مھروانیں وَپا جان گوں سنگتاں اَبدمان اِنت
نبشتہ کار: خلیف بلوچ
دی بلوچستان پوسٹ
وَپا جان یک مھروانیں ءُ مُکلس اِیں سنگتے بُوّتگ منی وڑیں یک ھُدا بُردگے اَگاں وَپا جان ءِ سَر ءَ چیزے نِبشتہ بِہ کَنت ھم منی ھیال ءَ کَمّ اِنت پرچاکہ وَپا جان ھَرکَسّی واست ءَ یک مھربانے بُوّتگ ۔
سنگتانی توک ءَ آئی ءِ ھچ پَرکّ ءُ دَرکّ نَہ کُرتگ مَروچی ھَرکَسّ وَپا ءِ نام ءَ گِپت گَپّ چَہ نادُکاں دَرنیا اَنت گُڑا مردُم آشنا بیت کہ وَپا ھَرکَسّی واست ءَ شَرّ بُوّتگ ۔ اَگاں کُج ءَ سَپرے بُوّتگ گُڑا آ دُرستیں چیزانی ٹَھنوک بُوّتگ ۔
کوہ ءِ شوانگاں بِگر داں کُلّیں جُھد کاراں دَرَا ھَرکَسّ وَپا جان ءِ لوٹوک بُوّتگ وَپا جان اَگاں یک آرتے اوتاک ءَ آؤرتگ گُڑا کوہ ءِ توک ءِ کَپتگیں شوانگانی ھیالِ گور بُوّتگ آئی ھما شوانگانی نیزگاری مار اِتگ ءُ اوتاک ءِ ھَرّ ھم داتگاں اَگاں کَسّے ءَ گُشتگ ما شھر ءَ رَھادگ بِہ اِیں وتئی واست ءَ توشگے کارئیں ۔
گُڑا آئی ھمئِے پَسّو بُوّتگ گوں وتئی اوتاک ءِ سنگتاں گوں کہ اے بَزّگانی ھیال مارا شُمارا دَارگ لوٹ اِیت ھَر وَھد ءَ اِیشانی ھیال اوتاک ءِ سنگتاں داشتگ اَنت ۔
وَپا گوں وتئی جُھد ءَ سَکّ مُکلس اَت اَگاں کُجام سنگتاں وَپا ءَ را دیستگ ھمائی زانتگ کہ چنچو نادرہ بُوّتگ بَلَے مُدام دَپے کندگ ءَ پُرّ بُوّتگ آئی وتئی نادرائی ھچ رَنگ ءَ پَدّر نَہ کُتگ باز رَند سنگتاں گُشتگ وَپا جان بُرو شھر ءَ وَتئی ھلاج ءَ بِہ کَن مُدام ھمئِے گَپّے جَتَگ من کَمُوک نادرا آں ۔ او ھَر وَھد گُشت ئِے من وَت ءَ ٹَھین آں ورنا بُرواں وتئی ھلاج ءَ بِہ کناں من پدا دِگہ وَھدے ءَ رَوَ آں ۔
وَپا جان ءَ کَسّ ءَ گوں ھچ رنگیں گلِگ نَہ بُوّتگ اَگاں یک سنگتے ءَ نَہ سَرپدی ءَ پارٹی ءَ را گُشتگ گُڑا آئی سنگت ءَ را ڈَنّ ءَ کَشیتگ او ھمئِے سَرپد کُرتگ سنگت مارا شُمارا سَکّ ءَ باز جُھد کَنگی اِنت پَہ وتئی بَزّگیں راج ءَ پَہ وتئی کُوم ءَ اَگاں مَروچی ما شُما کسان ، کسانیں گَپّانی سَر ءَ اَڑ ءُ جنجال کَن اِیں باندا گُڑا ما کُجام رنگ ءَ دُژمن ءَ پْروش دِیں ۔
وَپا جان ءَ دیستگ اَگاں سنگتے گوں سنگتاں دل گران اِنت گُڑا آئی ءِ جُھد ھمئِے بُوّتگ کہ وَت ماں وَت سنگتانی یکے دومی ءِ گون ءَ دل گرانی مَہ بیت پرچاکہ آئی ءِ ھیال ءَ بُوّتگ آئی اے مار اِتگ کہ اَگاں اے ورنایانی توک ءَ یکے ھم دل گران بِہ بیت مئِے جُھد ءَ را تاوان بیت ۔
وَپا جان ءِ کِرّ ءَ مُدام رَوَگ ءُ آھگ اَست ءَ سنگت سَکّ باز اِتاں ھَرکَسّ اَگاں کولواہ ءَ شُتگ گُڑا اَلّم وَپا ءِ کِرّ ءَ شُتگ ۔
وَپا جان ءِ یک چیزے من ءَ سَکّ دوست بُوّت اَگاں ھَر وَھد ءَ سنگتے ءَ گَپّے گُشتگ یاکہ جُستے کُرتگے گُڑا آئی سنگتے گَپّ جوانیں وَڑے گوشداشتگ آئی ءِ اے نَہ چار اِیت کہ اے نوکیں سنگتے یاکہ کوھنیں سنگتے ۔
کُلّیں سنگت ئِے یکیں نِگاہ ءَ چار اِتنَت ئِے وَپا جان یک روچے ھم اِیمِن ءَ نَہ نِشت وَپا مُدام کارانی توک ءَ اَت وَپا جان ھلاکہ ءِ توک ءَ برے اے گَزّ ءِ بُن ءَ اَت ءُ برے آئی پرچاکہ آ ھمئِے جیڑگ اَت کہ مَروچی پِلّان اوتاک ءَ مَڈّی کَشی ءُ باندا دِگہ جاھے دِگہ کیمپے ھَر وَھد ءَ دَزگَٹّ اَت ءُ او دُژمن ءِ سَر ءَ ھم جیڑگ اَت ۔ وَپا جان ءَ گوں کُلّیں ھَند ءُ دَمگاں جوانیں رَنگے ھال ءُ اھوال بُوّتگ ۔
گُڈّسری روچاں کہ سنگتانی سَر ءَ اُرش بیت دُژمن وَپا جان ءَ ساری ءَ آشنا بیت کہ اے مرد ءَ اے جنگ ءِ توک ءَ جوانیں کُتَہ کاری اَست ما ھَر رَنگ ءُ دْروشَم ءَ اِیشی ءِ سَر ءَ اُرش بِہ کناں اَلّم وت ءَ رَکّینیت ءُ مئِے دَست ءَ دَر کئیت ۔
ریاست ءِ ناپاکیں پوج کُلّاں چَہ ساری سنگتانی سَر ءَ ڈرون ءِ سَر ءَ ھملہ کَنت سنگت وتئی جوانیں کُتَہ کارے ءَ گوں ریاست ءِ ناپاکیں پوج ءَ جوان دیم پَہ دیم باں یک رَندے ڈرون ءِ گولا اَنچو پَہ دیم کَپیت دومی گولا سنگتانی نَزّیک ءُ گور ءَ کَپیت یک سنگتے شھید بیت ءُ یکے ٹَپّی بیت پَدا ڈرون ءِ تَرّ ءُ تاب چَٹّ سنگتانی مَنَگل ءَ بیت گُڑا وَپا جان چار اِیت یک سنگتے اَنگت ءَ نَپَسّ پُرّ کَنگ ءَ اِنت گُڑا وَپا دِگہ دو سنگت ءَ گوں کئیت ھمئِے ٹَپّی ئیں سنگت ءَ بَڈّ ءَ کَن اَنت ءُ دِگہ جاھے ءَ بَرَ اَنت ءُ پَدا شھید بُوّتگیں سنگت ءِ مَیّت ءَ کَمّیں اَدا چِست کَناں ءُ دِگہ جاھے ایر کَن ءَ بَرَگ ءَ باں گِنداں ڈرون واتر ھمئِے ھَند ءُ دَمگ ءَ پیداک اِنت کَمّیں وَت ءَ ڈَکّگاں ءُ لَھم ، لَھم ءَ دیم ءَ رَھادگ باں کہ جنگی بالگرد کائینت گُڑا جنگ بِنا بیت وَپا گوں وتئی سنگتاں بلائیں جنگے کَنت بازیں کمانڈو ئِے مُردار بیت گُڈّسَر ءَ جنگی بالگرد ٹیٹ تیر ءُ گولا زمین ءِ دلبَند ءَ بے ھساب ءَ جَنت وَپا گوں پَنچ سنگت ءَ شھید بیت ءُ سَکّ ءَ باز ناپاکیں دُژمن ءِ کمانڈو مُردار بیت ۔ اَروَاہ آسُودگ بات تئی ھَمبلو ، گوں تئی ھمراھیں سنگتاں ھَوار ۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
