زُبان ءِ ھلاپ ءَ دْروگ؟ – ابدلستار بُگٹی

الم بوانیت

آھوگ تو اے وڑ مہ کُتیں۔۔۔ – بالاچ قادر

آھوگ تو اے وڑ مہ کُتیں۔۔۔ بالاچ قادر دی بلوچستان پوسٹ گُل ترا یات بیت ھما وھدی کہ توءُ دگہ سنگتے مئے...

کمےّ وھد کشّ – منھاج مختار

کمےّ وھد کشّ منھاج مختار دی بلوچستان پوسٹ تو ھم زانئے کہ من ترا گشگایاں بلے اگاں ترا موھ رست منی اے...

بلوچستان ءِ آجوئی ءِ ترس ءُ پاکستانءِ نوکیں پالیسی: نبشتہ حکیم واڈیلہ

گوشنت زوراک وھدءِ وتا نزور بیگءَ گندیت اگں ماریت گڑا آوتی سرجمیں زورا جنت ءُ وتی زوراکیءَ برجم دارگءِ...

زُبان ءِ ھلاپ ءَ دْروگ؟

نبشتہ کار : ابدلستار بُگٹی

دی بلوچستان پوسٹ

بازیں رد ءُ ناسرپدیں مردم ھست انت کہ آ وت ءَ بلاھیں استاد لیکھ اَنت ءُ پہ راج ءِ رَد دیگ ءَ اے سےئیں جُستاں بلوچ مھلوک ءِ دپ ءَ دے اَنت انچوشکہ
1- بلوچی نبشتاری ءَ اَربی یا تازی آب چی ءَ کارمرز نہ بنت؟
2- اگاں ما اَربی آباں ماں بلوچی نبشتاری ءَ کارمرز مہ کن ایں گُڑا بلوچانی اسلامی نام ماں زگریں بلوچی ءَ بدل بنت چریشی ءَ ما گُناھگار بہ ایں پرچاکہ ایشانی مانا بدل بنت؟
3- سید زھور شاہ ھاشمی ءَ وتی نام چی ءَ گوں اَربی آباں نبشتگ۔

چوناھیگا ما وَ زان ایں کہ لھتیں مردماں ماں بلوچ چاگِرد ءَ بے کساس پورتای کتگ ءُ راج اش بے کساس تُرسینتگ ءُ رد داتگ پمیشکا مارا ایشانی سرپد کنگ ءَ بے کساس جُھد لوٹ ایت۔ نی ما لوٹ ایں کہ اے جُستانی جواب ماں یکیں نبشتانکے ءِ تہ ءَ دیگ بہ بنت کہ چد ءُ پد کَسے اے وڑیں جُستے بہ کنت گُڑا ھر زُبان دوستے ءَ اے جواب آسانی بہ رس اَنت۔ بزانکہ تھنا کاپی پیسٹ لوٹ ایت۔

اِے جُستانی پسو ایش اَنت۔

پسّو لمبر 1: اگاں اے اَربی آب انت گُڑا اے آبانی ماں راجی زبان ءِ نبشتاری ءَ چے کار ءُ درکاری یے ھست۔ بلوچی گوں بُنتواریں آباں شریں وڑے ءَ نبیسّگ بوگ ءَ اَنت مئے راجی زبان ءِ نبشتہ رھبند چَہ اے بے دوازدھیں آباں براھدار، پیلو ءُ سرجم انت ءُ گوں بے اے دوازدھیں آباں بلوچی نبشتاری ءَ یک انچیں رنگ ءُ دْروشمے ودی بیگ ءَ انت کہ چریشی ءَ مئے راجی زبان بلوچی چَہ پارسی، ھندی، پشتو، سرائیکی ءُ ارابی وڑیں بازیں زباناں گیشترّ زیبدار ءُ جُتائیں دْروشمے دار ایت۔ بزاں بلوچی ءِ وتی یک جُتائیں پجّارے ءُ ما ھم ایشی ءَ زگر دارگ ءِ جُھد ءَ ایں پمیشکا باید انت ما بلوچ وتی راجی زبان ءَ گوں بے اے دوازدھیں آباں نبشتہ بہ کن ایں ءُ سْیاد ءُ وارساں ھم اے بابت ءَ سرپدی بہ دے ایں کہ راجی زبان ءِ وانگ ءُ نبیسّگ ءَ بے اَربی آباں ھیل گِر انت۔ ما تچک بِہ بَہ ایں کہ اگاں اَربی اَنت گُڑا گوں بلوچی ءَ ھچ سْیادی نہ دار اَنت انچوش کہ منی ھمُک نبشتانک گوں بے اَربی آبان اِنت ءُ منی نبشتانکاں وانوک جْوان پوہ بیگ ءَ اَنت نبشتانک ءِ تہ ءَ ما کم آبی ءِ سیت ءُ پائدگانی سر ءَ ھم گپ کن ایں۔

پسّو لمبر 2: چوناھیگا ما دْراہ راجی زبان ءِ نودربر ایں پمیشکا اگاں ما گپ ءِ سرپد بوگ ءِ جُھد بہ کن ایں کہ اے بنگالی، کشمیر، کُرد، تُرک، ملیشیا، انڈونیشیا، ھیدرآباد دکن ءِ ملائیلم یا توری چَچنیا، تیوگیں یورُپ، کینڈا، گوریچی ءُ زِرباری امریکہ ءُ انگریز ءِ مسلمان چی ءَ وتی مسلمانی ناماں گوں وتی زبان ءِ آباں نبیسّ اَنت۔ آ چی ءَ گُناھکار نہ بنت ءُ گُڑا ما بلوچ تھنا(صرف) چی ءَ گُناھکار بہ ایں!!؟ گیدی ءِ ھمے راج ماں وتی راجی زباناں اے “اسلم الیکم، زپراَلہ، ابدلکادر، مھمد کاسم، ایسا، موسا، مُستپا، مُرتزا، اَلی اھمد ءُ کُران” نبیس اَنت۔ گُڑا ھمے چی ءَ گوں اَربی آباں نبشتہ نہ کن اَنت اش۔ اگاں آ وتی زباناں دوست دار انت ءُ گوں وتی زبان ءِ آباں نبیس انت گُڑا آ بے گناہ اَنت زاناں بلوچ گُناھگار بیت؟

چوناھیگا لھتیں پیگمبرانی اولی ءُ راستیں نام مھتر جیکب، موزس، جیزس ءُ ابراھام اِت انت گُڑا ھمے ارباں چی ءَ مھتر یاکوب، مھتر موسا، مھتر ایسا ءُ مھتر ابراھیم کتگ اَنت؟ اگاں “ھُدا” ءِ جِند نام ءَ ھر راجے وتی زبان ءَ گْوش ایت ءُ نبیس ایت انچوشکہ سندھی ھُدا ءَ را ”مولا سائین” انگریز “لارڈ” امریکی مسلمان “گاڈ” پارسی “ھاوند” ھندی ” خُدا” ءُ نہ زان آں کہ اے بنگالی، کشمیر، کُرد، تُرک، ملیشیا، انڈونیشیا، ھیدرآباد دکن ءِ ملائیلم ءُ چَچنیا ءِ مسلمان ماں وتی زبان ءَ”ھُدا” ءَ چے گْوش اَنت گُڑا ھمے چی ءَ گُناھکار نہ بنت؟ راستی وَ ایش انت کہ ناں ھمے نام گْوشتگیں راج گُناھکار بنت ءُ نیکہ ما بلوچ بے اَربی آباں گُناھکار بہ ایں بلکیں گُناھکار مردم چَہ وتی رد کُتگیں کاراں بنت، کَسے ءِ رَد دیگ ءَ گُناھکار بنت۔

باید اِنت ما راج ءَ رَد مہ دے ایں بلکیں ما سرپد بَہ این ءُ تچک بہ زان ایں کہ گوں بنگالی، کوریائی، چینی، جاپانی، انگریزی، ھندی، کُردی، ھندوستانی پنجابی، تُرکی ءُ روسی ءِ وڑیں دری زُبانانی آباں اَربی نام ءُ گالانی نبیسّگ ءَ ایشانی مانا وَ بدل نہ بنت البت دْرشم بدل بنت کہ آ گوں ماں آیانی سْیاھگ ءَ نبشتہ اَنت چریشی ءَ کس گُناھگار نہ بیت۔

پسّو لمبر 3: منی دوزواھیں سنگتاں، منی راج ءِ گْوھار ءُ براتاں سید ءَ وت ھچ جاہ ءَ وتی نام “ظھور” نبشتہ نہ کُت بلکیں گوں اَربی آباں دگراں نبشتگ شُما سید ءِ بلوچی سْیاھگ ءِ راست نبیسّگ درس لمبر 4 ءَ بہ وان گُڑا شما زان اِت کہ اے دوازدھیں آبانی بارو ءَ چے گْوشتگ ئِے؟ کہ مارا اے لھم لھم ءَ یلہ کنگی اَنت اگاں ما یکپارگی ایشاں بہ کش ایں گُڑا نیکراھیں مردم گُڑ اَنت۔ اگاں وت ھم نبیس اِت ئِے پد ءَ ھم مارا کشگ بنت پہ ایشی ءَ گیشتر سرپد بیگ ءَ باید انت ما بلوچی سْیاھگ ءِ راست نبیسّگ در لمبر 4 ءُ تاکدیم لمبر 39 ءَ بہ چار ایں کہ اود ءَ نمیرانیں بلوچ راج ءِ ھستی سید ھاشمی ھمے دوازدھیں آبانی بابت ءَ چے گْوشتگ زاناں ما بے ھیال ایں؟

سید گْوش ایت مئے دل سک لوٹ ایت کہ ما اے نام ھم چوکہ آدگہ گالاں، بلوچی گالوار ءُ رھبند ءَ نبشتگ اِت انت اگاں محمد محمود، جعفر، عبدالعزیز، علی محمد ءُ محمد سعید ءِ رنگیں ناماں بلوچی گالوار ءَ مھمد، مھمود، جاپر ابدل ازیز، اَلی مھمد ءُ مھمد سئیت بہ نبیسّ ایں کمیں بے تام ءُ بے براہ بنت پمیشکا ایشاں انوں وتی بُندریں رنگ ءَ نبیسّگ ءَ ایں”

دیم ءَ گْوش ایت “اے گپ ءَ من شَر زان آں کہ ھر یک چیزے ءَ تو نوکیں رنگے بدے ئے یکبرے ترا اجکّہ کنت بلے کمّ کمّ ءَ کہ مردم ھیل گپت ھمے نوکیں چیز ءِ نوکی کْوھن ترّ ایت ءُ مردم گوں ایشی ءَ شری سیل ایت۔ اے نام ھم کمّ کمّ ءَ تریناں کنگ بنت تاکہ نیکراھی مردماں یکپارگی مہ گڑین اَنت پمیشکا پہ نامانی ترینگ ءَ باوست نہ لوٹ ایت”-

بزاں مارا اے نام وتی بلوچی سْیاھگ ءِ ھساب ءَ نبیسّگ بنت انچوشکہ گیدی ءِ دگریں راج وتی مسلمانی ناماں گوں وتی زبان ءِ سْیاھگ ءِ رِد ءَ نبیس اَنت۔ بزاں من وتی Abdel Sattar Bugti ئیں نام ءَ ھمے داب ءَ نبیسّ آں گُڑا من گُناھکارے نہ آں اگاں من “ابدلستار” نبیس آن ئِے گُڑا من گناھے کتگ، بلوچ ھراب ءُ انگریز شَر!! واہ اڑے بلوچ تئی اَگل ءَ! گڈسری من گْوش آں کہ کشمیری زبان ءَ “ص” ءِ آب نیست انت گُڑا ھمے کشمیری” ﷺ”، “سادک”، “پیسل”، “سھابی” ءُ “سابر” وڑیں اَربی نام ءُ گالاں چون نبیسّ اَنت ؟ گُڑا کشمیری ھم گُناھکار اَنت۔

انچوشکہ سید ھاشمی ءَ گْوشتگ کہ مارا کمّ کمّ ءَ اے نام ترینگی اَنت باید انت نی ما منّ ایں کہ وھد باز گْوستگ پمیشکا ما اے اَربی آباں ماں بلوچی نبشتاری ءَ کارمرز مہ کن ایں۔

نی وتی نبشتانک ءِ گُڈی بھر ءَ کم آبی ءِ گپ کن ایں۔ گِند ئے دُنیا ءِ تہ ءَ تھنا ھما زبان پہ کَسان سالیں نودربراں آسان بیت وھدے کہ آ زُبان ءِ آب کم بنت۔ اگاں زُبان ءِ آب کم بنت گُڑا اسکول ءِ کَسان سالیں نودربر ھم زیت دربر اَنت ءُ بازیں آبانی یاد کنگ آیانی سر دردی یے نہ بیت۔

دومی مرچی ڈیجٹل دور اِنت، کم آبیں زبان ءِ کیبورڈ موبائلاں شر جاہ زُور ایت ءُ ما گِندگ ءَ ایں کہ آ مرچاں جْوان کارمرز ھم بیگ ءَ اَنت۔ انگریزی ءِ وڑ ءَ روسی، جرمنی، جاپان، کوریا، اَربی، ھندی بزانکہ دُنیا ءِ ھر وانِندھیں مھلوک موبائلاں وتی زُبان ءِ کیبورڈاں کارمرز کن اَنت۔ ھمے وڑ ءَ بلوچی زُبان ءِ کیبورڈ ھم ھست۔ مرچیگیں انٹرنٹ ءُ موبائل زمانگ ءَ تھنا ھما زُبان دیمروی کنگ ءَ اَنت کہ آیانی آب کم اَنت۔ ھما زُبان ءِ آب باز اَنت آ مرچاں وت پشل ءُ جنجال اَنت انچوشکہ سندھی-

سندھی ءِ 52 آب اَنت پمیشکا موبائل ءِ توک ءَ سندھی کیبورڈ مرچاں سندھیاں جنجال کنگ ءَ اِنت۔ پہ یک آبے ءِ پٹگ ءَ سے چار تاک لیٹ ءُ لیٹ کنگ لوٹ ایت۔

بلوچ زندگ بات ءُ بلوچی زبان بے کسّاسیں دیمرویاں سر بات۔ شالا انچوش بات۔


دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نوکتریں

بلوچستان: یک مردمے زورانسری آوار جنی ءَ پد بیگواہ

سربوتگیں ھالانی رِد ءَ پاکستان ءِ پھازگی لشکر ءَ یک مردمے زورانسری آوار جتگ ءُ بیگواہ کتگ -

عبدالمالک ءِ کُشندھانی یل بوگ پدردی اِنت – کھول

عبدالمالک ءِ کھول ءَ رسانکدراں وتی شنگ کرتگیں درشان ءِ تہ ءَ گوشتگ کہ کتکاراں دوھزار بیست ءُ دو ءِ بیست ءُ...

زورانسری آوار جنیانی بگیری ءَ کراچی ءَ زھرشانی برجاہ

بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ نُھ سد ءُ سِی...

ڈیرہ بگٹی ءَ شُد ءِ سوب ءَ سینزدہ سالی ورنا ءَ وتکشی کُتگ

ڈیرہ بگٹی ءِ دمگ سوئی ءَ سینزدہ سالی شُدیکیں ورنایے ءَ ھُشکیں نان ءِ نہ رسگ ءِ سوب ءَ وتی گُٹ وت...