ھپدہ نومبر دو ھزار نوزدہ ءَ چین ءَ اولی کووڈ-19 ءِ اولی نادراھی دیم ءَ اتک۔ سے ماہ ءِ تہ ءَ اے وبا ءِ نادراھی ( کورونا وائرس) داں ایران ءَ سر بیتگ اَت۔ ھما ملک کہ آئی ءِ دو ھمسایگیں ملکانی تہ ءَ کہ یک انچیں نادراھی یے کہ آئی ءِ ھچ الاج مہ بیت چُش زوت شنگ ءُ تالان بیگ ءَ بہ بیت، گُڑا اے گپ المی بیت کہ اے نادراھی ھمود ءَ ھم سر بیت، پمیشکا ایشی دیم ءَ دارگ ءِ ھاتر ءَ ترا پیش ءَ چہ کلیں کار جریدگ کنگ لوٹ انت ءُ ھمک نگیگیں جاوارانی ھاتر ءَ وت ءَ ساڑی کنگ ھم لوٹ اِیت۔
بلوچستان ءَ کرونا وائرس ءِ اولی کیس 10 مارچ 2020 ءَ دیم ءَ اتک، چہ ایشی ءَ پیش سرکار ءِ کر ءَ کساس چار ماہ ءِ وھد بیتگ کہ آ گوں اے نادراھی ءِ دیم پہ دیم بیگ ءِ ھاتر ءَ وت ءَ ساڑی کُت بہ کتیں ،کساس یک ماھے ھما وھد ءَ بیتگ کہ اے (وائرس) نادراھی تپتان ءَ بلوچستان ءِ سیمسراں سر بیتگ اَت بلے اے نادراہ
ھی کِمار کنگ نہ بیتگ، آئی ءِ سوب ءَ مروچی بلوچستان ءِ اولی سرپ ءِ پھازوک بزاں ڈاکٹر ءُ میڈیکل اسٹاف کوئٹہ ءِ دگانی سرا زھرشانی کنگ ءَ اَنت ءُ گیرام کنائینگ ءَ اَنت کہ ھما ماہ ءَ کہ وت ءَ ساڑی کنگ ءَ ابید مپت ءَ زوال کنگ بیتگ چینچو پُر ارزشت بیتگ۔
ھمے ھپتگ ءِ بندات ءَ چہ کروانا وائرس ءَ چہ سان زرتگیں مردمانی کساس 200 ءَ سر بیتگ کہ ایشانی تہ ءَ 15 ڈاکٹر اَنت، گُڑا ورنائیں ڈاکٹر ءُ پیرا میڈکس ءِ گل سر وزیر ءِ سیکریٹریٹ ءِ دیم ءَ زھرشانی نندوک اَنت۔ آیاں لوٹ کُتگ کہ مارا مئے پھریزگ ءِ ھاتر ءَ آسراتی پی پی ای (پرسنل پروٹیکٹو ایکیوپمنٹ) دیگ بہ بیت۔ بلے اجکھیں وڑے ءَ آیاں بُنکی کمک ءُ آسراتی دیگ ءِ جاہ ءَ آیانی ھلاپ ءَ ترندیں استانی تاگت کارمرز کنگ بیتگ۔ ینگ ڈاکٹرز ایسوسی ایشن ءِ رد ءَ آ سک باز لٹ کُٹ کنگ بیتگ اَنت ءُ آیانی گل ءِ 67 ڈاکٹر مپت ءُ ناھک ءَ دروگیں ءُ بے بنیں بھتام جنگ ءُ دزگیر کنگ بیتگ اَنت۔
یک ماھے پیش، دی بلوچستان پوسٹ ءَ وتی یک شونگالے ءِ تہ ءَ اے جیڑہ ءِ سر ءَ گپ جتگ اَت کہ کورونا ءِ ھلاپ جنگ ءَ بلوچستان ءِ نادراھجانی تہ ءَ آسراتی چہ کساس ءَ کَمُک اَنت۔
ھیر پی پی ای ءُ دگہ آسراتیانی کمی نوں یک جھانی جیڑھے جوڑ بیتگ۔ برطانیہ ءِ ڈاکٹراں سرکار ءَ اے بیھار داتگ کہ اگا آیاں پی پی ای دیگ مہ بنت گُڑا آ وتی کاراں چہ دزکش بنت۔ اے گپ وت یک مزنیں چیدگ اِنت کہ ڈاکٹر اے کار ءِ کنگ ءِ تہ ءَ اوّلی سرپ ءَ اوشتاتگ اَنت ءُ گوں کجام نگیگیاں دیم پہ دیم اَنت ءُ چونیں زھنی زوراکیانی آماچ اَنت۔
یک نیمگے سرجمیں جھان ءَ اولی سرپ ءَ پھازوکانی ھزمتانی ستا ءُ توسیپ کنگ بیگ ءَ اِنت،پہ آیاں دروت ندر کنگ بیگ ءَ اِنت ءُ مردم ھمک روچ وتی لوگاں ڈن در کاینت ءُ وتی ڈاکٹرانی دلبڈی دیگ ءِ ھاتر ءَ چاپ جن اَنت، دومی نیمگ ءَ بلوچستان ءِ سرکار اے جاورانی راستی ءِ سرپدی ءَ ساڑی نہ اِنت۔ ڈاکٹرانی جیڑھانی گیش ءُ گیوار کنگ ءِ جاہ ءَ بلوچستان ءِ سر وزیر جام کمال وتی یک ٹوئیٹے ءِ تہ ءَ گُشیت کہ “ گواچن ءَ اے ڈاکٹرانی سیاسی جیڑہ بیتگ اَنت”
ڈاکٹراں پی پی ای ءُ المی آسراتی نہ دیگ ءَ ھزار نیمون پیش کنگ بیت کُت کنت، بلے آیانی سر ءَ لَٹ کُٹ کنگ ءُ آیاں نا شرکار (فسادی) گُشگ، آیانی ھکی ئیں لوٹاں ھرابیں سیاسی لوٹ گُشگ ءُ ڈاکٹراں ٹپی کنگ ءَ پد زندانی کنگ کجام ھم نیمون ھچ وڑ ءَ منّگ بیت نہ کنت۔ اگاں اے جھانی وبا ءِ ھلاپ ءَ جنگ ءَ باج برگی اِنت گُڑا اے وڑ ءُ پیم زوت ءَ زوت مٹ کنگ کپ انت۔