءِ چاریگ مرگ ءِ سزا داتگ انت – بی ایل اے

بلوچ آجوئی لوٹوکیں سلاہ بندیں گل بلوچ لبریشن آرمی ءِ جارکش جیئند بلوچ ءَ وتی آفیشل ٹیلی گرام چینل “ھکل” ءَ شنگ کرتگیں درشان ءِ تہ ءَ گوشتگ کہ بی ایل اے ءِ سرمچاراں بولان ءَ دزگیر کُتگیں زورگیریں پاکستانی پوج ءُ چیریں ادارھانی دو چاریگ بلوچ آمیدگس ءِ پیسلہ ءِ رد ءَ مرگ ءِ سزا داتگ اَنت-

جیئند بلوچ ءَ وتی درشان ءِ تہ ءَ چاریگانی سرجمیں ھال شنگ کتگ ءُ گوشتگ کہ بی ایل اے ءِ سرمچاراں گوستگیں روچاں بولان ءِ دمگ ببر کُچ ءُ بادرا ءَ بی ایل اے ءِ اینٹلیجنس ٹولی ءِ سرپد بیگ ءِ بنیاد ءَ بیڑ برتگ ءُ دو مردم ولی ء غازی خان مری ءُ گلاب شاہ ء سلیم شاہ دزگیر کُتگ اَنت –

جارکش ءِ رِد ءَ دزگیر کتگیں ھردو مردماں جُست ءُ پُرس ءِ میان ءَ دپ ءِ وت وتی جرمکاری منّ اِتگ انت- گلاب شاہ ءَ منّ اِتگ کہ گْوستگیں سال ءِ نومبر ءَ بوتگیں لشکر کشی ءَ ھوار بولان ءِ کش ءُ گوری ھند ءُ دمگاں بوتگیں ایندگہ لشکرکشیاں دُژمنیں پوج ءَ راہ ءُ درانی پیش دارگ ءَ ھوار سرمچارانی گِس ءُ راہ پیش داشتگ اَنت-

وھدیکہ ولی خان ءَ منّ اِتگ کہ گْوستگیں بازیں وھدے بیت کہ پہ دُژمنیں پوج ءَ چاریگری کنگ ءَ بوتگ- کہ پوج ءِ لشکر کشیاں ھوار پہ دُژمن ءَ راشن ءُ آدگہ ھژدری سامانانی برگ ءَ ھوار بیتگ۔ آئی ءَ اے ھم منّ اِتگ کہ اے کارانی کنگے بدل ءَ آئی دُژمنیں پوج ءِ پانگس ءُ بنجلانی بندگ ءِ ٹیکہ دیگ بوتگ انت –

جارکش ءِ رِد ءَ ولی خان ءَ دپ ءِ وت منّ اِتگ کہ سبی ءُ کش ءُ گور ءِ مردمانی زورانسری آوار جنی ءَ آئی ءَ دُژمنیں پوج ءِ کمک کتگ بوتگ ءُ زورگیریں پوج ءِ گوشگ ءِ پد ءَ سلاہ بندیں ٹولی ھم جوڑ کتگ انت –

بی ایل اے ءِ جارکش جیئند ءِ رِد ءَ ھردو مردم راجدروہ بوتگ انت ءُ ھمے رِد ءَ بلوچ راجی آمیدگس ءَ آ مرگ ءِ سزا داتگ اَنت ءُ مرچی بی ایل اے ءِ سرمچاراں آ کُشتگ اَنت- اے مردمانی ھمراھی ءَ دگہ یک مردمے ھم دزگیر ءُ بندیگ کنگ بوتگ، کہ آئی ءِ سر ءَ آئی ھچ وڈیں کتکاری سابت کنگ نہ بوتگ ھمے سوب ءَ بلوچ آمیدگس ءَ آ یل داتگ –

جارکش ءَ گوشتگ کہ بی ایل اے ھمے دوئیں مردمانی کوش ءِ زمّہ واری ءَ منّ ایت- بلوچ لبریشن آرمی اے گپ ءَ تچک کنت کہ زورگیریں پوج ءِ کمکار ھچ وڑ ءَ بکشگ نہ بنت ءُ اے ٹولی ءِ آدگہ مردم زوت وتی آسر ءَ سرکنگ بنت –