تربت ءُ تمپ ءَ پاکستانی پوج ءِ سر ءَ بوتگیں اُرشانی زمّہ واری بی ایل ایف ءَ منّ اِتگ انت

سربوتگیں گوستگیں روچاں ناشناسیں مردماں کیچ ءِ بنجاھی شھر تربت ءُ تمپ ءَ نارکو ٹیکس ءُ پاکستانی پوج ءِ سر ءَ کرنیڈ لانچر ءُ دزبمب اُرش کُتگ –

تمپ ءِ دمگ دازن ءَ پاکستانی پوج ءِ سر ءَ بوتگیں اُرش بیست ءُ یک جنوری ءَ دازن کراس ءَ برجاھیں پوجی پانگس ءِ سر ءَ کنگ بوتگ کہ سلاہ بندیں مردماں پانگس ءِ سر ءَ راکٹ لانچر گولہ آس داتگ – وھدیکہ بیست ءُ دو جنوری ءَ کیچ ءِ تربت ءَ ناشناسیں مردماں نارکو ٹیکس ءِ بنجل ءِ سر ءَ دزبمب اُرش ءِ کتگ – ھردو اُرشاں پوج ءَ جانی تاوان ءِ دیمپانی کنگ کپتگ، اُرشانی زمّہ واری بلوچ آجوئی لوٹوکیں سلاہ بندیں گل بی ایل ایف ءَ من اِتگ انت –

بی ایل ایف ءِ جارکش میجر گوھرام ءِ رِد ءَ سرمچاراں بیست ءُ یک جنوری ءَ شپ ءِ ادار نُھ ءَ تمپ ءِ دمگ دازن کراس ءَ برجاھیں پوجی پانگس ءِ سر ءَ راکٹ لانچر گولہ آس داتگ کہ دژمن پوج ءِ پانگس ءِ تہ ءَ کپتگ انت ءُ چریشی ءَ زورگیریں پوج ءَ جانی ءُ مالی تاوان ءِ دیمپانی بوتگ –

میجر ءَ دیمتر ءَ گوشتگ کہ بیست ءُ دو جنوری ءِ بیگاہ ءَ کیچ ءِ بنجاھی شھر تربت ءَ اینٹی نارکوٹیکس بنجل ءِ سر ءَ ھم دزبمب اُرش ءِ کتگ کہ اُرش ءِ آسر ءَ پوج ءَ جانی ءُ مالی تاوان ءِ دیمپانی بوتگ –

جارکش ءَ گوشتگ کہ بلوچستان ءِ آجوئی ءَ تاں زورگیریں پوج ءِ سر ءَ اُرش برجاہ مان انت –