TBP Balochi

سلاہ بندیں اُرش ءَ پد کمپنی ءِ کار بند کنگ بوتگ ۔

ھالانی رد ءَ بلوچستان ءِ دمگ ڈیرہ مراد جمالی ءِ پٹ فیڈر پیروپل ءِ نزیک ءَ سڑک جوڑ کنوکیں کمپنی ءِ جاہ ءِ سر ءَ ناشناسیں مردماں راکٹ اُرش کتگ کہ ایشی ءَ چہ شرکت ءِ مشینریاں سک باز تاوان رس اتگ۔

ڈیرہ مراد جمالی پولیس ءِ رد ءَ اے اُرش ءَ مشینری ءُ جوڑیشتی جاہ تباہ کنگ بوتگ، ایشی ءَ پد جوڑیشت ءِ کار بند کنگ بوتگ، البت اے اُرشانی تہ ءَ ھچ وڑیں جانی تاوان ءِ ھال نیست۔

پولیس ءَ اے وئیل ءَ ھواریں مردمانی بابت ءَ ھچ وڑیں ھال نہ داتگ بلے پولیس ءِ رد ءَ اے وئیل ءِ پٹ ءُ پول کنگ بوگ ءَ اِنت۔

زانگ بہ بیت ایشی ءَ پیسر ھم ھمے دمگ ءَ پاکستانی پورس پولیس ءُ لشکری ​​کارجاہ ءُ دگہ پریامانی سر ءَ اُرش کنگ بیتگ کہ ایشی ءِ زمہ واری بلوچ آجوئی لوٹوکیں جتا جتائیں سلاہ بندیں گلاں من اتگ انت، بلے تنی وھدی اے وئیل ءِ زمہ واری کس ءَ نہ زرتگ-

کیچ ءِ دمگ تمپ ءِ ھند چہ گومازی ءَ گوستگیں شپ ءَ پاکستانی پوج ءَ لشکر کشی بندات کتگ، ءُ ھمے میان ءَ لوگ لوگ ءَ پٹ ءُ پول کتگ-

اود ءِ جھمنندیں گوشگ اِنت کہ کارندہ لوگ ءَ پُترتگ اَنت ناں تھنا مردین بلکیں زالبول ءُ چُک ھم زوراکیانی نشانگ کتگ اَنت- بازیں مردمے ءَ بھتام جتگ کہ پٹ ءُ پول ءِ میان ءَ موباھل فون، موٹر سائیکل ءُ دگہ گرانبھائیں سامان ھم وتی ھمراھی ءَ برتگ اَنت-

دمگی مردمانی رِد ءَ کاروائی ءِ میان ءَ زالبول ءُ چُک لُٹ ءُ کُٹانی نشانگ کتگ اَنت-

اِھوالکار ءِ رِد ءَ اے لشکر کشی ءِ میان ءَ دو مردم آوار جتگ ءُ ناشناسیں جاھے ءَ برتگ اَنت، بیگواہ بیتگیں مردمانی پجّار بوھیر ءُ چیئرمین دوست محمد ءُ محراب ء واحد نام ءَ چہ بیتگ اَنت-

گوستگیں شپ ءَ بلوچستان ءِ بُنجاھی شھر شال ءِ جتاجتائیں ھنداں راکٹ اُرش ءُ کلات ءَ پاکستانی پوج ءِ بُنجل ءِ سر ءَ اُرش کنگ بیتگ-

گیشیں ھالانی رِد ءَ کلات ءِ شھر ءَ پاکستانی پوج ءِ بُنجاھی بُنجل، کلات میس سر ءَ اُرش کنگ بیتگ اے میان شھر ءَ بازیں تراکانی ءُ تیرگواری ءِ توار اش کنگ بیتگ اَنت-

اِھوالکار ءِ گْوشگ اِنت کہ اے اُرش ءَ پوج ءَ تاوانانی دیمپانی کنگ کپتگ، بلے واکدار ءِ درشان دیم ءَ نیتکگ-

دومی نیمگ ءَ شال ءِ جتاجتائیں ھنداں پُشت ماں پُشت تراکانی توار اش کنگ بیتگ اَنت-

واکدار ءِ رِد ءَ شھر ءِ جتاجتائیں ھندانی سر ءَ بازیں راکٹ کپتگ انت-

تراکانی توار شھر ءِ گنجان آباد دمگاں ءَ اش کنگ بیتگ اَنت کہ اود ءَ گوالمنڈی چوک، میر احمد خان دگ، نیو نجم الدین دگ، سرکی دگ، قمبرانی دگ، شانتی نگر ءُ فقیر محمد دگ ھوار اَنت-

چمگدانی گوشگ اِنت کہ جتاجتائیں ھندانی سر ءَ وھد وھد ءَ چہ تُرندیں تراکانی توار اش کنگ بیتگ انت چریشی ءَ پد بازیں دمگاں لین پُجارینگ بند بیتگ-

ریسکیو ءُ سکیورٹی ءِ رِد ءَ میر احمد خان دگ ءِ سر ءَ یک ٹرانسفارمر ءِ سر ءَ راکٹ لگگ ءَ چہ تُرندیں تراکے بیتگ، وھدے کہ فقیر محمد دگ ءِ سر ءَ یک لوگے ءِ چت ءَ کمو تاوان رس اِتگ-

تنی وھدی جانی تاوان ءِ پدری نہ بیتگ-

واکدر ءِ رد ءَ وئیل ءَ پد پولیس سی ٹی ڈی ءُ دگہ پوجی ادارھاں ھمگرنچیں دروشم ءَ جتاجتائیں دمگاں سرچ آپریشن بندات کتگ-

ڈی آئی جی شال عمران شوکت ءِ گوشگ اِنت کی میاربارانی دزگیری ءِ ھاتر ءَ کاروائی تُرند کتگ ءُ شکی ئیں ھنداں پٹ ءُ پول برجاہ اِنت-

سرجمیں شھر ءَ سیکیورٹی ھائی الرٹ کتگ وھدے کہ تھی ءُ ڈنی راھانی سر ءَ نگاہ داری تُرند کتگ- سرجمیں ھمگرنچیں یونٹس پرکار کتگ اَنت دانکہ کجام وڑیں ھترہ ءَ چہ وھد ءِ سر ءَ داشت بہ کن ایں-

ھمے وڑ چہ قمبرانی دگ ءَ دہ مردم ءِ نزیک ءَ آوار جنگ ءُ ناشناسیں جاھے ءِ برگ ھال اِنت تنی وھدے آیانی پجّار نہ بیتگ انت-

بلوچستان ءِ جتاجتائیں دمگاں دو زالبولاں ھوار شش مردم آوار جنگ ءُ بیگواہ کتگ اَنت-

کیچ ءَ پاکستانی پوج ءَ بیڑبرتگ ءُ دو زالبول گران کتگ ءُ ناشناسیں جاھے ءَ برتگ اَنت-

ھالانی رِد ءَ گوستگیں شپ ءَ پاکستانی پوج ءِ کیچ ءِ دمگ تجابان ءَ یک لوگے ءِ سر ءَ بیڑبرتگ اود ءَ ساڑی ھاجی بدل ءِ لوگ بانُک زبیدہ بلوچ ءُ آئی ءِ نشار دولت لوگ بانُک زرناز چہ لوگ ءَ گران کتگ ءُ وتی ھمراھی ءَ برتگ اَنت-

پاکستانی پوج ءِ دست ءَ آوار جنگ بیتگیں زالبول پد ءَ دیم ءَ آرگ نہ بیتگ اَنت-

اِھوالکار ءِ رِد ءَ پاکستانی پوج ءِ دست ءَ زورانسری بیگواہ کتگیں دوئیں زالبول ھژدہ فروری کُشگ بیتگیں دولت ء حاجی بدل ءِ مات ءُ جنوزام اِنت-

اِھوالکار ءِ رِد ءَ ھاجی بدل پاکستانی پوج ءِ چیردستی ءَ کارکنوکیں سلاہ بندیں ڈیتھ اسکواڈ نام ءَ چہ زانگ بیتگ تیرگواری کتگ کشتگ، گوستگیں شپ ءَ آئی ءِ مات ءُ جنوزام پاکستانی پوج ءَ بیگواہ کتگ اَنت-

ھمے وڑ بیست ھپت اپریل 2026 چہ شال ءَ سریاب دگ مل کالونی ءَ ایف سی کارندھاں رازق بلوچ ء قادر بخش جھمنند مل کالونی سریاب دگ شال آوار جتگ ءُ بیگواہ کتگ
اَنت-

ھمے وڑ چاردہ اپریل 2026 ءَ چہ اوتھل یونیوسٹی ءَ شپ چار ءَ سی ٹی ڈی کارندھاں نوردین ء کریم بخش جھمنند بالگتر کیلکور آوار جتگ ءُ بیگواہ کتگ-

ھمے وڑ چہ کیلکور ءَ چار اپریل 2026 بلال ء دلمراد ءُ بیست چار اپریل 2026 ءَ فیض اللہ ء اختر جھمنند کیلکور بالگتر آوار جتگ ءُ بیگواہ کتگ اَنت –

بلوچستان ءِ بنجاھی شھر شال ءَ ھوار گوادر ءَ دو مردم زورانسری بیگواہ کنگ بیتگ انت-

بلوچستان ءِ بنجاھی شھر شال ءَ بی ایس او پجار ءِ بنجاھی وائس چیئرمین بابل ملک بلوچ پاکستانی لشکر ءَ دزگیر کتگ ءُ بیگواہ کتگ۔

بلوچ اسٹوڈنٹس آرگنائزیشن (پجار) ءَآئی ءِ بیگواھی ءِ پدرائی ءَ گْوشتگ کہ سینٹرل سینئر وائس چیئرمین بابل ملک بلوچ ءِ چہ پولی ٹیکنیک کالج ءِ ھاسٹل ءَ زورانسری بیگواہ کنگ ءَ ایر جنت ءُ سکا دردناکے املے ۔

بلوچ اسٹوڈنٹس آرگنائزیشن (پجار) ءِ بنجاھی جارکش ءَ وتی بیان ءِ تہ ءَ گشتگ کہ گوستگیں شپ ءَ پولی ٹیکنیک کالج ءِ ھاسٹل ءَ چہ پرامن سیاسی جنز ءَ گوں بندوکیں نودربر رھشون ءِ بیگواہ نہ ایوک ءَ ایرجنی ءِ لائک انت بلکیں بنکی انسانی ھکانی مزنیں لگتمالی یے ۔ اے امل امن ءُ ایمنی ءِ وانگ ءُ زانگ ءِ چاگِرد ءَ تُرس ءُ بیم ءِ ودی کنگ ءَ اِنت ءُ اے بلوچستان ءِ وانگ ءُ زانگ ءِ رھبند ءَ سانمند کنگ ءِ ھاتر ءَ پہ زانت سما کنگ بوگ ءَ ایں۔

جارکش ءَ گوشتگ کہ بابل ملک بلوچ یک پرامن سیاسی جھدکارے، نودربرانی وانگ ءُ زانگ ءُ جمھوری ھک ءُ وانگ ءُ زانگ ءِ دیمروئی ءِ واستا پرکاریں رنگے ءَ کار کنگ ءَ بوتگ۔ آئی ءِ اے رنگ ءَ دزگیری ءُ بیگواہ کنگ پدّریں آئین ءُ کانود ءِ لگتمالی اِنت۔ بیان ءِ تہ ءَ گوشگ بوتگ اگاں آئی ءِ سر ءَ کجام ھم بھتامے ھست گڑا آمید گس ءَ پیش کنگ بہ بیت، کانودی کارروائی کنگ بہ بیت ءُ پاکستان ءِ آئین ءِ رد ءَ کارروائی کنگ بہ بیت۔

بیان ءِ تہ ءَ گیش گْوشگ بیتگ کہ بلوچ نودربر گل (پجار) یک جمھوری ءُ سیاسی نودربر گلے، کہ پکری رنگ ءَ گوں نیشنل پارٹی ءَ ھمگرنچ اِنت، ءُ ملک ءَ پارلیمنٹ ءِ بالادستی، کانود ءِ ھاکمیت ءُ تچکیں آمیدگسی نزام ءِ سر ءَ باور کنت۔ بی ایس او پجار ءَ مدام ڈیھ ءَ جمھوری امل ءِ دلبڈی داتگ ءُ نودربرانی وانگ ءُ زانگ، جمھوری ءُ آئینی ھکانی رسگ ءَ جوانیں کرد پیلو کتگ۔

ھمے وڑ ءَ بلوچستان ءِ تیابدپی شھر گوادر اورماڑہ ءَ پاکستانی چیریں ادارھاں بیست ءُ ھپت اپریل دوھزار ءُ بیست ءُ شش ءَ سکی ء بالاچ آوار جتگ ءُ برتگ کہ آ یک پٹرول پمپے ءَ کار ءَ بوتگ-

اھوالانی رد ءَ سکی ء بالاش پسنی کلانچ ءَ سیادی دار ایت ءُ ایشی ءَ پیش دوھزار ءُ ھژدہ ءَ پاکستانی پوج ءِ دست ءَ بیگواہ کنگ بیتگ کہ داں چار سالاں بیگواہ بیتگ ءُ دوھزار ءُ دو ءَ یل کنگ بیتگ-

خدیجہ بلوچ بنت پیر جان ءِ یل نہ بوھگ ءِ ھلاپ ءَ زھرشانی پتر گیشتر، اود ءَ تربت شال ءَ روکیں سی پیک ءِ شھدگ ھیرونک ءِ ھند ءَ بند کنگ بوتگ ءُ آئی ءِ زوتیں یلہ کنگ ءِ لوٹ کنگ بوگ ءَ ایں۔

زھرشانی کنوکاں اے راہ پہ ھر وڑیں روانی ءَ بند کتگ، ایشی ءِ سبب ءَ تربت، ھوشاپ، آواران، پنجگور، سوراب ءُ شال ءِ نیام ءَ دو نیمگی ٹریفک سرجم ءَ بند کنگ بوتگ۔

زھرشانی کنوکیں مردمانی گْوشگ اِنت کہ خدیجہ بلوچ ءِ زورانسری بیگواھی ءَ بازیں روچ گوستگ بلے انگت ءَ آ یل کنگ نہ بوتگ کہ ایشی ءِ ھلاپ ءَ زھرشانی برجاہ بیت ۔

دومی نیمگ ءَ شال ءَ بولان میڈیکل کالج ءِ دیم ءَ زھرشانی ءِ دھرنا برجاہ اِنت کہ اود ءَ مزنیں کساسے ءَ سیاد ءُ وارس ساڑی اَنت ءُ انساپ ءِ لوٹ ءَ کنگ ءَ اَنت۔

زھرشانی کنوکاں لوٹ کتگ کہ اگاں خدیجہ بلوچ ءِ سر ءَ کجام جرمے بھتامے جنگ بیتگ گڑا آ زوت آمیدگس ءَ پیش کنگ بہ بیت ءُ کانود ءِ رد ءَ کیس کنگ بہ بیت۔

پنجاب ءِ دمگ ڈی جی خان ءِ ھند شادان لنڈ ءَ فوجی سیمنٹ فیکٹری ءَ چہ یک سیکورٹی گارڈے دزگیر کنگ ءُ بیگواہ کنگ بوتگ۔

دمگی اھوالانی رد ءَ بیگواھیں مردم ءِ پجار دوست محمد ءِ نام ءَ بوتگ کہ آ پاکستانی لشکر ءَ چہ ریٹائرڈ بوتگ ءُ اے وھد ءَ فوجی سیمنٹ فیکٹری ءَ سیکورٹی گارڈ ءِ بستار ءَ کار کنگ ءَ بوتگ۔ دوست محمد ءِ بابت ءَ گشگ بیت کہ آ تونسہ شریف ڈیرہ غازی خان ءِ مردم اِنت ءُ آئی ءِ اُمر 45 سال ءِ کساس ءَ اِنت۔

کھول ءَ گْوشتگ کہ دوست محمد 23 اپریل 2026 ءَ شپ ءِ 5:30 ءِ نزیک ءَ انسداد ناشرکاری ءِ کارندھاں کارخانہ ءِ نزیک ءَ چہ برتگ ءُ ایشی ءَ پد آئی ءِ بارو ءَ ھچ ھال نہ بیتگ۔

کھول ءَ لوٹ کتگ کہ دوست محمد زوت آمیدگس ءَ پیش کنگ بہ بیت یا آئی ءِ جان سلامتی دلستکی کنگ بہ بیت۔

بلوچستان ءِ دمگ کیچ تمپ ءَ مند گوگ ءِ جھمنندین مردمے ءِ لاش دزکپتگ-

گیشین اھوالانی رد ءَ لاش تمپ دازن ءَ واٹر سپلائی ءِ نزیک ءَ دزکپتگ کہ اود ءَ آئی ءِ پجار رستم ء ابراھیم ءِ نام ءَ زانگ بیتگ – ءُ آ مند گوگ ءِ جھمنند بیتگ-

دمگی مردمانی رد ءَ رستم لھتے روچ پیش ناشناسیں مردماں مند گوبرد ءَ ءَ آوار جتگ ءُ برتگ –

دمگی اھوالانی رد ءَ لاش ءِ گندگ ءَ پد لاش ءِ گور ءَ پاکستانی پوج اتکگ ءُ پد ءَ واتر شتگ-

داں انگت ءَ ایشی ءِ آوار جنگ ءُ کوش ءِ زمہ واری ھچ کس ءَ نہ زرتگ ءُ ناکہ آئی ءِ کوش ءُ آوار جنی ءِ درگت ءَ گیشین اھوال دیم ءَ اتکگ انت-

بلوچستان ءِ دمگ کیچ ءَ سلاہ بندیں مردمانی تیر گواری ءَ یک مردمے بیران ءُ آئی ءِ لوگ بانک ٹپیگ بوتگ ۔

چہ دمگی مردمانی رد ءَ بیران بوتگیں مردم ءِ پجار عامر نور ءِ نام ءَ بوتگ کہ آ تمپ ءِ دمگ کونشقلات ءِ نندوک اِنت۔

دمگی مردمانی گشگ انت کہ امیر نور نومبر 2024 ءَ پاکستانی لشکر ءَ زورانسری ءَ بیگواہ کتگ بیتگ ءُ بازیں وھداں بیگواہ بوگ ءَ پد چار روچ ءَ پیسر یل کنگ بیتگ۔

ھالانی رد ءَ آ گوں وتی جنین ءَ کراچی ءَ پہ الاج ءَ روگ ءَ بوتگ کہ راہ ءَ ناشناسیں سلاہ بندیں مردماں بس اوشتارینتگ ءُ ایر کتگ ءُ تیرگواری کتگ کہ ایشی ءِ آسر ءَ آ جاہ ءَ بیران بوتگ وھدے کہ آئی ءِ جنین ٹپی بوتگ۔

دمگی مردمانی گشگ اِنت کہ اے اُرش کنوک سرکاری کمک ءِ سلاہ بندیں گلے ءَ بوتگ کہ دمگی مردم آئی ءَ ’’ڈیتھ اسکواڈ‘‘ ءِ نام ءَ پجاہ کار انت۔

چہ نوشکی ءَ سر بیتگیں ھالانی رِد ءَ پاکستانی پوج ءِ مزنیں کچے ءَ مل ماککی ءِ دمگ ءَ سر بیتگ اَنت ءُ دمگ ءَ کومبنگ آپریشن برجاہ ءَ اِنت، اود ءَ لوگ ءَ پٹ ءُ پول کنگ ءَ اَنت-

ھالانی رِد ءَ پوج ءَ دمگ ءِ جتاجتائیں ھندانی سر ءَ ناکہ بندی کنان ءَ پٹ ءُ پول بندات کتگ، وھدے کہ پوج ءِ گاڑی شھر ءِ جتاجتائیں شھدگانی سر ءَ گشت کنگ ءَ اَنت- شھر ءِ پُترگی ءُ دراھگی راھانی سر ءَ رؤکیں آؤکیں گاڑیاں سک پٹ ءُ پول کنگ ءَ اِنت-

زانگ بہ بیت کہ نوشکی شھر ءَ پیسر ءَ چہ کرفیو ھست اِنت- ھمے سال 31 جنوری ءَ بلوچ لبریشن آرمی “آپریشن ھیروف ” ءَ چہ ھمگرنچیں اُرشاں ءُ شش روچ ءَ دستیگ ءَ پد نوشکی ءَ پوج ءِ نیمگ ءَ چہ دمگی آبادی ءِ ھلاپ ءَ کاروائی وھد وھد سر ءَ برجاہ بیتگ-

دمگی آبادی ءُ کاروباری مردم ھمکروچ پوجی آپریشناں دلسیاھی ءِ درشان کنان ءَ آیاں گوشتگ کہ آیانی ھمکروچی زند ءُ کار ءُ بار اسرمند بیتگ اَنت-